នៅព្រឹកថ្ងៃទី ២១ ខែ សីហា ឆ្នាំ២០១៥នេះ ហេតុការណ៍ឈ្លោះគ្នាមួយ បានកើតឡើងដោយសារតែការ ខ្វែង​គំនិតគ្នា រវាងសមត្ថកិច្ចមូលដ្ឋាន និងសមត្ថកិច្ចអន្តោប្រវេសន៍ ដែលស្ថិតនៅប៉ោយប៉ែត ខេត្តបន្ទាយមានជ័យ។ នៅក្នុងករណីខាងនេះ មិនបានបង្កគ្រោះថ្នាក់ ដល់អ្នកណាម្នាក់ឡើយ គ្រាន់តែបង្កការភ្ងាក់ផ្អើល ដល់​ប្រជា​ពលរដ្ឋ និងអ្នកដំណើរតាមផ្លូវប៉ុណ្ណោះ។

ដើមហេតុ នៃការជជែងគ្នា យ៉ាងតឹងសរសៃរកនេះ មានពាក់ព័ន្ធ ដល់ការអន្តរាគមន៍ រឿងករណីចោរឆក់​ទូរស័ព្ទ​ដៃមួយគ្រឿង ពីពលរដ្ឋមួយរូប។ មន្ត្រីនគរបាលមូលដ្ឋាន ទទួលបណ្ដឹងជនរងគ្រោះ និងចាប់ជនល្មើសបាន តែលោកអនុប្រធានប៉ុស្តិ៍ មកអន្តរាគមន៍យកជនល្មើសទៅ ដោយចោទមន្ត្រីមូលដ្ឋាន មិនបានសហការណ៍
ជា​មួយគាត់ ។

ហេតុការណ៍នេះ ត្រូវបានថតជាប់ជាវីដេអូ ហើយយកមកបង្ហោះ នៅលើបណ្ដាញសង្គម បង្កឲ្យមានការ​ចែក​រំលែក យ៉ាងច្រើន។ មិនត្រឹមតែប៉ុណ្ណឹង ក្រុមអ្នកប្រើប្រាស់បណ្ដាញសង្គមទាំងនោះ ក៏បានបញ្ចេញមតិយោបល់ ទៅតាមការគិតឃើញរៀងៗខ្លួន។

ម្ចាស់គណនី« Kao Sookhun HM» បានសរសេរថា៖ «អោយតែករណីជាក់ស្ដែង មន្ត្រីនគរបាលជាតិ គ្រប់​ស្ថាប័ន​មានសិទ្ធិចាប់ឃាន់ខ្លួនទុកបាន រួចបញ្ជូនទៅតាមនីតិវិធីនៃច្បាប់។ អនុប៉ុស្ដិ៍អន្តោប្រវេសន៍ គាត់​និយាយ​ត្រូវ ហើយ​ទីនោះ ក៏ជាមូលដ្ឋានរបស់អន្តោប្រវេសន៍ ហើយស្រាប់ដែរ តាមអនុក្រឹត រាជរដ្ឋាភិបាល ប៉ូលីស​ប៉ុស្ដិ៍​មូលដ្ឋាន ក្រុងប៉ោយប៉ែតគួរតែ មកសហការ ជាមួយអនុប៉ុស្ថិ៍អន្ដោប្រវេសន៍ សុំស្នើខ្លួនជនល្មើលនោះ ទៅ​ចាត់​ការ​តាម​ផ្លូវ​ច្បាប់​ទើបត្រូវ។»។

ប៉ុន្តែម្ចាស់គណនីឈ្មោះ«Linazano Ngin»បានសរសេរថា៖ «ប្រហែលជាប៉ូលីស មានតែស័ក្តធំ ប៉ុន្តែ​ទទួល​បាន​ចំណេះដឹងតិចតួច បានគ្មានដំណោះស្រាយ បែរជាឈ្លោះតាមផ្លូវ មិនខ្មាសប្រជាពលរដ្ឋ ឫក៏​អាង​មេ​អញ​ខ្លាំង​រាងៗ​ខ្លួន»។

រីឯគណនីឈ្មោះ«You Sara»សរសេរថា៖ «នៅតាមច្រកអន្តរជាតិ ភាគច្រើនតែងតែមិនសូវសហការ ជា​មួយ​កម្លាំងប៉ុស្តិ៍មូលដ្ឋានទេ តែតែងបែងចែកទឹកដីគ្នា នៅពេលដែលមានបទល្មើសព្រហ្មទណ្ឌ កំរិតធ្ងន់ទើប​ប្រគល់​អោយមូលដ្ឋានធ្វើ ល្មមៗមិនអោយទៅក្បែរទេ បង»។