បណ្ដាជនប្រមាណជា ៨០ម្ម៉ឺននាក់ (តួលេខផ្ដល់ដោយអ្នករៀបចំ) មកពីគ្រប់ទិសទីក្នុងប្រទេសបារាំង បានមកប្រជុំគ្នា​នៅ​កណ្ដាលទីក្រុងប៉ារីស ដើម្បីច្រានចោលនូវគម្រោងច្បាប់ដែលនឹងអនុញ្ញាតអោយ អ្នកស្រឡាញ់ភេទដូចគ្នា​អាច​រៀបការ​បាន។ ជាគម្រោងច្បាប់ដែល ប្រធានាធិបតីលោក ហ្វ្រង់ស៊័រ ហូឡង់ ធ្លាប់សន្យា ក្នុងពេលលោកធ្វើយុទ្ធនាការ​ឃោសនារក​សម្លេងឆ្នោត។ នៅចំពោះមុខការទាមទារនៃបាតុកម្មនេះ លោកប្រធានាធិបតិ និងរដ្ឋាភិបាល ទំនងជាមិនរាថយឡើយ។

អ្នកតំណាងរាស្ត្រ ឬអ្នកនយោបាយ... ឈរនៅជួរមុខនៃបាតុកម្ម ដែលបានប្រមូលផ្ដុំគ្នានៅលើសួនជាប់ទួរអេហ្វ៊ែល។

ពីក្នុងចំណោមហ្វូងបាតុករ គេលឺសម្រែកយ៉ាងទ្រហឹងអឺងកង យ៉ាងដូច្នេះថា «ហ្វ្រង់ស៊័រ ៗ ! ច្បាប់របស់អ្នក យើងមិន​ចង់ បានទេ»។

តាមការអោយដឹងរបស់ អ្នករៀបចំបាតុកម្មនេះ បណ្ដាជនប្រមាណជា ៨០ម្ម៉ឺននាក់ បានចុះដើរនៅតាមដងផ្លូវ​កាលពីថ្ងៃ​អាទិត្យទី១៣មករានេះ ក្នុងទីក្រុងប៉ារីស ដើម្បីប្រឆាំងនឹងគម្រោងច្បាប់ ដែលនឹងអនុញ្ញាតអោយអ្នក​ស្រឡាញ់ភេទ​ដូច​គ្នារៀបការ នៅចំពោះមុខច្បាប់។ ច្បាប់នោះមានឈ្មោះថា​ «អាពាហ៍ពីពាហ៍ សម្រាប់គ្រប់រូប»។ ក្បួនដែលបានរៀបចំ មកពីបួនកន្លែងផ្សេងគ្នា នឹងដើរកាត់តាមដងផ្លូវនានា ក្នុងរដ្ឋធានីនៃប្រទេសបារាំង ឆ្ពោះទៅកាន់វាលសួនច្បារមួយ ដែល​លាតសន្ធឹងពីជើងទួរអេហ្វ៊ែល (Tour Eiffel) ឈ្មោះហៅថា ឆមឌឺម៉ាស (Champ-de-Mars)។

ពីខាងអាជ្ញាធរវិញ បានផ្ដល់តួរលេខ ថាមានបណ្ដាជនតែ៣៤ម្ម៉ឺននាក់ប៉ុណ្ណោះ ដែលបានមកចូលរួមក្នុង បុព្វហេតុទាម ទារនេះ។ ប៉ុន្តែទោះជាមានតួលេខខុសគ្នា យ៉ាងដូចម្ដេចក៏ដោយ ក៏វិមានប្រធានាធិបតីអេលីហ្សេ (Élysée) បានទទួល​ស្គាល់ថា សន្ទុះនៃការប្រឆាំងនឹងគម្រោងច្បាប់នេះ មានកម្លាំងខ្លាំង និងរឹងមាំជាងពេលធ្វើបាតុកម្ម ក្នុង​បុព្វហេតុដូចគ្នា​នេះ កាលពីថ្ងៃ៧វិច្ឆិកាមុន។ ទីប្រឹក្សាម្នាក់ នៃវិមានប្រធានាធិបតីបាននិយាយថា បាតុកម្មនេះនឹងមិន​​អាច​ធ្វើអោយ«ផ្លាស់​ប្ដូរ» នូវគោលបំណងរបស់រដ្ឋាភិបាល ដើម្បីស្នើអោយមានការជជែកវែកញែកមួយ នៅក្នុងរដ្ឋសភា ហើយ​ឈានទៅ​អនុម័ត្រ​ច្បាប់នេះនោះទេ។

អ្នកនាំពាក្យរដ្ឋាភិបាលបារាំង ដែលចេញពីគណបក្សសង្គមនិយម (ហៅកាត់ថា PS - មានចរន្តឆ្វេងនិយម) លោកស្រី ណាចាត វ៉ាឡូដ ប៊េលកាសេម (Najat Vallaud-Belkacem) បានសរសេរលើទំព័រទ្វីសធើររបស់លោកស្រីថា «រដ្ឋាភិបាល នឹងគោរព​ពាក្យ​សន្យារបស់ខ្លួន នៅចំពោះមុខប្រជាជនបារាំង»។ ក្នុងន័យនេះ ទំនងជាលោកស្រីចង់សំដៅទៅរក ពាក្យ​សន្យារបស់ប្រធានាធិបតីបារាំង លោកហ្វ្រង់ស៊័រ ហូឡង់ (François Hollande) ក្នុងអំឡុងពេលលោកធ្វើយុទ្ធនាការ ស្វែង​រកសម្លេង​ឆ្នោតជ្រើសរើសប្រធានាធិបតីកាលពីប៉ុន្មានខែមុន។

ដោយឡែកលោកស្រីម៉ារីន ឡឺពេន (Marine Le Pen) ប្រធានគណបក្សរណសិរ្យជាតិបារាំង ដែលមាននិន្នាការ​ស្ដាំនិយម​ជ្រុលនោះ បានបដិសេធមិនបានអំពាវនាវ អោយមកចូលរួមក្នុងបាតុកម្មនេះទេ។ លោកស្រីបានពន្យល់ថា «ដោយសារ​បាតុកម្មនេះ មានការស្វែងរកផលប្រយោជន៍នយោបាយ» ពីសំណាក់គណបក្សស្ដាំនិយម អ៊ុយអឹមប៉េ (UMP) ដែល​មាន​លោក ហ្សង់ ហ្វ្រង់ស៊័រ កូប៉េ (Jean-François Copé) ជាប្រធាននោះ។

ខាងអ្នកគាំទ្រអោយមាន «អាពាហ៍ពីពាហ៍ សម្រាប់គ្រប់រូប»វិញ ជាពិសេសក្រុមអ្នកស្រឡាញ់ភេទដូចគ្នា នៅថ្ងៃអាទិត្យ​នេះ​បានព្យាយាមជួបជុំគ្នាដែរ តែត្រូវបានកម្លាំងមានសមត្ថកិច្ចបំបែក។ ពួកគេមានសង្ឃឹមយ៉ាងមុតមាំថា «ច្បាប់នេះនឹង​ត្រូវ​រដ្ឋសភាអនុម័ត្រ»។ សមាជិកម្នាក់ពីក្នុងចំណោមនោះបានថ្លែងថា «នៅពេលខ្ញុំលឺ សភាពហឹង្សាចេញពីក្រុមបាតុករ​ប្រឆាំងនឹងយើងនៅថ្ងៃនេះ ខ្ញុំគ្រាន់តែមានអារម្មណ៍ថា គួរអោយសោកសៅណាស់ សម្រាប់ប្រទេសរបស់ខ្ញុំ។»

សូមបញ្ជាក់ថា អត្ថបទច្បាប់ដែលជាប់រឿងចម្រូងចម្រាស នឹងត្រូវរដ្ឋាភិបាលគ្រោងដាក់ទៅអោយរដ្ឋសភាជាតិ​ពិនិត្យ​ នៅ​ថ្ងៃ ២៩មករាខាងមុខ។

ក្រុមអ្នកប្រឆាំងនឹងគម្រោងច្បាប់នេះ សង្ឃឹមពីច្រកចេញមួយ ជាមួយរដ្ឋាភិបាល ហើយថាបាតុកម្ម ដែលពួកគេបានធ្វើ នៅថ្ងៃអាទិត្យនេះ វាជាឱកាសចុងក្រោយគេបង្អស់ សម្រាប់ពួកគេ ក្នុងការទាមទារអោយមាន នូវ«ស្ថាប័នរដ្ឋ​សម្រាប់​គ្រួសារ»មួយ នៅមុនអត្ថបទច្បាប់នេះ ទៅដល់រដ្ឋសភាជាតិ។ នៅក្នុងពេលធ្វើបាតុកម្ម អ្នកនាំពាក្យរបស់​ក្រុម​បាតុករ និង​ក្រុមអ្នកប្រឆាំង បានប្ដេជ្ញាចិត្តថា នឹងរក្សាការដាក់គម្នាបទៅលើរដ្ឋាភិបាល រហូតដល់ទីបញ្ចប់។  តែមើលទៅ គេ​ពិបាកនឹង​ជឿខ្លាំងណាស់ ថាពួកអ្នកប្រឆាំងទាំងនេះ នឹងទទួលបាន នូវអ្វីដែលពួកគេបានតវ៉ា៕

------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៣ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ