ហេតុការណ៍បានកើតឡើង នៅវេលាយប់រំលងអាធ្រាត ថ្ងៃទី០២ ចូលមកថ្ងៃទី០៣ ខែកញ្ញានេះ ក្នុងភូមិ​ទួលគោក សង្កាត់ទួលសង្កែរ ខណ្ឌឬស្សីកែវ រាជធានីភ្នំពេញ។ បុរសម្នាក់ ឈ្មោះ ប៉ុន ថន អាយុ២៦ឆ្នាំ និង​មាន​ស្រុក​កំណើត នៅខេត្តកំពង់ចាម បានសម្រេចចិត្តបញ្ចប់ជីវិតខ្លួនឯង បន្ទាប់ពីមានទំនាស់ ជាមួយភរិយា​ខ្លួន​បន្តិចបន្តួច។

ស្រ្តីជាប្រពន្ធ អ្នកស្រី សែម ថេង ដែលធ្វើការជាមួយប្ដី ជាកម្មករផលិតជីធម្មជាតិដូចគ្នានោះ បានប្រាប់​ទស្សនាវដ្តី​មនោរម្យ.អាំងហ្វូថា ដំបូងឡើយប្តីអ្នកស្រី និងក្រុមកម្មករផ្សេងទៀត ប្រមាណ៣នាក់ កំពុងស៊ី​ផឹក​នៅក្នុងរោងចក្រ ជិតកន្លែងស្នាក់នៅ ព្រោះជាថ្ងៃបើកប្រាក់ខែ។ ក្រោយពីផឹកស៊ីបន្តិចបន្តួចនេះ នាងជាប្រពន្ធ បានមកតាមប្តី នៅកំឡុងម៉ោងប្រមាណ ជា២៤យប់  ឱ្យចូលសម្រាក ព្រោះយប់ជ្រៅហើយ។ អ្នកស្រី បាន​និយាយ​ថា៖ «ឈប់ផឹកស្រា ល្មមចូលដេក ហើយបង»។

ក្រោយពីប្រពន្ធមកហៅ លោក ប៉ុន ថន មិនបានទៅ ជាមួយប្រពន្ធភ្លាមៗទេ។ ស្ត្រីជាភរិយា បានបញ្ជាក់​ទៀត​ថា៖ «ផឹកអស់មួយកែវ(រួច) បានគាត់ឡើងទៅគេងជាមួយខ្ញុំ» ហើយនៅមុនពេលចូលគេង អ្នកស្រីថា ប្តី​អ្នក​ស្រី​មានរឿងអ្វីមិនដឹង ចង់និយាយជាមួយ តែអ្នកស្រីតបថា៖ «ដេកសិនទៅ ចាំភ្ញាក់ពីដេកចាំសួរទៀត»។

តែនៅពេលម៉ោងប្រមាណ ប្រមាណជា ០០និង៣០នាទី រំលងអាធ្រាត លោក ប៉ុន ថន បានងើបចេញទៅ​ណា​មិនដឹង ហើយអ្នកស្រីបានសង្ស័យថា ស្វាមីនៅខាងក្រៅ រួចក៏បានឡើង ចេញទៅតាម ដើម្បីបត់ជើងតូច​ផង។ ប៉ុន្តែអ្នកស្រីមិនបានឃើញលោក ប់ុន ថន នោះទេ។ អ្នកស្រីបានជួប នឹងអ្នកគ្រប់គ្រងកម្មករម្នាក់ នៅទីនោះ​ភ្លាមៗ ហើបានសួរថា៖ «ពូមានឃើញប្តីខ្ញុំទេ»?

អ្នកគ្រប់គ្រងកម្មករ លោក ស្រាញ់ ឡេង ឆ្លើយភ្លាម ទាំងមិនទាន់ស្វាងពីដំណេក ថាមិនឃើញទេ។ អ្នកទាំងពីរ បានដើររកបុរស ប៉ុន ថន ទាំងយប់ រហូតដល់ម៉ោង១ និង៣០ នាទី ព្រឹកព្រហាមថ្ងៃទី០៣ ខែកញ្ញា ទើប​ពួកគេ​បានប្រទះឃើញ សាកសពបុរសនេះ នៅចងកសម្លាប់ខ្លូន នៅរោងផលិតខាងក្រោយ។ ស្រ្តីជាប្រពន្ធ​តក់​ស្លុត​ជាខ្លាំង ស្រែកទ្រហ៊ោយំ ឱ្យអ្នកជិតខាងជួយ។ បន្ទាប់ពីមានការភ្ញាក់ផ្អើលនេះ ក្រុកម្មករបានជួយ​ដោះសាក​សព លើកមកដាក់លើគ្រែ។

អ្នកស្រី សែម ថេង ដែលមានកូនពីរ ជាមួយលោក ប៉ុន ថន បានរៀបរាប់ទាំងចិត្តក្តុកក្តួល ក្នុងពេលភ្លាមៗ​នោះ​ថា នាងនៅមិនទាន់សម្រេច យកសាកសពស្វាមីទៅធ្វើបុណ្យ នៅស្រុកកំណើត ឬទុកធ្វើបុណ្យ នៅនឹង​រាជធានី​ភ្នំពេញឡើយ ដោយរងចាំ ក្រុមគ្រួសារឪពុកម្តាយ មកជុំដើម្បីពិភាក្សារ។ យ៉ាងណាក៏ដោយ លោក ស្រាញ់ ឡេង ជាអ្នកគ្រប់គ្រងក្រុមកម្មករនៅទីនោះ បានបញ្ជាក់ថា ក្រុមហ៊ុននៅតែបន្តផ្ដល់ការងារ ឲ្យ​ស្រ្តី​ជា​ប្រពន្ធកូនពីរនេះដដែល បើនាងសម្រេចចិត្តបន្ត។ រីឯក្រុមហ៊ុនវិញ បានជួយសម្រួលថវិកាមួយចំនួន សម្រាប់​ពិធីបុណ្យនេះ៕