ហ៊ុន សែន៖ នាយករដ្ឋមន្ត្រីជប៉ុនហៅ ហ៊ុន ម៉ាណែត ជាអ្នកដឹកនាំ«បន្តវេន»
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី២២ កក្កដា ២០១៦
- កែប្រែចុងក្រោយ: July 22, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
តើនាយករដ្ឋមន្ត្រីជប៉ុន លោក ស៊ីនហ្សូ អាប៊េ (Shinzo Abe) ហៅលោក ហ៊ុន ម៉ាណែត កូនប្រុសច្បង របស់នាយករដ្ឋមន្ត្រីកម្ពុជា ថាយ៉ាងដូចម្ដេច? បើតាមឪពុករបស់លោក ដែលបានថ្លែងស្រង់សំដីរបស់លោក អាប៊េ មកបញ្ជាក់ បានឲ្យដឹងថា លោក ហ៊ុន ម៉ាណែត ជា«អ្នកដឹកនាំបន្តវេនវ័យក្មេង»។
លោក ហ៊ុន សែន បានថ្លែងដូច្នេះ នៅក្នុងពិធីសម្ពោធគម្រោង ពង្រីកប្រព័ន្ធផ្គត់ផ្គង់ទឹកស្អាត ដែលគាំទ្រហិរញ្ញវត្ថុ ដោយរដ្ឋាភិបាលជប៉ុន កាលពីថ្ងៃព្រហស្បតិ៍ម្សិលម៉ិញ។ លោកនាយករដ្ឋមន្ត្រីកម្ពុជា បានស្រង់សំដីរបស់នាយករដ្ឋមន្ត្រីជប៉ុន មកប្រកាសជាសាធារណៈថា លោក ស៊ីនហ្សូ អាប៊េ បានអញ្ជើញលោក ហ៊ុន ម៉ាណែត ឲ្យទៅធ្វើទស្សនកិច្ចនៅក្នុងប្រទេសជប៉ុន ក្នុងនាមជា«អ្នកដឹកនាំបន្តវេន ជំនាន់ក្រោយ»។
បុរសខ្លាំងរបស់កម្ពុជា ដែលមិនសូវជាភ្លេច ក្នុងការលើកមកនិយាយ ពីគ្រួសាររបស់លោក ជារៀងរាល់ការថ្លែងជាសាធារណៈនោះ បានមានប្រសាសន៍ដូច្នេះថា៖ «នៅពេលដែលជួបគ្នាដំបូងណ្នឹង គាត់បានអញ្ជើញ ថាសុំអញ្ជើញលោក ហ៊ុន ម៉ាណែត កូនប្រុសរបស់ខ្ញុំករុណាខ្ញុំនេះ។ គាត់ប្រើពាក្យអញ្ចេះ ដែលខ្ញុំករុណាខ្ញុំ មិនហ៊ានប្រើជាមួយនឹង តាមរយៈហ្វេសប៊ុកទេ គាត់ប្រើពាក្យថា សូមអញ្ជើញលោក ហ៊ុន ម៉ាណែត ដែលជាអ្នកដឹកនាំបន្តវេនវ័យក្មេង (ទៅធ្វើ)ទស្សនកិច្ច នៅប្រទេសជប៉ុន។»។
គេពិបាកនឹងតាមស្វែងរកផ្ទៀងផ្ទាត់ ថាតើប្រសាសន៍របស់លោក ហ៊ុន សែន ជាសំដីពិតដែលថ្លែងចេញ ពីបបូរមាត់របស់នាយករដ្ឋមន្ត្រីជប៉ុន ឬយ៉ាងណាឡើយ ដោយហេតុថា ការអញ្ជើញនេះទំនងជាធ្វើឡើង ដោយសារតែការរាប់អាន ជាលក្ខណៈឯកជន ឬជាការរាប់អានផ្ទាល់ខ្លួន រវាងនាយករដ្ឋមន្ត្រីទាំងពីរប៉ុណ្ណោះ។ នេះ បើគេអាចដឹងបាន តាមរយៈនាយករដ្ឋមន្ត្រីកម្ពុជា នៅក្នុងការប្រកាសដដែលនោះ។
លោក ហ៊ុន សែន បានថ្លែងបន្តថា៖ «នេះ បង្ហាញពីទំនាក់ទំនង មិនគ្រាន់តែរវាងរដ្ឋនិងរដ្ឋទេ ក៏ប៉ុន្តែក៏បានបង្ហាញ ពីទំនាក់ទំនងផ្ទាល់ រវាងខ្ញុំព្រះករុណាខ្ញុំ ជាមួយនឹងនាយករដ្ឋមន្ត្រីជប៉ុន អាប៊េ ផងដែរ»។
ការថ្លែងរបស់លោក ហ៊ុន សែន បានបង្កចម្ងល់សម្រាប់អ្នកវិភាគ និងអ្នកតាមដានស្ថានការណ៍នយោបាយ នៃប្រទេសកម្ពុជា ដោយបានហៅការអញ្ជើញនោះ ថាដូចជាមានលក្ខណៈ «ឯកជនជ្រុល» និង«លំអៀង» ខណៈពេលដែលប្រទេសកម្ពុជា មានមន្ត្រីចាស់ៗសក់ស្កូវ ជាច្រើនរយពាន់នាក់ផ្សេងទៀត មិនដែលទទួលបានឱកាសដូច្នេះឡើយ។ លោក ព្រហ្ម គិត អតីតមន្ត្រីច្បាប់កម្ពុជា បានលើកឡើងដូច្នេះ ប្រាប់ទស្សនាវដ្ដីមនោរម្យ.អាំងហ្វូ ថា លោក ហ៊ុន ម៉ាណែត មានសំណាងទទួលឱកាសនេះ បានខ្លាំងជាងគេ ព្រោះលោកជាកូនប្រុសច្បង របស់លោក ហ៊ុន សែន ហើយពាក្យសំដីលោក ហ៊ុន សែន ខ្លួនឯងជាអ្នកបញ្ជាក់ស្រាប់។
មន្ត្រីច្បាប់ខ្មែរ ដែលបានចូលនិវត្តន៍រូបនេះ បានបញ្ជាក់ទៀតថា បើទោះជាលោក ហ៊ុន សែន អះអាងថា លោកមិន«ហ៊ានហៅ»កូនលោកដូច្នេះក៏ដោយ តែការហៅលោក ហ៊ុន ម៉ាណែត ថាជា«អ្នកដឹកនាំបន្តវេនវ័យក្មេង»ប៉ុន្មានម៉ាត់នេះ ហាក់ត្រូវបាននាយករដ្ឋមន្ត្រីកម្ពុជា ពេញចិត្តពេញថ្លើមណាស់ រហូតយកមកថ្លែងប្រកាស ជាសាធារណៈ ឬអាចនិយាយថា លោក ស៊ីនហ្សូ អាប៊េ ដូចជាចង់ទម្លាយចេញ នូវពាក្យដែលលាក់ទុកក្នុងចិត្ត របស់លោក ហ៊ុន សែន។
លោក ព្រហ្ម គិត បានថ្លែងឡើងថា៖ «នៅខ្វះតែមួយម៉ាត់ទៀត លោក ហ៊ុន សែន អាចនឹងញញឹមបិតមាត់មិនជិតជាងនេះ។ នោះ គឺលោក អាប៊េ គួរហៅលោក ហ៊ុន ម៉ាណែត ថាជា"មេដឹកនាំបន្តត្រកូលវ័យក្មេង" ពីលោក ហ៊ុន សែន"»។
សម្រាប់អ្នកស្រី សូហ្វី ប៊័សូរ ឌុយរ៉ូឆេ (Sophie Boisseau du Rocher) អ្នកស្រាវជ្រាវមួយរូប របស់វិទ្យាស្ថានបារាំងផ្នែកទំនាក់ទំនងអន្តរជាតិ និងជាអ្នកជំនាញទាក់ទងនឹងតំបន់អាស៊ីអាគ្នេយ៍ ធ្លាប់ត្រូវបានវិទ្យុបារាំងអន្តរជាតិ «RFI» ដកស្រង់សំដីមកបញ្ជាក់ថា លោក ហ៊ុន សែន កំពុងបង្កើតឲ្យមាន នូវការបន្តស្នងត្រកូលនយោបាយផ្ទាល់ខ្លួន ពីឪពុកទៅកូន (ជាឧទាហរណ៍ ដូចប្រទេសកូរ៉េខាងជើងសព្វថ្ងៃ) ដោយបានដាក់កូនប្រុសទាំងបីរបស់លោក ឲ្យកាន់តំណែងសំខាន់ៗ នៅក្នុងកងទ័ព នគរបាល និងនៅក្នុងគណបក្សប្រជាជនកម្ពុជា ដែលកំពុងកាន់អំណាច។
អ្នកស្រី បានថ្លែងឲ្យដឹងថា៖ «គេអាចបារម្ភពីល្បិចកិច្ចកលថ្មីទៀត របស់លោក ហ៊ុន សែន ដែលគួរឲ្យស្ដាយ វាមិនត្រឹមតែជាល្បិចកិច្ចកលនោះទេ តែជាយុទ្ធសាស្ត្រនយោបាយរបស់លោក ហ៊ុន សែន ដើម្បីបង្កើតឲ្យមាន នូវការស្នងត្រកូលនយោបាយមួយ តាមបែបផ្ដាច់ការ ដើម្បីបន្តកាន់អំណាច នៅកម្ពុជា»៕
-------
» ការថ្លែងទាំងស្រុង របស់លោក ហ៊ុន សែន៖