«About A boy» ជាស្នាដៃនិព្ធននិងច្រៀងលើកដំបូង ជាភាសាអង់គ្លេសរបស់កញ្ញា សំ សាវី តារាចំរៀងខែ្មរសញ្ញាតិ អាមេរិក ដែលបទចំរៀងរបស់នាងកំពុងចរាចរណ៍ នៅលើបណ្តាញសង្គមអាយធូប ( iTunes) យូធូប (Youtube) តំាងពីថ្ងៃ ១ ខែកុម្ភៈឆ្នាំ ២០១៤ កន្លងទៅថ្មីៗនេះ។

កញ្ញា សំ សាវី តារាចម្រៀងទើបនឹងដុះពន្លកនៅអាមេរិក។
‌‌
ជីវិតតារា - ក្នុងបទសម្ភាសន៍របស់ទស្សនាវដ្តី មនោរម្យ.អាំងហ្វូ ជាមួយកញ្ញាសំ សាវី តារាចម្រៀងជនជាតិខ្មែរវ័យ ៣៥ឆ្នាំរូបនេះ មានស្រុកកំណើតនៅខេត្តបាត់ដំបង តែត្រូវឪពុកម្តាយរបស់នាង នាំនាងទៅរស់នៅសហរដ្ឋ​អាមេរិក​តាំងពីអាយុ ៥ខែ ពីការរត់គេចខ្លួនចេញពីរបបប៉ុលពត។ បើទោះជាកញ្ញា សាវី មិនអាចសរសេរ ឬុអានភាសាខែ្មរបាន តែនាងអាច​និយាយភាសាខ្មែរបានល្អ ដែលឪពុករបស់នាងបានបង្ហាត់បង្រៀននាងយ៉ាងច្រើន អំពីតម្លៃវប្បធម៌​ក្នុង​សង្គមខ្មែរ។ នាងបន្តទៀតថា «ខ្ញុំមានអារម្មណ៍ថា អាមេរិកគឺស្ថិតនៅក្នុងចិត្តខ្ញុំ តែធ្វើជាពលរដ្ឋខែ្មរ គឺវាដក់ជាប់ក្នុង​បេះដូង​របស់​ខ្ញុំតែម្តង»។

អ្វីដែលអស្ចារ្យនោះ នាងចាប់ផ្តើមច្រៀងតាំងពីអាយុ៤ឆ្នាំម្ល៉េះ ដោយមិនអនុញ្ញាតជីវិតរបស់នាង រស់នៅបែបធម្មតាៗ​ឡើយ។ ទោះជា សាវី បានដាក់ប្រកួតប្រលងចំរៀងក្នុងកម្មវិធីល្បីៗដូចជា American Idol, The Voice, និង America’s Got Talent ហើយមិនបានជាប់ជ័យលាភី ជាតារាចំរៀងពេញសិទិ្ធនោះក៏ដោយ តែ សាវី មិនដែល​បញ្ចប់​នៅ​កណ្តាល​ផ្លូវ ឬបាក់ទឹកចិត្តនោះទេ។ កម្លាំងចិត្ត ដែលបានជំរុញឲ្យ សាវី បានខិតខំចំណាយពេលវេលា និង​ថវិកា​ផ្ទាល់ខ្លួន ក្នុង​ការផលិតបទចំរៀងមួយបទនេះ បានចេញជារូបរាង។

ចំពោះអត្ថន័យនៃបទចំរៀង «About A boy» នេះត្រូវបានសាវីបកស្រាយថា៖ «មនុស្សស្រីម្នាក់ បានធ្លាក់អន្លង់ស្នេហ៍ លើបុរសដ៍សែនល្អម្នាក់ ដែលមិនមែនជាបុរសអាក្រក់ដូចជានារីមួយចំនួន មានទំនោរឈ្លក់វង្វេងមួយភ្លែតនោះទេ។ បុរសដ៏ល្អ ដែលទទួលបានការគោរពពីមនុស្សខ្លួនស្រលាញ់ និងមានភាពស្មោះត្រង់ ជាមួយនារីម្នាក់នោះជារៀង​រហូត។»

មិនត្រឹមតែមានទេពកោសល្យខាងច្រៀងប៉ុណ្ណោះទេ កញ្ញា សំ សាវី កំពុងធ្វើការផ្នែកវិទ្យាសាស្រ្ត ក្នុងទីពិសោធន៍​ឈាមអ្នកជំងឺមួយក្នុងទីក្រុង San Jose។ ក្នុងនាមជាអ្នកពិនិត្យឈាម (phlebotomist) នៅក្នុងមន្ទីរពេទ្យឬគ្លីនិក កញ្ញា​យល់ថា វាជាការងារដ៏ល្អដែលកញ្ញាចូលចិត្តជួយមនុស្ស នៅពេលដែលពួកគេត្រូវការ។

គួរបញ្ជាក់ដែរថា នៅថ្ងៃទី៣ ខែសីហាខាងមុខនេះ សាវី នឹងឡើងសម្ដែងក្នុងមហោស្រពតន្ត្រីកម្ពុជា​លើកដំបូងនៅ ហូលីវូដ ជាមួយនឹងតារាចម្រៀងខ្មែរល្បីៗ នៅអាមេរិកដូចជា ឡូរ៉ា ម៉ម, បុស្បា ប៉ាន់ និងតារាចម្រៀងជាច្រើនទៀត។ សាវី ក៍កំពុងតែត្រៀមខ្លួនជាស្រេច ក្នុងការបញ្ចូលចំរៀងវីដេអូបន្តបន្ទាប់របស់ខ្លួន នៅចុងសប្តាហ៍ក្រោយនេះ ទៅ​ក្នុង​គេហទំព័រចែកផ្សាយវីដេអូ យូធូប (Youtube) ។ កញ្ញាសង្ឃឹមថាបទចំរៀងរបស់នាង នឹងទទួលបានការគំាទ្រ​ពី​ទស្សនិកជនកម្ពុជាផងដែរ៕

សូមទស្សនាចម្រៀង «About a boy» របស់កញ្ញាដូចតទៅ ៖

---------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី១៧ខែកុម្ភៈ ឆ្នាំ២០១៤