បាតុកម្ម​ខ្មែរ​នៅ​អ៊ឺរ៉ុប​​នា​​មុខ​សភា​អ៊ឺរ៉ុប​ថ្ងៃ​សៅរ៍​នេះ ដើម្បី​ដោះលែង​អ្នក​ទោស​មនសិការ

បាតុកម្មរបស់បណ្ដាជន ដែលមានដើមកំណើតខ្មែរ និងដែលកំពុង​រស់នៅ​អ៊ឺរ៉ុបខាងលិច នឹងធ្វើបាតុកម្ម​ជាថ្មី​ទៀត លើក​នេះ​នៅ​មុខ​អាគាររបស់សភាអ៊ឺរ៉ុប។ តំណាងមួយ​រូប ពី​ក្រុម​អ្នករៀបចំ​កម្មវិធី​នេះ បានថ្លែងប្រាប់​ទស្សនាវដ្ដី​មនោរម្យ.អាំងហ្វូ​ថា បាតុកម្ម​របស់ក្រុមលោក ធ្វើឡើងដើម្បីស្នើឲ្យសហគមន៍អ៊ឺរ៉ុប ជួយ​ឈឺឆ្អាល នឹង​បញ្ហា​​រំលោភ​​សិទ្ធិ​មនុស្ស និងជំរុញឲ្យ​មាន​ការ​គោរព​ច្បាប់ ដោយស្មើភាព​នៅក្នុងប្រទេសកម្ពុជា។
បាតុកម្ម​ខ្មែរ​នៅ​អ៊ឺរ៉ុប​​នា​​មុខ​សភា​អ៊ឺរ៉ុប​ថ្ងៃ​សៅរ៍​នេះ ដើម្បី​ដោះលែង​អ្នក​ទោស​មនសិការ
ប័ណ្ឌផ្សាយបាតុកម្ម ដែលត្រូវបានផ្សព្វផ្សាយ នៅតាមបណ្ដាញអ៊ិនធើណែត និងជាពិសេស នៅតាមបណ្ដាញសង្គម។
Loading...
  • ដោយ: ដ. កែវ អត្ថបទ - យកការណ៍៖ ដ. កែវ ([email protected]) - ប៉ារីស ថ្ងៃទី២៤ មិថុនា ២០១៦
  • កែប្រែចុងក្រោយ: June 25, 2016
  • ប្រធានបទ: នយោបាយ-កម្ពុជា
  • អត្ថបទ: មានបញ្ហា?
  • មតិ-យោបល់

ចលនាទាមទារ ពីសំណាក់ខ្មែរនៅឯនាយសមុទ្រ ឲ្យមានការខ្វាយខ្វល់ ពីព្រឹត្តិការណ៍ចុងក្រោយ ជា​ពិសេស​ពី​ការ​ចាប់​ចង់​នានា នៅក្នុងប្រទេសកម្ពុជា កំពុងបន្តសកម្មភាព របស់ពួកគេតទៅទៀត។ បន្ទាប់ពីបាតុកម្ម ដែល​បាន​ធ្វើ​នៅមុខ​អាគារ​​អង្គការសហប្រជាជាតិ នាទីក្រុងហ្សឺណែវ ប្រទេសស្វីស កាលពីដើមខែ​មិថុនា​កន្លង​ទៅ​នោះ នៅថ្ងៃសៅរ៍នេះ បណ្ដាជន​ដែលមានដើមកំណើតខ្មែរ និងដែលកំពុងរស់នៅក្នុងទ្វីបអ៊ឺរ៉ុប ច្រើនសិប​នាក់ នឹង​ធ្វើការ​ជួបជុំ​គ្នា​ដើម្បី​ធ្វើ​បាតុកម្ម​ជា​ថ្មី​ទៀត នៅមុខអាគារសភានៃសហគមន៍​អ៊ឺរ៉ុប ក្នុងរាជធានី​ប្រ៊ុយសែល នៃ​រាជា​ណាចក្រ​​ប៊ែលហ្សិក។

» អានអត្ថបទដែលទាក់ទង៖ ខ្មែរ​នៅ​អ៊ឺរ៉ុប ធ្វើ​បាតុកម្ម​នៅ​មុខ​អាគារ អ.ស.ប ក្នុង​ប្រទេស​ស្វីស

ការបង្ហោះផ្សាយ ពីរូបភាពស្ដីពីបាតុកម្មនេះ (រូបខាងលើ) ត្រូវបានបង្ហោះ​ចែកចាយ​នៅពាសពេញ បណ្ដាញ​អ៊ិនធើណែត និងនៅតាមបណ្ដាញសង្គម ហើយ​ដែលគេអាចអានបាន នូវចំណងជើងធំៗ ថាជាបាតុកម្ម​«ដោះ​លែង​អ្នក​ទោសមនសិការ»។ ការជួបជុំគ្នាធ្វើបាតុកម្ម បានគ្រោងថានឹងប្រព្រឹត្តិទៅ នៅវេលាម៉ោង១២ថ្ងៃត្រង់ រហូត​ទៅ​ដល់​ម៉ោង​១៥រសៀល ម៉ោងក្នុងប្រទេសប៊ែលហ្សិក (ដែលត្រូវនឹងម៉ោង១៧ ដល់ម៉ោង២០ ម៉ោង​នៅ​ក្នុង​​ប្រទេស​​កម្ពុជា) នៅកណ្ដាលរាជធានី ប្រ៊ុយសែល តែម្ដង។

តំណាងមួយរូប នៃក្រុមអ្នករៀបចំបាតុកម្ម លោក សួន ណារិទ្ធិ បានថ្លែងប្រាប់ទស្សនាវដ្ដីមនោរម្យ.អាំងហ្វូ កាល​ពីថ្ងៃម្សិលម៉ិញថា បើទោះជាអាជ្ញាធរនៃប្រទេសប៊ែលហ្សិក មិនបានកំណត់​ចំនួន​មនុស្ស​ចូលរួម​បាតុកម្ម​ក៏​ដោយ តែ​លោក​សង្ឃឹម​ពីចំនួនអ្នកចូលរួម នឹងមានរវាងពី២០០ ទៅដល់៣០០នាក់។ លោកបាន​អះអាង​ទៀត​ថា ក្រុមរបស់លោកមិនមែនជាផ្នែកមួយ នៃចលនានយោបាយណាឡើយ តែជាការផ្ដួចផ្ដើមរួមគ្នា រវាង​បណ្ដា​ជន​​ដែល​មាន​ដើម​កំណើតខ្មែរ និងដែលមានចិត្តឈឺឆ្អាល ទៅដល់មាតុភូមិជាទីស្នេហាររបស់ពួកគេ និងអាច​មាន​ការ​ចូលរួម មកពីគ្រប់និន្នាការនយោបាយ។

លោក ណារិទ្ធិ បានថ្លែងបន្តថា បាតុកម្មនេះគ្មានបំណង ទាមទារឲ្យទម្លាក់រដ្ឋាភិបាលកម្ពុជា ឬទម្លាក់លោក ហ៊ុន សែន ពីអំណាចអ្វីទេ តែជាការទាមទាររកយុត្តិធម៌ ជូនជនជាប់ឃុំ (ទាំងមានទោស និងមិនទាន់​មាន​ទោស) និងជននៅក្រៅឃុំ ចំនួន២៩នាក់ ដែលត្រូវបានអង្គការ​ការពារសិទ្ធិមនុស្ស​ក្នុងស្រុក ឈ្មោះ លីកាដូ ចុះបញ្ជីថា ជាអ្នកទោសនយោបាយ។

» អានអត្ថបទដែលទាក់ទង៖ អង្គការ​សិទ្ធិ​មនុស្ស ថា​កម្ពុជា​មាន​អ្នក​ទោស​នយោបាយ​២៩នាក់

» ទស្សនាវដ្ដីនឹងធ្វើការចុះផ្សាយ នូវកិច្ចសម្ភាសទាំងស្រុង ជាមួយ​លោក សួន ណារិទ្ធិ នៅក្នុងអត្ថបទ​លើក​ក្រោយ។

បាតុកម្ម «ដោះលែងអ្នកទោសមនសិការ» នឹងបន្ថែមតួលេខថ្មីទៀត ទៅក្នុងបញ្ជីនៃ​ចំនួន​បាតុកម្ម​ជា​ច្រើន និង​ជា​បន្តបន្ទាប់ របស់បណ្ដាជនខ្មែរនៅក្រៅស្រុក ដែលត្រូវបានរៀបចំធ្វើឡើង នាពេលកន្លងមក ក្នុងទ្វីប​អាមេរិក​ខាង​ជើង និងទ្វីបអ៊ឺរ៉ុប។ ជាពិសេស បាតុកម្មនៅមុខសភាអ៊ឺរ៉ុបនេះ បានធ្វើឡើងប្រមាណជា២សប្ដាហ៍ ក្រោយ​ការ​សម្រេច នូវ«ដំណោះស្រាយ»មួយ ពីសំណាក់សភាអ៊ឺរ៉ុប ដើម្បីស្នើសុំឲ្យមានឃ្លាំមើល និងបង្កើតលក្ខខណ្ឌ ទៅលើជំនួយ​របស់ខ្លួន សម្រាប់ប្រទេសកម្ពុជា។

» អានអត្ថបទដែលទាក់ទង៖ សភា​អ៊ឺរ៉ុប​ស្នើ​ឲ្យ​ចាត់​វិធាន​ការ​ឃ្លាំ​មើល​ជំនួយ EU សម្រាប់​កម្ពុជា

ប៉ុន្តែការលើកឡើង របស់ក្រុមអ្នកតំណាងរាស្ត្រ របស់សភាអ៊ឺរ៉ុបខាងលើ ត្រូវបានលោក ផៃ ស៊ីផាន អ្នកនាំ​ពាក្យ​​ទីស្ដីការ​គណៈរដ្ឋមន្ត្រី នៃរដ្ឋាភិបាលកម្ពុជា ច្រានចោល និងបរិហារពី«ភាពអាម៉ាស»មួយ ដែល​ក្រុម​តំណាង​រាស្ត្រអ៊ឺរ៉ុបទាំងនោះ បង្គាប់ឲ្យកម្ពុជា ដែលជាប្រទេស​អធិបតេយ្យមួយ បោះបង់ភាពជានីតិរដ្ឋ បោះបង់​តុលាការ ឲ្យ​ទៅ​គោរព​បុគ្គលជា​ទី​សក្ការៈ ដែលមិនស្ថិត​នៅក្នុងរង្វង់ច្បាប់។ លោក ផៃ ស៊ីផាន បានពន្យល់ តាម​រយៈ​ទំព័រ​ហ្វេសប៊ុក​របស់លោកថា ការលើកឡើង របស់ក្រុមសមាជិកសភាអ៊ឺរុប ​បាន​ធ្វើ​ឡើងក្រោមការភូតភរ បោកប្រាស របស់គណបក្សប្រឆាំងនៅកម្ពុជា ជាពិសេសលោក សម រង្ស៊ី ផ្ទាល់តែម្ដង។

ចំពោះការធ្វើបាតុកម្មជាបន្តបន្ទាប់ របស់បណ្ដាជនខ្មែរនៅឯនាយសមុទ្រ ក៏ធ្លាប់​ត្រូវបានលោក ផៃ ស៊ីផាន បញ្ជាក់​​ដែរ​​ថា នឹងមិនមានឥទ្ធិពល ឬទម្ងន់អ្វី ដល់រដ្ឋាភិបាលកម្ពុជាឡើយ។ អ្នកនាំពាក្យរូបនេះ បានអះអាងថា នោះ​​​គ្រាន់​​ជា​​​សិទ្ធិ​​សម្ដែង​​មតិ របស់ពលរដ្ឋខ្មែរនៅបរទេស ដែលមានចំនួនតិចតួច​ប៉ុណ្ណោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...