សុខភាព៖ ជាកុសលល្អ ដែលវេជ្ជសាស្ត្រក្នុងសម័យនេះ អនុញ្ញាតអោយនាយ អាចពាក់ធ្មេញសិប្បនិមិត្តបាន។

យុវជន វីល្លៀម កេណេវែល និងធ្មេញសិប្បនិមិត្តរបស់នាយ។

ទើបតែមានអាយុ ២៥ឆ្នាំប៉ុណ្ណោះ តែយុវជនកម្លាំងពេញម្នាក់នេះ អស់ធ្មេញពីមាត់រលីងទៅហើយ។ វីល្លៀម កេណេវែល (William Kennewell) ជនជាតិអូស្ត្រាលី ធ្លាប់បានផឹកទឹកសូដា ពី៦ទៅ៨លីត្រក្នុងមួយថ្ងៃ ក្នុងរយះពេល៣ឆ្នាំ ហើយបាន​ធ្វើអោយនាយជ្រុះធ្មេញអស់ ដោយដាក់ជំនួសនៅថ្ងៃនេះ នូវធ្មេញសិប្បនិមិត្តវិញ។ នេះជាការអោយដឹងរបស់ សារព័ត៌មាន​ប្រចាំថ្ងៃ អាឌឺឡេដ ណាវ (Adelaide Now)។

«រឿងនេះចាប់ផ្ដើម នៅពេលដែលខ្ញុំមិនចូលចិត្តផឹកទឹកសោះ ហើយខណៈខ្ញុំធ្វើការនៅភោជនីយដ្ឋាន ខ្ញុំងាយនឹងរកបាន នូវភេសជ្ជះកូកាកូឡា មកផឹក» នេះជាការរំលឹកឡើងវិញ ពីការចាប់ផ្ដើមជីវិត«ឯករាជ្យ»ដំបូងរបស់ យុវជននេះ និងបាន​និយាយអោយដឹងថា ខ្លួនបានធ្វើមិនដឹងមិនលឺពីដំបូន្មាន ដែលផ្ដល់ដោយទន្ដពេទ្យរបស់ខ្លួន។ «ធម្មតា មនុស្សម្នាក់ ត្រូវ​មានធ្មេញ៣២ តែខ្ញុំមាននៅសល់១៣ធ្មេញទៀតប៉ុណ្ណោះ ដែលត្រូវដកចេញទៀត នៅពេលក្រោយបន្តិចមក។» វិល្លៀម បានបន្ថែម។ លើសពីការបាត់បង់ធ្មេញរបស់យុវជន ការទទួលទានច្រើនជ្រុល នៃភេសជ្ជះមានជាតិសូដាផ្អែម បានបង្ក​អោយមានបញ្ហា ទៅលើដំណើររត់ក្នុងឈាម និងបេះដូងរបស់នាយថែមទៀត។

ទោះជាយ៉ាងណាក៏ដោយ វិល្លៀម កេណេវែល បានបញ្ជាក់ថា ក្នុងពេលបច្ចុប្បន្ន នាយមានអារម្មណ៍ល្អប្រសើរ ជាមួយនឹង​ធ្មេញសិប្បនិមិត្តនេះច្រើនជាង។

ដំណើរផ្សងព្រេងក្នុងជីវិត ជាមួយនឹងធ្មេញធម្មជាតិរបស់យុវជន ត្រូវបានបិតបញ្ចប់ តែក៏បានពញាក់អាជ្ញាធរមានសមត្ថកិច្ច ផ្នែកសុខភាពរបស់ប្រទេសដែរ អោយចាត់វិធានការដើម្បីរំលឹកទៅដល់ អ្នកទទួលទានសូដា ដែល​មានវ័យក្មេង​ទាំង​ឡាយ​ផ្សេង​ទៀត។ ការសិក្សាវិភាគមួយ របស់មជ្ឈមណ្ឌលស្រាវជ្រាវអូស្ត្រាលី ផ្នែកសុខភាព បានបង្ហាញថា៥៦% នៃ​បណ្ដាជន​វ័យក្មេងអូស្ត្រាលី ១៦៨០០នាក់ អាយុពី៥ដល់១៦ឆ្នាំ ទទួលទានសូដា (ទឹកផ្លែឈើ) ដែលមាន រសជាតិផ្អែម យ៉ាងហោច​មួយដបក្នុងថ្ងៃ។ ស្ថាប័ននេះបានសំនូមពរអោយ ដាក់សញ្ញាសម្គាល់នៅលើសំបកដប ដើម្បី​និយាយរំលឹកពី​គ្រោះថ្នាក់​ដល់​សុខភាព បន្ទាប់ពីបានទទួលទានភេសជ្ជះទាំងនេះរួច ជាពិសេសទៅលើធ្មេញ៕

--------------------------------------------------
ដោយ៖ ឈូករ័ត្ន - ប៉ារីស ថ្ងៃទី ០៩ ខែកម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ