អ្នកដំណើរជាច្រើន ដែលបានឃើញ ឡានស្ទូចមួយគ្រឿង ដឹកឡានពីរគ្រឿងពីលើគ្នានោះ បានបង្ហាញការ​ព្រួយ​បារម្ភជាខ្លាំង ដល់សុវត្តិភាពពួកគាត់ ជាអ្នកធ្វើដំណើរស្របផ្លូវជាមួយគ្នា ដោយនិយាយថា ពួកគាត់អាច​ប្រឈម នឹងហានិភ័យខ្ពស់ រហូតដល់អាយុជីវិត ប្រសិនជារថយន្ដ ដែលនៅលើឡានស្ទូច របូតធ្លាក់ចុះ។ រថយន្ដស្ទូច ដែល​បើកដឹកឡានពីគ្រឿង បន្ថែមពីលើនោះ មានស្លាកលេខ ភ្នំពេញ ៣A-៦៥៧៥ និងបាន​បើកតាម​បណ្តោយ​ផ្លូវជាតិ លេខ០៥ ចេញពីរាជធានីភ្នំពេញឆ្ពោះទៅខេត្ត។

ស្រ្តីម្នាក់កំពុងធ្វើដំណើរ ដោយម៉ូតូ តាមបណ្តោយផ្លូវនេះដែរ ពេលឃើញឡានធំពីរគ្រឿង ដោយគ្មានចំណង គ្មាន​ទ្រុងបែបនេះ បានឈប់ម៉ូតូ រួចបញ្ចេញវាចារ ទាំងក្តីបារម្ភថា មិនហ៊ានជិះទៅទៀតទេ ព្រោះមើលទៅផ្លូវ​សុទ្ធ​តែក្រឡុក មានទឹក មានភក់ តែឡានស្ទូចនេះ បែរជាបើកធ្វើព្រងើយគ្មានអ្នកណាឃាត់សោះ។ ចុះបើឡាន បើក​ធ្លាក់​ក្រឡុកផ្អៀងតែបន្តិចនោះ ឡានពីរខាងលើ នឹងធ្លាក់មកមិនខាន ព្រោះគ្មានប្រដាប់ការពារ ឲ្យបានល្អផង។

រថយន្ដទាំងពីរគ្រឿង នៅលើរថយន្ដស្ទូចនោះ ត្រូវបានចងនឹងច្រវ៉ាក់តូចៗប៉ុន្មានខ្សែរដែរ ប៉ុន្តែលក្ខណៈនេះ មិន​អាចធានាថា រថយន្ដទាំងពីរខាងលើ មិនរង្គើនោះឡើយ។ អ្នកស្រីដែលប្រើប្រាស់ទ្រូងផ្លូវខាងលើ បាន​បន្ថែម​ទៀតថា៖ «ចុះបើធ្លាក់ តើអ្នកណា ជាអ្នករងគ្រោះ មិនមែនអ្នកជិះម៉ូតូក្បែរទេហ្អី?»។ អ្នកស្រីបានអះអាងបែប​នេះ ខណៈដែលឃើញស្ថានភាពឡានស្ទូចនោះ មានលក្ខណៈ​ស្ទើរទប់លំនឹងមិនជាប់ នៅលើផ្លូវជាតិ ដែលមាន​សភាព​ក្រឡិចក្រឡុក និងរអិលដោយសារភ្លៀង។

ក្រៅពីក្តីបារម្ភរបស់អ្នកដំណើរ និងអ្នកប្រើប្រាស់ទ្រូវផ្លូវ ជាច្រើននាក់នេះ អ្នករស់នៅតាមបណ្ដោយផ្លូវនេះ មួយ​ចំនួន ក៏បានបញ្ចេញសម្លេងព្រួយចិត្តដែរថា ឡានស្ទូចមួយ ដឹកឡានពីបែបនេះ ប្រឈមគ្រោះថ្នាក់​ខ្លាំង​ណាស់ បើមន្ត្រីនគរបាលមិនឃាត់ ហើយនៅតែបណ្តែតបណ្តោបែបនេះញ៉យៗ ច្បាស់ជាមានបញ្ហា នៅថ្ងៃណាមួយ​មិន​ខាន៕