លោក ម៉ិច តារា ជាអ្នកយកព័ត៌មានវ័យក្មេង របស់សារព័ត៌មាន «The Cambodia Daily» បានឱ្យដឹងថា រូប​លោក​បានបាត់ទូរស័ព្ទ iPhone 4s ពណ៌ស មួយគ្រឿង នៅក្នុងវិមានរដ្ឋសភាដ៏ស្កឹមស្កៃ ខណៈដែលលោក បាន​ចូល​ទៅយកព័ត៌មាន នៃសន្និសីទសារព័ត៌មាន  ដែលរៀបចំឡើងនៅទីនោះ ដោយអ្នកនាំពាក្យរដ្ឋសភា។

នៅល្ងាចវេលាម៉ោង១៧ ល្ងាចថ្ងៃទី១៣ ខែសីហា ឆ្នាំ២០១៥ អ្នកការសែតវ័យក្មេងរូបនេះ បាន​ប្រាប់​ទស្សនាវដ្តី​មនោរម្យ.អាំងហ្វូថា ទូរស័ព្ទនោះ មានតម្លៃប្រមាណជា ១៥០ដុល្លារប៉ុណ្ណោះ តែអ្វីដែលសំខាន់ គឺនៅក្នុងនោះ មានឯកសាររូបភាពសម្លេង និងកម្មវិធីការងារមួយចំនួន ដែលចាំបាច់ សម្រាប់ការងារប្រចាំថ្ងៃរបស់លោក។ លោក ម៉ិច តារា បានបន្ថែមទៀតថា លោកបានដាក់ ទូរស័ព្ទដៃរបស់លោក នៅលើតុពេលកំពុង ធ្វើសន្និសីទ​ការសែតក្នុងរដ្ឌសភា។ រីឯលោកបានផ្ចង់អារម្មណ៍ ដើម្បីថតសម្លេងលោក ឈាង វុន អ្នកនាំពាក្យរដ្ឌសភា ដូច​អ្នកកាសែតផ្សេងទៀតដែរ។ តែនៅក្រោយ ការបញ្ចប់សន្និសីទនោះ លោកត្រឡប់មកមើលទូរស័ព្ទវិញ ស្រាប់​តែ​បាត់រកមិនឃើញ។

ម្ចាស់ទូរស័ព្ទរងគ្រោះ ព្រោះអាជីពខ្លួនរូបនេះ បានសរសេរ នៅក្នុងគណនីហ្វេសប៊ុកផ្ទាល់ខ្លូនថា លោកទៅ​យក​ព័ត៌មាន មានគេលួចទូរស័ព្ទ នៅក្នុងរដ្ឋសភា។ លោកបានផ្ដាំផ្ញើរថា លើកក្រោយ សូមអ្នកកាសែតទាំងអស់ ប្រុង​ប្រយ័ត្នពេលទៅរដ្ឋសភា និងសូមជួយតាមដានទាំងអស់គ្នា។ លោកបានសរសេរថា៖ «សម្រាប់ខ្ញុំ គឺទៅ​អស់​ហើយ ឯកសារសំខាន់ៗ ដែលពាក់ព័ន្ធ (ទៅ)គ្មានសល់»។

មិនត្រឹមតែសរសេរជាភាសាខ្មែរទេ តែលោក ម៉ិច ដារា បានបញ្ជាក់ ជាភាសាអង់គ្លេសដូច្នេះថា៖ «Next time be careful when you come to the National Assembly. The National Assembly need to have a system to track the thief.»៕