ជម្លោះរវាងក្រុមក្មេងស្ទាវ ដែលម្ខាងមានគ្នា១០នាក់ ព្រួតវាយភាគីម្ខាងទៀត ដែលមានគ្នាបីនាក់ ដែលទើប​ចេញ​ពីក្លិបនេះ បានធ្វើឲ្យមន្ត្រីនគរបាល ដែលយាមល្បាតនាពេលយប់ ក្នុងតំបន់នោះ ផ្ទុះអាវុធឡើងលើមួយ​គ្រាប់ ដើម្បីបំបែកពួកគេ។ រឿងរ៉ាវបានកើតឡើង កាលពីម៉ោងប្រមាណ២ រំលងអធ្រាត្រយប់ ថ្ងែទី០៥ ចូល​ថ្ងៃ​ទី០៦ ខែសីហា ឆ្នាំ២០១៥ នៅជិតគល់ស្ពានស្ទឹងមានជ័យ តាមបណ្តោយផ្លូវ២៧១ ក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

សាក្សីដែលនៅក្នុងហេតុការណ៍ បានប្រាប់ឲ្យដឹងថា ដំបូងមានក្រុមក្មេងយុវជនគ្នាបីនាក់ បានធ្វើដំណើរ​ចេញ​ពីក្លិប«វើលដាន់» តាមបណ្តោយផ្លូវខាងលើ ដែលជិះម៉ូតូម៉ាក MSXស្លាកលេខភ្នំពេញ ១CW-៩៩៩៨។ លុះ​មក​ដល់ចំណុច គល់ស្ពានស្ទឹងមានជ័យ ស្រាប់តែមានក្មេងស្ទាវ មួយក្រុមទៀតគ្នា១០នាក់ ជិះម៉ូតូ៤គ្រឿង ស្ទាក់​ម៉ូតូអ្នកទាំងបី រួចធ្វើការវាយតប់ទាំងកម្រោល ព្រមទាំងវាយកំទេចម៉ូតូ បណ្តាលឲ្យម្ចាស់រងរបួសធ្ងន់ ក្រុម​ភាគី​រងគ្រោះ ដែលមានគ្នាបីនាក់ ត្រួវបានគេស្គាល់ថាមានស្រីម្នាក់។

ហេតុការណ៍នេះ ត្រូវបានមន្រ្តីយាមល្បាតពេលយប់ ក្នុងសង្កាតស្ទឹងមានជ័យ ឃើញភ្លាមៗដែរ តែសមត្ថកិច្ច​រូបនោះ មិនដឹងធ្វើយ៉ាងណា ព្រោះកំពុងតែវាយតប់ មិនអាចចូលទៅបាន លោកសម្រេចបាញ់ឡើង​លើមួយ​គ្រាប់ ដើម្បីបំបែកហ្វូង។ បន្ទាប់ពីរបង្ក្រាបការវាយតប់បាន សមត្ថកិច្ចបានឃាត់ខ្លូនក្រុមបង្ក ចំនួនបីនាក់ បញ្ជូន​ទៅធ្វើការសាកសួរ នៅប៉ុស្តិ៍នគរបាលរដ្ឋបាលទំនប់ទឹក។ ចំណែកភាគី ខាងជនរងគ្រោះបីនាក់ ដែលត្រូវរបួស​នោះ ត្រូវបានបញ្ជូនទៅមន្ទីពេទ្យឯកជន នៅក្បែរនោះ។

តាមការបញ្ជាក់ របស់នាយប៉ុស្តិ៍ទំនប់ទឹក នៅព្រឹកថ្ងៃថ្ងៃទី០៦ ខែសីហា ឆ្នាំ២០១៥នេះ បានឲ្យទស្សនាវដ្តី​មនោរម្យ.អាំងហ្វូដឹងថា លោកបានទទួលសំនុំរឿង វាយតប់គ្នានេះហើយ រួចលោកបានបញ្ជូនទាំងវត្ថុតាង និងជនធ្វើសកម្មភាព ទៅកាន់ការិយាល័យខណ្ឌចំការមន រួចរាល់ដែរ។ បច្ចុប្បន្ន ការិយាល័យខណ្ឌ កំពុង​ដោះស្រាយទៅតាមច្បាប់៕