លោក ប៊ិន បាចារិន (Ben Bajarin) ជាអ្នកវិភាគផ្នែកទីផ្សារ និងបច្ចេកវិទ្យា នៅស៊ីលីខន វ៉ាឡេ (Silicon Valley - ទីក្រុងក្នុង​រដ្ឋកាលីហ្វ័រនីញ៉ា សហរដ្ឋអាមេរិក) បានផ្សាយអត្ថបទមួយ ស្ដីពីការផ្លាស់ប្ដូរពីប្រព័ន្ធកំព្យូទ័រ មកជាក្ដាបញ្ជានេះ នៅលើ​ទស្សនាវដ្ដីថែម៍ (Time) របស់អង់គ្លេស ហើយលោកបានបង្ហាញពីសុទិដ្ឋិនិយមយ៉ាងខ្លាំង ពីរាល់ការផ្លាស់ប្តូរទាំងនេះ។ មនោរម្យព័ងអាំងហ្វូ សូមដកស្រង់ការវិភាគរបស់លោក មកជម្រាបជូនដូចតទៅ។

បច្ចេកវិទ្យា នៃ«ក្ដាបញ្ជា» សម្រាប់ប៉ះបញ្ជាលើតុ ដែលធ្វើអោយមនុស្សអាចប្រើប្រាស់ ជាកិច្ចប្រជុំ នៅជុំវិញវា។

បើយើងក្រឡេកទៅមើលឧស្សាហកម្មកុំព្យូទ័រ លោកប៊ិន អាចចង្អុលបង្ហាញពីការផ្លាស់ប្តូរច្រើនរាប់មិនអស់ ហើយការ​ផ្លាស់ប្តូរទាំងនោះ វាជាគំរូរដែលធ្វើឲ្យយើងមានថ្ងៃនេះ។ ទោះបីជាយ៉ាងណាក៏ដោយ ភាគច្រើននៃការផ្លាស់ប្តូរនោះ យើងអាចដឹងថាមានការវិវត្តន៍ ច្រើនជាងបដិវត្តន៍ ហើយមិនត្រូវបានគេរកឃើញថា មានការឆាឆៅ ឬបង្អាក់ណាមួយទេ រហូតដល់ពេលឥឡូវ។ ឧស្សាហកម្មកុំព្យូទ័រ កំពុងតែប្រតិបត្តិតាម ពេលវេលាមួយ ក្នុងចំណោមពេលសំខាន់ៗទាំងអស់ នៃការផ្លាស់ប្តូរ ដែលយើងធ្លាប់បានឃើញ។

របាយការណ៍នៃឧស្សាហកម្មកុំព្យូទ័រ

ជារៀងរាល់ឆ្នាំ ឧស្សាហកម្មកុំព្យូទ័រ ដែលយើងអាចបែងចែកជាផ្នែកៗ ដោយរាប់បញ្ចូលទាំង កុំព្យូទ័រលើតុ (desktop) និងកុំព្យូទ័រយួរដៃ (notebook) មានការកើនឡើង ក្នុងការលក់ដាច់យ៉ាងខ្លាំង នៅជុំវិញពិភពលោក ។ វាបានកើនឡើង នៅគ្រប់ទីកន្លែងពី ៥ទៅ១២% ក្នុងកំឡុងពេល៥ឆ្នាំចុង ក្រោយនេះ ហើយជារៀងរាល់ថ្ងៃ វាកើនឡើង៣០%នៃឆ្នាំនីមួយៗ។ លោកប៊ិនគិតថា មនុស្សភាគច្រើនជឿថា ថ្ងៃណាមួយមនុស្សទាំងអស់ នៅលើពិភពលោក នឹងធ្វើជាម្ចាស់នៃកុំព្យូទ័រ​ទាំង​អស់នេះ។ បើយោងទៅតាមស្ថិតិកន្លងមក ឧស្សាហកម្មកុំព្យូទ័រ កំពុងតែមានការកើនឡើង ក្នុងការលក់ដាច់ពី ៣៨០លាន ទៅ៤០០លានគ្រឿង នៅទូទាំងពិភពលោក សំរាប់ពីរឆ្នាំនេះ។ ការជោគជ័យនេះ ជាគុណប្រយោជន៏របស់ កុំព្យូទ័រយួរដៃ (តំលៃទាប និងមានភាពងាយស្រួលក្នុងការបំលាស់ទី)។ ជាពិសេសទៅទៀត ការមកដល់នៃ កុំព្យូទ័រយួរដៃទំហំតូច (Netbook) ក៏មានការលក់ដាច់ច្រើនដែរ រហូតប្រមាណជា ៣០លានគ្រឿង នៅលើទីផ្សារ។

បន្ទាប់ពីអាយផេដ (iPad) បានបង្ហាញខ្លួន

ការមកដល់ដំបូងនៃ«ក្ដាបញ្ជាអាយផេដ» កាលពីពីរឆ្នាំមុន បានធ្វើឲ្យមានការធ្លាក់ចុះនៅថ្ងៃនេះ នៃកំណើនរបស់ក្រុមហ៊ុន​ផលិតកុំព្យូទ័រ។ ឆ្នាំមុន ការលក់កុំព្យូទ័រលើតុ និងកុំព្យូទ័រយួរដៃមានការថយចុះពី ៥ទៅ៧ភាគរយ ប៉ុន្តែប្រហែលជាមួយ​ភាគបួន នៃផលិតផលទាំងនោះ នៅមានចំនុចល្អ និងពិសេសរបស់វា។ បើយោងទៅតាមការស្ទង់មើល វិស្សមកាលឆ្នាំ ២០១២ ការលក់ចេញរបស់កុំព្យូទ័រ មានការថយចុះច្រើន ជាង ១០% នៅទូទាំងពិភពលោក។ ទាំងនេះជាលទ្ធផល ដែល​មិនល្អប្រសើរទេ សំរាប់ឆ្នាំ២០១៣ ដូចដែលក្រុមវិភាគជាច្រើន បានធ្វើការព្យាករណ៏ទុកថា ឧស្សាកម្មកុំព្យូទ័រ នឹងជួបបញ្ហា​អវិជ្ជមានម្តងទៀត។

មូលហេតុដែល«ក្ដាបញ្ជា» អាចធ្វើឲ្យកុំព្យូទ័រវិនាស

«ក្ដាបញ្ជា» មានភាពសាមញ្ញ នឹងមានរូបរាង្គស្តើង។ «ក្ដាបញ្ជា»អាចប្រតិបត្តិការអ្វីៗជាច្រើន ដែលកុំព្យូទ័រពុំមានដូច។ ទំរង់ មុខងាររបស់វា មានភាពគ្រប់គ្រាន់ ដែលបំរើឲ្យតំរូវការទីផ្សារការងារធំទូលាយ។ លោក ស្ទិវ ចប (Steve Jobs) ធ្លាប់បាន​និយាយថា វាល្អបំផុត ក្នុងការដាក់ឲ្យដំណើរការ នៃក្ដាបញ្ជាអាយផេដ ព្រោះ «វាមានភាពស្និទ្ធស្នាល ហើយមានសមត្ថភាព​ជាងទូស័ព្ទ»។

ជឿឬមិនជឿ វាជាអ្វី ដែលទីផ្សារត្រូវការ។ ជាការពិតហើយ ដែលយើងធ្លាប់បានស្គាល់កុំព្យូទ័រ ទាំងកុំព្យូទ័រយួរដៃ ឬ​កុំព្យូទ័រ​លើតុ ថាធ្លាប់បានទទួលបានជោគជ័យ យ៉ាងធំធេង។ ប៉ុន្តែ តាំងពីពេល«ក្ដាបញ្ជា» ចេញមកនៅលើទីផ្សារ គេបានឃើញវា ថាមានលក្ខណះសាមញ្ញ ក្នុងការប្រើប្រាស់ ហើយត្រូវសមល្មម នឹងតំរូវការទីផ្សារក្នុងពេលបច្ចុប្បន្ន។

អតិថិជនជាច្រើន ដែលយើងធ្វើការសង្កេត និងសិក្សារស្រាវជ្រាវបានប្រាប់យើងថា «អាយផេដ» បានក្លាយជាគោលដៅ​របស់ពួកគេ ហើយគ្រប់ផ្នែកទាំងអស់នៃ«អាយផេដ» ដែលពួកគេប្រើប្រាស់ជាការងារប្រចាំថ្ងៃ គឺវាដូចអ្វី ដែលមាននៅ​ក្នុង​កុំព្យូទ័រដែរ ដូចជាការបើកវែបសាយ ការត្រួតពិនិត្យសារអេឡិចត្រូនិច និងការប្រើប្រាស់សំខាន់ផ្សេងៗ ដូចយ៉ាងបណ្ដាញ​សង្គមហ្វេសបុក (Facebook) ជាដើម។  អតិថិជនរាប់រយលាននាក់ បានការលើកឡើង ពីអ្វីដែលពួកគេត្រូវការ​ច្រើន​ឡើងៗនៅក្នុង«ក្ដាបញ្ជា» ហើយផ្ទុយទៅនឹងការប្រើប្រាស់កុំព្យូទ័រ ដែលកាន់តែតិចទៅៗ។

តែទោះជាយ៉ាងណាក៏ដោយ ក៏កុំព្យូទ័រនឹងមិនបាត់បង់រូបរាងទេ គ្រាន់តែកំព្យូទ័រ ត្រូវជ្រើសរើសផ្លូវដើរផ្សេងប៉ុណ្ណោះ។ មនុស្សភាគច្រើន អាចនឹងមិនចាំបាច់ តែក៏មានមួយចំនួនធំទៀតនៅចាំបាច់នៅឡើយ សម្រាប់ការងារប្រចាំថ្ងៃរបស់ពួកគេ ក្នុងការប្រើប្រាស់កំព្យូទ័រ។ ពិតណាស់ថា មានមួយចំណែកនៃទីផ្សារ ដែលនៅតែត្រូវការកុំព្យូទ័រ សំរាប់ធ្វើការងារ។

តែសម្រាប់អតិថិជនជាទូទៅ «ក្ដាបញ្ជា» បានកើនឡើងយ៉ាងឆាប់រហ័ស ហើយក៏មានតួនាទីច្រើន និងទំនាក់ទំនង​យ៉ាង​ជិតស្និតជាមួយអ្នកប្រើប្រាស់វា ដែលឈានជើងបន្តិចម្ដង ដើរចេញពី«កុំព្យូទ័រ» បើទោះជាការផ្លាស់ប្ដូរនេះ មិនកើតឡើង ក្នុងអនាគតខ្លីខាងមុខក៏ដោយ។

ដូច្នេះតើយើងគួរសង្ឃឹមអ្វី ក្រៅពីនេះ?

នេះមិនមានន័យថាកុំព្យូទ័រ នឹងត្រូវបាត់បង់នោះទេ។ យើងក៏បានដឹងផងដែរថា អ្នកផលិតបានបន្ថែម នូវអ្វីដែលថ្មី និង​មុខងារមួយចំនួនទៀត នៅក្នុងពេលកន្លងមកនេះ។ ក្រុមហ៊ុនជាច្រើន កំពុងតែខិតខំទាក់ទាញ ការយកចិត្តទុកដាក់​ទៅ​លើកំព្យូទ័រវិញ  ដោយគេបានបង្កើតរូបរាងកុំព្យូទ័រទាំងនោះ ឲ្យស្រដៀងទៅនឹង រូបរាង្គរបស់«ក្ដាបញ្ជា»ដែរ។ វាជាការ​បង្កើតឱកាស និងបន្ថែមការប្រកួតប្រជែង ប៉ុន្តែអ្នកផលិតកុំព្យូទ័រ គួរតែគិតពីអ្វីដែលថ្មី សម្រាប់ផលិតផលរបស់ពួកគេ។

លោកប៊ិន មិនគិតថា ពួកអ្នកផលិតកំព្យូទ័រ មានលទ្ធភាពគ្រប់គ្រាន់ ក្នុងការធ្វើឲ្យមានការកើនឡើង នៃទីផ្សាររបស់​កុំព្យូទ័រទេ។ ណាមួយទៀត មនុស្សជាច្រើន ប្រើកុំព្យូទ័រក្នុងរយះ ពេលមួយដ៏វែង ដែលជាហេតុធ្វើអោយ ក្រុមហ៊ុនកុំព្យូទ័រ​មិនសូវមានចំណូល ដោយលក់ដាច់នូវផលិតផលរបស់ខ្លួនឡើយ។ ផ្ទុយមកវិញ តំរូវការនៃ«ក្ដាបញ្ជា» នឹងមានការកើន​ឡើង ដោយសារតែមានអតិថិជន ជាវញឹកញាប់ជាង។

អ្វីដែលយើងត្រូវសង្ឃឹមក្រៅពីនេះ ជាពិភពមួយ ក្នុងអនាគតកាល ដែលមាន«អេក្រង់»កាន់តែច្រើន។ សម័យកាល​របស់​កុំព្យូទ័រ វាមានអេក្រង់ត្រឹមតែមួយប៉ុណ្ណោះ។ ក្នុងពេលបច្ចុប្បន្ន និងទៅអនាគត ប្រហែលជាតម្រូវការច្រើនរបស់អតិថិជន អាចនឹងមាន«អេក្រង់ចំនួន ២, ៣ ឬ៤» នៅក្នុងការរស់នៅរាល់ថ្ងៃរបស់គេ ហើយពួកគេចង់ប្រើប្រាស់អេក្រង់ទាំងនេះ ដើម្បី​ជាដំណោះស្រាយ តាមបែបបច្ចេកវិទ្យាដោយឡែកៗពីគ្នា៕

...............................................................................
ដោយ៖ វិន ជីវ័ន្ត - ភ្នំពេញ ថ្ងៃទី០៦ ខែកុម្ភះ ឆ្នាំ២០១៣
ប្រភព៖ time.com
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ