ពិធីសម្ពោធគម្រោងការពារទឹកជំនន់ និងកែលម្អប្រព័ន្ធលូក្រុងភ្នំពេញ លោក ហ៊ុន សែន បានថ្លែងថា ជន​ដៃ​ដល់​បី​នាក់ ប្រើហិង្សាវាយតំណាងរាស្រ្ត អំឡុងពេលមានបាតុកម្ម តវ៉ាទម្លាក់លោក កឹម សុខា ពី​អនុប្រធាន​ទី១​នៃ​រដ្ឋសភា កាលពីថ្ងៃទី២៦ ខែតុលានោះ មិនមែនជា «ក្រុមបាតុករ» ទេ។

ស្ថិតក្នុងភាពស្រពិចស្រពិល លោក ហ៊ុន សែន បានលើកឡើងថា ការប្រើហិង្សាលើតំណាងរាស្រ្តនោះ មិន​មែន​ប្រព្រឹត្ត​ដោយ​បាតុករ នៃបាតុកម្មរសុំឲ្យទម្លាក់ លោក កឹម សុខា នោះទេ។ ហើយអ្នកវាយ​តំណាងរាស្រ្ត​នោះ ក៏​លោក​បាន​«ឭ»​ថា ដោយសារតែតំណាងរាស្រ្ត«ជេរ» ទៅលើអ្នកវាយទាំងនោះឯង។

ជាមួយនឹងការលើកឡើង របស់លោកនាយករដ្ឋមន្រ្តីនេះ តំណាងរាស្រ្ តដែលរងរបួសទាំងពីរ លោក ញ៉យ ចំរើន និងលោក គង់ សភា បានធ្វើការបដិសេធថា លោកមិនបានជេរ ទៅលើក្រុមបាតុករទាំងនោះឡើយ។ តាម​ការអះអាង ក្នុងបណ្តាញសង្គមហ្វេសប៊ូក តំណាងរាស្រ្តទាំងពីររូប បានបបួលលោកនាយករដ្ឋមន្រ្តី ហ៊ុន សែន «ស្បថ» បើលោកហ៊ុនសែនហ៊ានធានា និងអះអាងថា ពួកលោកពិតជាបានជេរមែននោះ។

ពាក់ព័ន្ធនឹងការការពារបាតុករ គាំទ្រគណបក្សប្រជាជន របស់លោកនាយករដ្ឋមន្រ្តី ហ៊ុន សែន ដែលបាន​លើកឡើងថា ក្រុមជនដៃដល់វាយតំណាងរាស្រ្តនោះ មិនមែនជាក្រុមបាតុករនោះ អ្នកស្រី មួរ សុខហួរ តំណាង​រាស្ត្រ​មកពីគណបក្សសង្គ្រោះជាតិ បានសរសេរក្នុងទំព័រហ្វេសប៊ុកអ្នកស្រី ដោយ​បង្ហាញ​នូវ​រូបថត​មួយ​ចំនួន ដែល​បាន​បញ្ជាក់ថា ក្រុមដៃដល់នោះ មានវត្តមានក្នុងក្រុមហ្វូងបាតុកម្ម។ អ្នកស្រីបាន​សរសេរ​អម​នឹង​រូបថតទាំងនោះថា៖ «រូបភាពនេះ គឺបញ្ជក់ថា ជនដៃដល់ដែលវាយតំណាងរាស្រ្តនោះ ជាបាតុករដែល​ចូលរួម​បាតុកម្ម​ទំលាប់លោក កឹម សុខា។ ហើយវាធ្វើឡើង ជាលក្ខណៈប្រព័ន្ធ។»

អ្នកស្រី សុខហួរ បានអះអាងបន្ថែមថា ជនដៃដល់ ដែលវាយតំណាងរាស្រ្ត មកពីគណបក្សប្រឆាំង មិនមែន​មានតែបីនាក់ទេ។ ហើយអ្នកស្រីស្នើសុំ ឲ្យធ្វើការស៊ើបអង្កេត និងតាមចាប់ជនដៃដល់ទាំងអស់ ជាមួយ​នឹង​ការ​ស្វែងរកអ្នកណា ដែលនៅពីក្រោយនៃរឿងនេះ។

ក្រោយព្រឹត្តការណ៍បង្កហិង្ សាលើតំណាងរាស្រ្ត ក៏ដូចជាក្រោយពីជនដៃដល់បីនាក់ បានចូលមក​សារភាព​នោះ មេបក្សប្រឆាំងនៅតែស្នើឲ្យរដ្ឋាភិបាល និងអាជ្ញាធរមានសមត្ថកិច្ច បន្តស្វែងរកជនដៃដល់ មួយចំនួន​ទៀត និងអ្នកដែលបញ្ជាពីក្រោយ។ ជាមួយនឹងការស្នើនេះ លោកនាយករដ្ឋមន្រ្តី ហ៊ុន សែន មិនបាន​ឆ្លើយ​ពី​លទ្ធផល ឬបញ្ជាជាថ្មី ឲ្យអាជ្ញាធរមានសមត្ថកិច្ចពង្រឹងការស្វែងរក បន្ថែមទៀត។ តែលោក ហ៊ុន សែន បាន​ព្រមាន​ទៅកាន់គណបក្សប្រឆាំងវិញ តាមរយៈហិង្សា ដែលបានកើតឡើង កាលពីដើមឆ្នាំ២០១៤ និងមាន​គណបក្សសង្គ្រោះជាតិ នៅពីក្រោយ ធ្វើការតវ៉ាប្រឆាំងនឹងអាជ្ញាធរមានសមត្ថកិច្ ចនៅលើបណ្តោយផ្លូវ​វ៉េង​ស្រេង តំបន់ឧស្សាហកម្មកាណាឌីយ៉ា។ លោកនាយករដ្ឋមន្រ្តី បានអះអាងថា ករណីអំពើហិង្សានៅផ្លូវ​វ៉េងស្រេង ក្នុងពេលបាតុកម្មទាមទារ ឲ្យដំឡើងប្រាក់ខែកម្មករ កាលពីដើមឆ្នាំ២០១៤នោះ នៅមិន​ទាន់​ចប់​នៅ​ឡើយ។

ការអះអាងខាងលើនេះ ត្រូវបានលោក មឿង តុលា មន្ត្រីកម្មវិធីច្បាប់ នៃមជ្ឈមណ្ឌលអប់រំច្បាប់ សម្រាប់​សហគមន៍ សរសេរតប ក្នុងន័យបញ្ឆិតបញ្ឆៀង នៅលើគណនីហ្វេសប៊ុករបស់លោក យ៉ាងខ្លីវិញថា៖ «មាន​រឿង​អីទាន់ចប់ បើអ្នកបាញ់កម្មករ មិនទាន់ត្រូវដាក់ទោសផងណឹង។ រួមជាមួយអ្នកបញ្ជា ពីក្រោយផង។»

យ៉ាងណាលោក ហ៊ុន សែន នាយករដ្ឋមន្រ្តីទទួលស្គាល់ថា បាតុកម្មតវ៉ាទម្លាក់លោក កឹម សុខា ពីអនុប្រធាន​ទីមួយនៃរដ្ឋសភា នោះពិតជាមានការរៀបចំទុកជាមុន និងក៏ជាការឆ្លើយតប ទៅនឹងបាតុកម្មនៅ​រដ្ឋធានី​ប៉ារីស និងក្រុងញូវយ៉ក ដែលលោកបានគិតថា គឺគណបក្សសង្រ្គោះជាតិ ជាអ្នករៀបចំដែរនោះ។ លោក​បញ្ជាក់​ថា៖ «បាតុកម្មមួយ បើមិនរៀបចំម៉េចធ្វើទៅកើត និយាយឲ្យវាច្បាស់ចឹងទៅ។ វាមានមេ មានកើយ​របស់​គេ ស្អីស្រាវជ្រាវរកអ្នកណារៀបចំ។ វាច្បាស់ណាស់ថា មានការរៀបចំ... អីក៏ខ្វល់ម្លេះ កាលលោកឯង​ធ្វើ​បាតុកម្ម ជាអ្នករៀបចំតើ។ (...) បើគ្មានភ្លើង ក៏គ្មានផ្សែងដែរ បើគ្មានបាតុកម្មនៅញូវយ៉ក និងនៅប៉ារីស ក៏គ្មាន​បាតុកម្មនៅភ្នំពេញដែរ។»៕