កុមារាវ័យ៥ឆ្នាំរូបនេះ បានបកស្រាយបទចម្រៀងមួយបទ របស់លោក ខេមរៈ សេរីមន្ត មានចំណងជើងថា៖ «ខឹងឬស្អប់ អូនអាចជេបងបាន» ក្នុងកម្មវិធីប្រកួតប្រជែង ទេព្យកោសល្យកុមារមួយ នៅស្ថានីយ៍ទូរទស្សន៍ ម៉ាយធីវី (MyTV) កាលពីថ្ងៃទី ១៤ ខែសីហា ឆ្នាំ២០១៥ ក្នុងវគ្គជម្រុះ សប្តាហ៍ទីមួយកន្លងទៅ។ កុមារ​បាន​ធ្វើ​ឲ្យគណៈកម្មាការ មានការភ្ញាក់ផ្អើលជាខ្លាំង ពីក្នុងចំណោមកុមារជាច្រើននាក់ ដែលបញ្ចេញទេពកោសល្យ ក្នុងកម្មវិធីនោះដែរ។

អ្នកទស្សនាទាំងអស់ ស្ទើរទប់ខ្លួន មិនហើបជើង មិនងើបគូថមិនបាន នៅពេលបានទស្សនា ទាំងកាយវិកា ទាំង​រូបសម្បត្តិ របស់អ្នកចម្រៀងវ័យក្មេងរូបនេះ។ «ពេលច្រៀង មានទឹកដមល្អ ទោះជានិយាយ មិនទាន់ច្បាស់​ខ្លះ​ក៏ដោយ» នេះជាលើកឡើង របស់គណៈកម្មាការមួយរូប។ រីឯអ្នកគាំទ្រវិញ បានបង្ហាញពីការគាំទ្រ ដល់​បេក្ខជន​​កុមារ ចិត្រា គង្គា ហៅ កូដូម៉ូ រូបនេះថា ពិតជាច្រៀងបានល្អ ព្រោះតែការបញ្ចេញសម្លេង និងភាព​ថ្នាក់​ថ្នម​សម្លេង នៅ​ពេល​ចុងក្រោយ នៃបទចម្រៀង។

យ៉ាងណាក៏ដោយ គេនៅមិនទាន់ដឹងបានថា តើកុមាររូបណា នឹងត្រូវទទួលជ័យលាភី នៅវគ្គផ្តាច់ព្រាត់នេះទេ ព្រោះតែសមត្ថភាព នៃការប្រកួតប្រជែង មានលក្ខណៈល្អខុសគ្នា។ កុមារា ដែលច្រៀងបទលោក ខេមរៈ សេរីមន្ត ខាងលើនេះ មកពីខេត្តកំពង់ចាម ខណៈកុមារសម្លេងល្អផ្សេងទៀត មកពីទីតាំងខុសគ្នា ទាំងក្នុង​រាជធានី​ភ្នំពេញ និងតាមបណ្តាខេត្ត។ ក្នុងចំណោមការប្រកួតវគ្គដំបូងនេះ មានតែកុមារ១២រូបប៉ុណ្ណោះ ដែល​អាច​ឈាន ទៅវគ្គផ្តាច់ព្រាត់បាន ក្នុងនោះមានកុមារា ចិត្រា គង្គា ផងដែរ៕