រដ្ឋាភិបាលកម្ពុជា ចាំបាច់ត្រូវលើកកំពស់ ក្នុងការគោរព​​តាមបទដ្ឋាន​អន្តរជាតិ ទាក់ទងនឹងសិទ្ធិមនុស្ស និងជាពិសេសត្រូវធានា ឲ្យគ្រប់តួអង្គ នៃក្រុមសង្គមស៊ីវិល និងក្រុមគណបក្សនយោបាយ អាចអនុវត្តន៍​សិទ្ធិប្រជាធិបតេយ្យ​របស់ពួកគេ បានដោយសេរី។ នេះ ជាការថ្លែងឡើង របស់អ្នកនាំពាក្យ របស់លោក អង់តូនីញ៉ូ ហ្គូតេរ៉េស (Antonio Guterres) អគ្គលេខាធិការអង្គការសហប្រជាជាតិ ដែលចេញផ្សាយ​ឲ្យដឹង នៅល្ងាចថ្ងៃសុក្រ ពីរថ្ងៃមុនថ្ងៃបោះឆ្នោត ជ្រើសតាំងតំណាងរាស្ត្រ អាណត្តិទី៦ នៅក្នុងប្រទេសកម្ពុជា ដែលនឹងប្រព្រឹត្តិទៅ នៅថ្ងៃអាទិត្យទី២៩ ខែកក្កដា ខាងមុខ។

ខណៈគណបក្សប្រជាជនកម្ពុជា ដែលជាគណបក្សកាន់អំណាច និងគណបក្សមួយចំនួន បានអំពាវនាវឲ្យពលរដ្ឋកម្ពុជា ចេញទៅបោះឆ្នោតនោះ គណបក្សសង្គ្រោះជាតិ ដែលជាគណបក្សប្រឆាំងដ៏សំខាន់ និងដែលត្រូវបានរំលាយ កាលពីចុងឆ្នាំមុន បានអំពាវនាវ​ឲ្យធ្វើពហិការ ការបោះឆ្នោតជាតិ ដែលមានពោរពេញ ដោយភាពចម្រូងចម្រាស។

លោក «Stéphane Dujarric» អ្នកនាំពាក្យ របស់អគ្គលេខាធិការ អ.ស.ប ត្រូវបានស្រង់សំដី មកសរសេរនៅក្នុងអត្ថបទចុះផ្សាយព័ត៌មាន របស់អង្គការពិភពលោក ដូច្នេះថា៖ «លោកអគ្គលេខាធិការ អង្គការសហប្រជាជាតិ សូមអំពាវនាវ ទៅគ្រប់ភាគីនយោបាយខ្មែរទាំងអស់ ត្រូវកាត់បន្ថយភាពតានតឹង និងការបែកបាក់ផ្នែកនយោបាយ»។

បន្ថែមពីលើការរំលាយគណបក្សប្រឆាំង ដ៏សំខាន់ចេញពីឆាកនយោបាយ មេដឹកនាំគណបក្សនេះ ចំនួន​១១៨​នាក់ ត្រូវបាន​ហាមឃាត់ មិនឲ្យធ្វើ​នយោបាយ ចំនួន៥ឆ្នាំ ខណៈ​ប្រធាន​គណបក្ស លោក កឹម សុខា ត្រូវបាន​​ចាប់ខ្លួន​យកទៅឃុំ នៅក្នុងពន្ធនាគារ រហូតមកដល់ថ្ងៃនេះ។ រីឯមេដឹកនាំ​ប្រឆាំងមួយរូបទៀត គឺលោក សម រង្ស៊ី ដែលជាអតីត​ប្រធានគណបក្សប្រឆាំង ក៏កំពុងរស់នៅនិរទេសខ្លួន បន្ទាប់ពីមាន​ពាក្យបណ្ដឹង​ជាច្រើន ត្រូវបានប្ដឹងប្រឆាំងរូបលោក ទៅកាន់តុលាការ នៅក្នុងប្រទេសកម្ពុជា។

អត្ថបទព័ត៌មាន របស់អង្គការសហប្រជាជាតិ បានស្រង់សំដី របស់អ្នកស្រីសាស្ត្រាចារ្យ រ៉ូណា ស្មីត (Rhona Smith) អ្នករាយការណ៍ពិសេស របស់អង្គការសហប្រជាជាតិ ស្ដីពីសិទ្ធិមនុស្ស ប្រចាំនៅិកម្ពុជា ដែលអ្នកស្រីបានថ្លែងកាលពីប៉ុន្មានថ្ងៃ មកបញ្ជាក់ថា អ្នកស្រីមានក្ដីកង្វល់​ជ្រាលជ្រៅ ចំពោះការបំភិតបំភ័យដល់ពលរដ្ឋ ដែលមិនចេញទៅបោះឆ្នោត និងអ្នកដែលអំពាវនាវឲ្យធ្វើពហិកា មិនចូលរួមការបោះឆ្នោត។ អ្នកស្រី បានអះអាង​ថា៖ «ការអំពាវនាវ ឲ្យធ្វើពហិការ មិនចូលរួមបោះឆ្នោត ដែលមិនមែន​ជាកាតព្វកិច្ចនោះ ត្រូវបានអនុញ្ញាតឲ្យធ្វើបាន»។

អ្នកស្រី រ៉ូណា ស្មីត ថែមទាំងត្រូវបានស្រង់សំដី ដែលអ្នកស្រីបានថ្លែង តាំងពីចុងខែមេសា មកពន្យល់បន្តថា វានឹងមិនអាច​មាន​​ការបោះឆ្នោត ដ៏ពិតប្រាកដ​នោះឡើយ ប្រសិនជាគណបក្សប្រឆាំង ដ៏សំខាន់មួយ ត្រូវបានរារាំង មិនឲ្យចូលរួមនោះ។ អ្នកស្រីបានអំពាវនាវ នៅពេលនោះ ឲ្យរដ្ឋាភិបាលកម្ពុជា​ដោះលែង​ជាបន្ទាន់ ក្រុមមេដឹកនាំ​គណបក្សប្រឆាំង ដែលកំពុងជាប់ឃុំ (ឬជាប់ពាក្យបណ្ដឹង) និងលើកចេញ នូវការរំលាយ​គណបក្សប្រឆាំង ដើម្បីអនុញ្ញាត​ឲ្យពួកគេ អាចចូលរួម​​ក្នុងការ​បោះឆ្នោត។

លោក «Stéphane Dujarric» បានបន្តថ្លែងអះអាងថា៖ «លោកអគ្គលេខាធិការ អ.ស.ប បានបញ្ជាក់ជាថ្មី នូវការប្តេជ្ញាចិត្តជាបន្ត របស់អង្គការសហប្រជាជាតិ ក្នុងការគាំទ្រ ដល់ប្រទេសកម្ពុជា ដែលមានសន្តិភាព និងមានប្រជាធិបតេយ្យ ជាពិសេសគាំទ្រ ដល់ប្រទេសកម្ពុជាមួយ ដែលគោរពយ៉ាងពេញលេញ នូវសិទ្ធិមនុស្សជាមូលដ្ឋាន របស់ពលរដ្ឋកម្ពុជាទាំងអស់»៕