បទ«គុន្ធបុប្ផា និងក្តីសង្ឃឹម» របស់ផលិតកម្មថោន ដែលបកស្រាយដោយលោក ខេម និងកញ្ញា សុគន្ធ នីសា នេះ និពន្ធដោយអ្នកនិពន្ធ យឹម តាស្រង់។ តាមពិតទៅចម្រៀងនេះ ត្រូវបានផលិតចេញតាំងពីជាងមួយឆ្នាំមុន នៅក្នុងអំឡុងពេលនៃយុទ្ធនាការសង្ក្រោះ មន្ទីរពេទ្យគន្ធបុប្ផា បន្ទាប់ពីមន្ទីរពេទ្យនេះ បានប្រកាសថា ខ្លួន​លែង​មានសមត្ថភាព អាចទប់ទល់រាល់ការចំណាយនានា នោះទៀតហើយ។ ប៉ុន្តែក្រុមអ្នកប្រើប្រាស់បណ្ដាញ​សង្គម ទើបនឹងយកចម្រៀងនេះ មកបង្ហោះសារជាថ្មី នៅលើទំព័រ ឬគណនីរបស់ពួកគេ ហើយបានធ្វើឲ្យ​ចម្រៀង​នេះ បង្កការចាប់អារម្មណ៍ឡើងវិញ។

អ្នកស្តាប់ភាគច្រើន បានសរសើរថា ជាមួយសម្លេងដ៏ស្រទន់ របស់តារាចម្រៀងទាំងពីរ បានធ្វើអត្ថន័យ បញ្ជាក់​ពីមន្ទីពេទ្យ «គុន្ធបុប្ផា» ដែលបានជួយជីវិតកុមារជាច្រើននាក់ ដោយមិនគិតកម្រៃនោះ កាន់តែមានន័យ​ខ្លាំង​ក្លា និងកាន់តែពិរោះឡើង។ អត្ថន័យ ដែលលើកឡើងថា កុមាររាប់ម៉ឺននាក់ក្នុងមួយឆ្នាំៗ ត្រូវបានជួយសង្គ្រោះ ឲ្យ​មាន​ជីវិត និងបានរកឃើញ នូវស្នាមញញឹមរបស់ពួកគេមកវិញ ដោយសារមន្ទីរពេទ្យនេះ។

អ្នកគាំទ្របទនេះមួយចំនួន បានសរសេរថា៖ «បទនេះពិរោះណាស់ យើងត្រូវតែរួមគ្នា សង្គ្រោះកុមារកម្ពុជា»។ យុវជនម្នាក់ទៀត បានសរសេរឡើងដែរថា៖ «ពិរោះ និងមានអត្ថន័យណាស់។ សូមជួយឧបត្ថម្ភ មន្ទីពេទ្យ​គន្ធបុប្ផា ដើម្បីសង្គ្រោះកុមារក្រីក្រនៅកម្ពុជា»។

គួរំលឹកថា មន្ទីពេទ្យគន្ធបុប្ផា ដែលមានលោកវេជ្ជបណ្ឌិត បេអាត រិឆ្នឺរ ប្រធាននិងជាស្ថាបនិកនោះ ត្រូវបាន​បង្កើត​ឡើង តាំងពីឆ្នាំ១៩៩២។ រហូតមកដល់បច្ចុប្បន្ន មន្ទីពេទ្យខាងលើ មានបុគ្គលិកពេទ្យប្រមាណ​២៥០០​នាក់ ដែលប្រចាំការរាល់ថ្ងៃ នៅក្នុងសេវាទទួលពិនិត្យព្យាបាលកុមារ ពីគ្រប់ទីកន្លែងទាំងអស់ក្នុងប្រទេស ដោយ​មិនគិតប្រាក់៕

-----------

» ចម្រៀង«គុន្ធបុប្ផា និងក្តីសង្ឃឹម» ដែលផ្សាយនៅលើគណនី យូធូប ផ្លូវការ របស់ផលិតកម្មថោន៖