កែម ឡី ថាបក្សប្រជាធិបតេយ្យមូលដ្ឋាន មិនដូចបក្សប្រជាជន
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី០២ សីហា ២០១៥
- កែប្រែចុងក្រោយ: August 03, 2015
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
«វាមិនដូចគណបក្សប្រជាជនកម្ពុជា ដែលប្រជាជន គ្រាន់តែធ្វើតាមចៅហ្វាយរបស់ខ្លួន នោះឡើយ» នេះជាការថ្លែងអះអាង របស់លោក កែម ឡី ជាមួយសារព័ត៌មានខេមបូឌៀដេល្លី ក្នុងការធ្វើអត្ថាធិប្បាយមួយ ចំពោះការជ្រើសតាំង ក្បាលម៉ាស៊ីនដឹកនាំ ជាបណ្ដោះអាសន្ន នៃគណបក្សប្រជាធិបតេយ្យមូលដ្ឋាន ហៅកាត់ជាភាសាអង់គ្លេស GDP។
គណបក្សថ្មីនេះ បានធ្វើសមាជ ជាលើកដំបូងរបស់ខ្លួន ក្នុងរាជធានីភ្នំពេញ ដែលមានសមាជិកចូលរួម ប្រមាណជា១០៣នាក់ ហើយបានបោះឆ្នោត ផ្ដល់សេចក្ដីទុកចិត្ត ទៅលើលោក យ៉េង វីរៈ អតីតប្រធានមជ្ឈមណ្ឌលអប់រំច្បាប់ សម្រាប់សហគមន៍ ឲ្យធ្វើជាប្រធានបណ្ដោះអាសន្ន របស់គណបក្សនេះ។ ក្រៅពីលោក យ៉េង វីរៈ នៅមានអតីតមេដឹកនាំអង្គការសង្គមស៊ីវិល ចំនួនពីរនាក់ទៀត ក៏ត្រូវបានសមាជជំហានដំបូងនេះ ជ្រើសតាំងឲ្យធ្វើជាអនុប្រធាន និងជាអគ្គលេខាធិការគណបក្សដែរ។
ដោយឡែក អ្នកដែលធ្លាប់ជាអ្នកផ្ដួចផ្ដើម ចលនានយោបាយថ្មីនេះ មានលោក កែម ឡី អ្នកស្រាវជ្រាវផ្នែកសង្គម ប្រធានក្រុមតស៊ូមតិ “ខ្មែរដើម្បីខ្មែរ” និងលោក យ៉ង សាំងកុមារ ប្រធានអង្គការសេដាកជាដើមនោះ មិនបានចូលរួម នៅក្នុងគណបក្សថ្មីនេះទេ។ តែលោក កែម ឡី បាននិយាយការពារគណបក្សថ្មី នៅក្រោយការជ្រើសតាំងមេដឹកនាំបណ្ដោះអាសន្នថា គណបក្សប្រជាធិបតេយ្យមូលដ្ឋាននេះ មិនដូចគណបក្សប្រជាជនកម្ពុជា ដែលប្រជាជន គ្រាន់តែធ្វើតាម «ចៅហ្វាយ» របស់ខ្លួននោះឡើយ។
លោក កែម ឡី បានពន្យល់ថា៖ «គ្រប់គ្នាអាចលេងល្បែង របស់ខ្លួនផ្ទាល់ ហើយខ្ញុំអាចនិយាយបានថា ដំណើរការ នៃការបោះឆ្នោត នៅព្រឹកនេះ គឺប្រព្រឹត្តទៅដោយរលូន និងយុត្តិធម៌ បើទោះណាជាខ្ញុំមិនមានវត្តមាន នៅទីនោះក៏ដោយ»។
អ្នកស្រាវជ្រាវផ្នែកសង្គម បាននិយាយទៀតថា នេះគ្រាន់តែជាការបោះឆ្នោត ជ្រើសរើសថ្នាក់ដឹកនាំ ជាបណ្ដោះអាសន្ន ដើម្បីអនុញ្ញាតឲ្យគណបក្ស អាចចាប់ផ្ដើមដំណើរការ ចុះបញ្ជីជាមួយក្រសួងមហាផ្ទៃប៉ុណ្ណោះ។ លោក កែម ឡី បានបន្ថែមទៀតថា៖ «ព្រឹកនេះ មិនមែនជាការបង្កើតគណបក្សពិតទេ។ នៅពេលពួកគេប្រមូល បានឃុំ-សង្កាត់ ចំនួន១០០នៅចុងឆ្នាំនេះ ពួកគេ នឹងធ្វើសមាជលើកដំបូង ហើយនៅពេលនោះ នឹងមានបេក្ខជន និងប្រជាជនផ្សេងៗ ដែលអាចឈរឈ្មោះ។»៕