ព្រះរាជក្រឹត្យទីមួយ ចុះថ្ងៃទី២៨ ខែកក្កដា ឆ្នាំ២០១៥ និងព្រះរាជក្រឹត្យទីពីរ ចុះថ្ងៃ​ទី១ ខែសីហា ឆ្នាំ២០១៥ ឡាយ​ព្រះហស្តលេខា​ ដោយ​ព្រះមហាក្សត្រ បានតែងតាំងមន្ត្រីនគរបាល ជូនដល់នាយនគរបាលជាតិ និង​នាយនគរបាលជាន់ខ្ពស់ ក្នុងក្របខ័ណ្ឌមន្រ្តីនគរបាលជាតិកម្ពុជា នៃក្រសួងមហាផ្ទៃ ពីវរសេនីយ៍ឯក ទៅជា​ថ្នាក់ឧត្តមសេនីយ៍ត្រី (ផ្កាយ១) ចំនួន ២៨រូប និងពីថ្នាក់ឧត្តមសេនីយ៍ត្រី ទៅជាថ្នាក់ឧត្តមសេនីយ៍ទោ (ផ្កាយ​ពីរ) ចំនួន ១៧រូប។

ព្រះរាជក្រឹត្យទាំងពីរ ដែលបានតែងតាំង មន្ត្រីនគរបាលទាំង៤៥រូប យោងទៅតាម «សេចក្តី​ក្រាបបង្គំ​ទូល​ថ្វាយ» ​របស់នាយករដ្ឋមន្ត្រីកម្ពុជានោះ ​បានត្រាស់បង្គាប់ត្រឡប់ មកលោក ហ៊ុន ​សែន វិញ​ ថាត្រូវទទួល​បន្ចុក ការអនុវត្តព្រះរាជក្រឹត្យទាំងពីរ ចាប់ពីថ្ងៃឡាយ​ព្រហស្ត​លេខាតទៅ។ សូមអានព្រះរាជក្រឹត្យទាំងពីរ នៅ​ខាង​ក្រោម​អត្ថបទ។

ការតែងតាំងមន្ត្រីនគរបាលជាច្រើន ដោយតម្លើងថានន្តរស័ក្ដិ ឲ្យពាក់ស័ក្ដិបន្ថែមពេញស្មារនេះ បានធ្វើឡើង​​ខណៈ​ប្រទេសកម្ពុជា នៅតែល្បីរហូតមកដល់ពេលនេះថា ជាប្រទេសដែលសម្បូរ​ទៅដោយចោរកម្ម ការ​កាប់​សម្លាប់ បាញ់បោះ វាយតប់ និងគ្រោះថ្នាក់ចរាចរណ៍ កើតឡើងសឹងជារៀងរាល់ម៉ោង។ សូមស្វែងរកអានអត្ថបទ​​រាប់​​រយ ឬ​សំនុំរឿង ដែលទាក់ទងនឹងហេតុការណ៍ទាំងនេះ ដោយចុចនៅលើទីនេះ /ទីនេះ និងទីនេះ។

បើទោះជាករណីបទល្មើសជាច្រើន ត្រូវបាននគរបាលនិងអាជ្ញាធរ ធ្វើការបំបែកបាន និងឈានទៅ​ចាប់​ជន​ល្មើស ឬជនបង្ក មកផ្ដន្ទាទោសក៏ដោយ ប៉ុន្តែក៏នៅមានសំនុំរឿងធំៗ ជាច្រើនទៀត ដែលនគរបាលនិង​អាជ្ញាធរ មិនដែលរកឃើញជនល្មើស យកមកផ្តន្ទាទោសនោះឡើយ។ ផ្ទុយទៅវិញ នៅក្នុងសំនុំរឿងខ្លះ ក្រុម​នគរបាល​ថែមទាំង បានបង្កើតជនល្មើសសិប្បនិម្មិត ឲ្យមកទទួលទោស ជំនួសជនល្មើសពិតប្រាកដ នោះផងទៀត។

ការតែងតាំងនេះទៀតសោធ ក៏បានកើតឡើងជួនចំពេល តែប៉ុន្មានថ្ងៃក្រោយការប្រកាស របស់​នាយក​​រដ្ឋមន្រ្តី​កម្ពុជា លោក ហ៊ុន សែន ដែលបានអះអាងថា លោកប្រឆាំងដាច់ខាត់ នូវ«បដិវត្តន៍ពណ៌» ដែល​មាន​គោល​បំណង បំបាត់រាជបល័ង្គ និងផ្តួលរំលំរដ្ឋាភិបាលស្របច្បាប់ បច្ចុប្បន្ន។ ការថ្លែងនេះ ត្រូវបានធ្វើ​ឡើង​កាល​ពី​ថ្ងៃ​ទី ២៣ ខែកក្កដា ក្នុងពិធីជួបសំណេះសំណាល ជាមួយកងកម្លាំងប្រដាប់អាវុធ និងមន្ត្រីរាជការ មកពី​អង្គភាព​នានា ទូទាំងប្រទេស។

អតិផរណា«សក្តិ» ឬ«ផ្កាយ»

សម្រាប់អ្នកតាមដានបញ្ហាសង្គម និងនយោបាយនៅកម្ពុជា បានហៅការតម្លើងបុណ្យស័ក្តិ ដែលមានជា​ហូរ​ហែរ​​នេះ ថានឹងអាច ធ្វើឲ្យមានអតិផរណា«ស័ក្តិ» ឬ«ផ្កាយ»។ អ្នកស្រាវជ្រាវផ្នែកសង្គម លោក កែម ឡី ធ្លាប់​បានផ្ដល់បទសម្ភាស ឲ្យ​ទស្សនាវដ្ដី​មនោរម្យ.អាំងហ្វូ នាពេលកន្លងមក នៅក្នុងករណីនៃការតម្លើង​ថានន្តរ​ស័ក្ដិ​នេះ ដោយបានធ្វើ​ការ​រម្លឹក​ថា «តម្លើងផ្កាយ និងសក្តិច្រើនពេក» នឹងធ្វើឲ្យតម្លៃនៃ«ផ្កាយ និងស័ក្ដិ»នោះ ចុះ​មក​វិញ។

លោក កែម ឡី បានលើកពីគោលការណ៍ប្រាំយ៉ាង មកពន្យល់សម្រាប់ល័ក្ខខ័ណ្ឌ នៃការតម្លើងថានន្តរស័ក្តិថា៖
ទីមួយ) ត្រូវមាន​ជំនាញពិត​ប្រាកដ ទីពីរ) ត្រូវមានបទពិសោធខ្ពស់ ទីបី) ត្រូវមានការរៀនសូត្រ ពីផ្នែកជំនាញ (យោធា ឬនគរបាល) ឲ្យបានច្បាស់លាស់ ទីបួន) ត្រូវមាន​សីលធម៌ល្អ ក្នុងការប្រតិបត្តិការងារ និងទីប្រាំ) ត្រូវ​មានស្នាដៃក្នុងការរក្សាសន្តិភាព សន្តិសុខសង្គម និងការកសាង​សមត្ថភាព ដោយខ្លួនឯង។ ជាមួយគ្នានេះ លោក​​ក៏ស្នើសុំឲ្យជៀសវាង នូងការលក់ដូរ ក្នុងការតម្លើងឋានៈនេះ​ ដែល​ជាមុខរបរសម្រាប់រកផលចំណេញ និង​ជៀសវាងនូវបក្សពួកនិយម ធ្វើយ៉ាងណា ឲ្យមាន«សុច្ចរិតភាព»សង្គម៕