នៅក្នុងប្រតិបត្តិការសឹក នៅក្នុងប្រទេសម៉ាលី ការជួបប្រយុទ្ធគ្នា បានបង្កអោយមានកងទ័ពស្លាប់ជាច្រើននាក់ ជាពិសេស​​កងកម្លាំងបះបោរនៅក្នុងប្រទេសនេះ បើគិតមក​ទល់​នឹងយប់ថ្ងៃសៅរ៍ទី១២មករា។ ប្រទេសបារាំងបានបញ្ជាក់ តាម​រយះ​ប្រមុខរដ្ឋរបស់ខ្លួនថា បារាំងមិនមានបំណង​អ្វីផ្សេង ក្រៅតែពីប្រយុទ្ធប្រឆាំងទល់នឹងភេវរកម្មឡើយ។

លោកប្រធានាធិបតីបារាំង ហ្វ្រង់ស៊័រ ហូឡង់ ថ្លែងការណ៍នៅវិមានប្រធានាធិបតី ល្ងាចថ្ងៃទី១២មករា។
រូបថត Philippe Wojazer / Reuters / NTB scanpix ។

ប្រធានាធិបតីបារាំង លោកហ្វ្រង់ស៊័រ ហូឡង់ (François Hollande) បានចេញមកបកស្រាយ នៅក្រោយបន្ទាប់ពីកិច្ចប្រជុំ នៃក្រុម​ប្រឹក្សាការពារជាតិ ស្ដីអំពីប្រតិបត្តិការសឹកនៅក្នុងប្រទេសម៉ាលី (ទ្វីបអាហ្វ្រិកកណ្ដាល) នៅល្ងាចថ្ងៃសៅរ៍ទី១២​មករានេះ។ ប្រមុខរដ្ឋរូបនេះបាននិយាយជាអាថ៌ថា «ដោយសារសេចក្ដីក្លាហាននៃយុទ្ធជនរបស់យើង ការសំពងមួយទៅ​លើ​ពួក​ភេវរជនបានទទួលផ្លែផ្កា និងមានការបាត់បង់ដ៏ធំធេងនៅខាងសត្រូវ។ (...) ប៉ុន្តែបេសកកម្មរបស់យើង នៅ​មិនទាន់​បានបញ្ចប់នៅឡើយ។ ខ្ញុំបានពិនិត្យជាប់ជានិច្ច ក្នុងការពង្រឹងនូវគ្រប់មធ្យោបាយយោធា ជុំវិញរដ្ឋធានីបាម៉ាកូ (Bamako) ដើម្បីការពារជនរួមជាតិរបស់យើង។»

លោកហូឡង់ក៏បានសម្ដែងនូវគាវរកិច្ចផងដែរ នូវយុទ្ធជនអ្នកបើកបរឧទ្ធម្ភាគចក្រមួយរូប ដែលបានពលីជីវិតក្នុង​ពេល​ជួបប្រយុទ្ធនោះ ជាមួយនឹងពាក្យមួយឃ្លាថា «បារាំងមិនមានបំណងអ្វីផ្សេង ក្រៅពីប្រយុទ្ធប្រឆាំងនឹងភេវរកម្មឡើយ»។ នៅរសៀលថ្ងៃសៅរ៍កន្លងមកនេះ ក្រុមប្រឹក្សាការពារជាតិបារាំង បានកោះប្រមូលមន្ត្រីសំខាន់ៗ មកប្រជុំជាបន្ទាន់មួយ នៅវិមានប្រធានាធិបតីអេលីហ្សេរ (Elysées) ក្នុងវត្តមាននោះមាន ​រដ្ឋមន្ត្រីការពារជាតិបារាំង លោកហ្សង់-អ៊ីវ ឡឺឌ្រីអាន (Jean-Yves Le Drian) រដ្ឋមន្ត្រីក្រសួងការបរទេស លោក ឡូរ៉ង់ ហ្វាប៊ីយូស (Laurent Fabius) រដ្ឋមន្ត្រីក្រសួងមហាផ្ទៃ លោកមានុយអ៊ែល វ៉ាល់ (Manuel Valls) មេបញ្ជាការកងទ័ពបារាំង លោកអែឌូអារ ហ្គីយោ (Édouard Guillaud) និងអ្នក​ទទួលខុសត្រូវសន្តិសុខជាតិបារាំង មួយចំនួនទៀត។

វិធានការពង្រឹងសន្តិសុខបន្ថែមទៀត

ទាក់ទងនឹងការវាយប្រយុទ្ធ នៅក្នុងប្រទេសសូម៉ាលី លោកប្រធានាធិតបី បានចូលរួមរំលែកការឈឺចាប់ នៃគ្រួសារ​យុទ្ធជនពលី និងចំណាប់ខ្មាំងដែលបានស្លាប់ ក្នុងពេលដែលបារាំងបើកការវាយលុកមួយ ដោយក្រុមកុម្ម៉ង់ដូពិសេស ដើម្បីរំដោះចំណាប់ខ្មាំងនេះ ក្នុងយប់ថ្ងៃសុក្រមុននេះ។ «ខ្ញុំបានសម្រេចចិត្តតាំងពីប៉ុន្មានថ្ងៃមកហើយ ដើម្បីបើកការ​វាយលុកមួយ សំដៅរំដោះអោយបានជនជាតិបារាំង ដែលជាប់ជាចំណាប់ខ្មាំង តាំងពី៣ឆ្នាំកន្លះកន្លងមក នៅក្នុង​ស្ថានភាពដ៏អាក្រក់នោះ។ យុទ្ធនាការនេះ មិនបានសម្រេចដល់គោលដៅទេ បើទោះជាមានការពលីជីវិត នៃទាហាន​យើងពីររូប។ ហើយចំណាប់ខ្មាំង ក៏ទំនងជាត្រូវបានគេសម្លាប់ដែរ។ ផ្ទុយមកវិញ យុទ្ធនាការនេះ បានបញ្ជាក់ពីភាព​ដាច់ណាត់របស់ប្រទេសបារាំង មិនអោយធ្លាក់ក្នុងការគម្រាម របស់ក្រុមភេវរជនឡើយ។»

ក្នុងប្រទេសបារាំងឯណេះវិញ លោកហ្វ្រង់ស៊័រ ហូឡង់បានប្រកាសអោយដឹង ពីការស្នើសុំរបស់លោក ទៅនាយករដ្ឋមន្ត្រី​លោក ហ្សង់-ម៉ាក អារ៉ូល្ត៍ (Jean-Marc Ayrault) នូវវិធានការពង្រឹងសន្តិសុខ ដល់«កម្រិតពណ៌ក្រហម» នៅក្នុងរយះ​ពេលដ៏ឆាប់ៗនេះ ។ អាគាររដ្ឋការសំខាន់ៗ និងមធ្យោបាយដឹកជញ្ជូនសាធារណៈទាំងឡាយ នឹងត្រូវដាក់ក្រោមការឃ្លាំ​មើលយ៉ាងដឹតដល់ និងតឹតរឹងជាងមុន។

លោកប្រមុខរដ្ឋបារាំងរូបនេះ បានសម្ដែងការសាទរទៅដល់ ការព្រមព្រៀងនយោបាយ មកពីគ្រប់ភាគីនិន្នាការគណបក្ស​ទាំងអស់ នៅជុំវិញកិច្ចអន្តរាគមន៍យោធា នៅប្រទេសម៉ាលី។ «នៅក្នុងស្ថានភាពនេះ ការបង្រួបបង្រួម នៃប្រជាជាតិបារាំង ជាកម្លាំងមួយបន្ថែមទៀត សម្រាប់យកជ័យជំនះនៅក្នុងយុទ្ធនាការរបស់យើង»។

សូមបញ្ជាក់ថា តាមការស្នើសុំរបស់ប្រធានាធិបតីនៃប្រទេសម៉ាលី លោក ឌីយ៉ុងគូនដា ត្រាអូរ៉េ (Dioncounda Traoré) ប្រទេសបារាំងតាមរយះប្រធានាធិបតីរបស់ខ្លួន បានធ្វើការឆ្លើយតបជាវិជ្ជមាន កាលពីថ្ងៃសុក្រទី១១មករា ក្នុងការជួយ​កងទ័ពប្រទេសម៉ាលី ប្រយុទ្ធប្រឆាំងទល់នឹង ក្រុមបះបោរនិយមអ៊ីស្លាម ដែលមានប្រភពនៅផ្នែកខាងជើងនៃប្រទេស។ សម្រាប់បស្ចឹមលោក និងរដ្ឋាភិបាលប្រទេសម៉ាលី  ក្រុមបះបោរនេះជាពួក«ភេវរជន»។ បន្តិចម្ដងៗ រហូតមកទល់បច្ចុប្បន្ន ក្រុមអ្នកបះបោរនេះ បានវាយដណ្ដើម មកកាន់កាប់ នូវទឹកដីធំជាង៥០% នៃប្រទេសម៉ាលី ដែលធ្លាប់ជាអតីតទឹកដី គ្រប់គ្រងដោយប្រទេសបារាំង៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៣ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ