កូរ៉េ​ខាង​ជើង​បាញ់​កាំជ្រួច​រយៈ​ខ្លី​មួយទៀត រំលង​លើ​សមុទ្រ​ជប៉ុន

កាំជ្រួចមួយគ្រាប់ របស់ប្រទេសកូរ៉េខាងជើង បានហោះរំលង​ពីលើសមុទ្រជប៉ុន នៅថ្ងៃអង្គារនេះ នៅក្នុង​ចំងាយ​ប្រមាណជា ២០០គីឡូម៉ែត្រ។
កូរ៉េ​ខាង​ជើង​បាញ់​កាំជ្រួច​រយៈ​ខ្លី​មួយទៀត រំលង​លើ​សមុទ្រ​ជប៉ុន
លោក គិម ជុងអ៊ុន (ខាងស្ដាំបំផុត) និងក្រុមឧត្ដមសេនីយ៍ របស់ប្រទេសកូរ៉េខាងជើង។ (រូបថតឯកសារ)
Loading...
  • ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី២៩ មីនា ២០១៦
  • កែប្រែចុងក្រោយ: March 29, 2016
  • ប្រធានបទ: វិបត្តិកូរ៉េ
  • អត្ថបទ: មានបញ្ហា?
  • មតិ-យោបល់

ប្រទេសកូរ៉េខាងជើង បានបាញ់សារជាថ្មី នូវកាំជ្រួចមួយគ្រាប់ទៀត កាលពីព្រឹកថ្ងៃអង្គារនេះ។ កាំជ្រួច ដែល​ទំនងជាប្រភេទ​កាំជ្រួចរយៈខ្លីនេះ ​បាន​ផ្ទុះ នៅក្នុងលំហរសមុទ្រខាងកើត របស់ឧបទ្វីបកូរ៉េ ឬហៅថា សមុទ្រ​ជប៉ុន។ នេះបើតាមការអះអាង របស់​កងទ័ព​របស់ប្រទេសកូរ៉េខាងត្បូង នៅរសៀល​ថ្ងៃអង្គារដដែល។ ការ​បង្ហាញ​សាច់ដុំម្ដងទៀតនេះ បានធ្វើឡើង នៅក្នុង​ពេល​ដែល​ភាព​តានតឹង នៅក្នុងតំបន់ បានកើន​ឡើង​ដល់​កំពូល។

អគ្គមេបញ្ជាការកងទ័ពកូរ៉េខាងត្បូង បានអះអាង នៅក្នុងសេចក្ដីប្រកាសព័ត៌មានមួយថា៖ «គ្រាប់បាញ់ផ្លោង ដែលជាកាំជ្រួចរយៈខ្លី ត្រូវបានបាញ់ចេញ នៅម៉ោង ៥និង៤០នាទី ព្រឹក នៅក្បែរក្រុង វុនសាន ភាគខាងកើត នៃ​ទឹកដី​កូរ៉េខាងជើង។ កាំជ្រួចត្រូវបានបាញ់ សម្រាប់ចំងាយ ២០០គីឡូម៉ែត្រ។ (...) យើងបាន​តាមដាន​ស្ថានការណ៍ យ៉ាងដិតដល់ ហើយ​យើង​បានត្រៀមខ្លួនគ្រប់ពេល ដើម្បីប្រឈមនឹងព្រឹត្តិការណ៍ ជាយថាហេតុ​ណា​មួយ។»

ការសាកល្បងនុយក្លេអ៊ែរលើកទីបួន...

កម្ដៅនៅលើឧបទ្វីបកូរ៉េ មិនបានចុះថមថយទេ រាប់ចាប់តាំងពីការសាកល្បងគ្រាប់បែក នុយក្លេអ៊ែរ លើក​ទី​បួន របស់ប្រទេសកុម្មុយនីស កូរ៉េខាងជើង នៅដើមខែមករានោះមក។ បន្ថែមពីលើ ការសាកល្បង​អាវុធ​នុយក្លេអ៊ែរ​ខាងលើ របបក្រុងព្យុងយ៉ាង បានបាញ់កាំជ្រួចមួយទៀត កាលពី​ថ្ងៃ​ទី៧ ខែកុម្ភៈកន្លងមកនេះ។ កាំជ្រួចថ្មីនេះ ត្រូវ​បាន​អ្នក​តាមដានព្រឹត្តិការណ៍ ចាត់​ទុក​ថា នោះ​ជា​កាំជ្រួចរយៈឆ្ងាយ បំពាក់​ដោយ​គ្រាប់បែក។

សកម្មភាពទាំងនេះ បានជំរុញឲ្យក្រុមប្រឹក្សាសន្តិសុខ របស់អង្គការសហប្រជាជាតិ ធ្វើការឆ្លើយតប កាល​ពី​ដើមខែមីនា កន្លងមក ដោយបាន​ដាក់ទណ្ឌកម្មធ្ងន់ធ្ងរ បន្ថែមពីលើទណ្ឌកម្ម ដែលធ្លាប់ដាក់ពីមុន ទៅលើរបប​កុម្មុយនីសក្រុងព្យុងយ៉ាង។

សមយុទ្ធរួម...

ភាពតានតឹង បានកើនឡើងដល់កំពូល ក្នុងរយៈពេលចុងក្រោយនេះ ជាពិសេស នៅក្រោយពេល ដែល​ប្រទេស​សម្ព័ន្ធមិត្តទាំងពីរ កូរ៉េខាងត្បូង និងអាមេរិក បាន​ធ្វើសមយុទ្ធយោធា​ប្រចាំឆ្នាំ​រួមគ្នា​មួយ នៅពាក់​កណ្ដាល​ខែមីនា។នៅចំពោះ​សមយុទ្ធ​រួមគ្នានេះ របបក្រុងព្យុងយ៉ាង តែងធ្វើការឆ្លើយតប ដោយ​ការ​បាញ់​កាំជ្រួច​ជាច្រើនដង និងថែម​ទាំងគម្រាម ពី​ការ​ប្រើប្រាស់​ការវាយប្រហារ ដោយគ្រាប់បែក​នុយក្លេអ៊ែរ​នោះ​ផង។

ដូចជាកាលពីថ្ងៃទី២១ ខែមីនាកន្លងមក ក្រុងព្យុងយ៉ាង បានធ្វើការបាញ់កាំជ្រួចរយៈខ្លី ចំនួនប្រាំគ្រាប់ រំលង​ពី​លើសមុទ្រជប៉ុន។ នៅមុននេះបីថ្ងៃ គឺនៅថ្ងៃទី១៨ ខែមីនា របបកុម្មុយនីស បានបាញ់កាំជ្រួចរយៈមធ្យម ដែល​មាន​បំពាក់ដោយគ្រាប់បែក ចំនួនពីរគ្រាប់ផ្សេងទៀត។ សកម្មភាពទាំងនេះ ត្រូវបានចាត់ទុកថា ជាការ​បង្ក​រឿង និង​​បាន​​ធ្វើ​ឲ្យ​សន្តិសុខតំបន់ កាន់តែធ្លាក់ចុះដុនដាបឡើង ជាពិសេសនៅពេលដែលគេដឹងថា កាំជ្រួច​ទាំង​នោះ សុទ្ធ​តែ​អាច​បាញ់​ដល់​ប្រទេសជប៉ុន៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...