ហេតុការណ៍បង្ករឡើង ដោយក្មេងស្ទាវ មិនស្គាល់អត្តសញ្ញាណនេះ បានកើតឡើង កាលពីវេលាម៉ោង ៦ និង​៣០នាទី ល្ងាចថ្ងៃទី ១៦ ខែកក្កដា ឆ្នាំ២០១៥ នៅតាមបណ្តោយផ្លូវ ព្រះស៊ីហនុ ខាងលិចវិមានឯករាជ្យ ទល់​មុខ​វិទ្យាស្ថានជាតិអប់រំ (NIE)។ ហេតុការណ៍នេះ ត្រូវបាន សាក្សីបញ្ជាក់ឲ្យដឹងថា ដំបូងឡើយ មានយុវជនម្នាក់ បើកម៉ូតូមកវាយអ្នក នៅអង្គុយកំពុងញ៉ាំអី ទាំងកំរោល បន្ទាប់មក យុវជនស្ទាវនោះ បានបើកម៉ូតូគេច ទៅបុក​ម៉ូតូដូមួយទៀត បណ្ដាលឲ្យដួលម៉ូតូ មុននឹងបានរត់គេចខ្លួន បាត់ស្រមោល។

ជនរងគ្រោះ ដោយការវាយតប់ ឈ្មោះ វង្ស បញ្ញាសំបូរ បានរៀបរាប់ថា ខ្លូន និងមិត្តភ័ក្រ កំពុងអង្គុយ មានគ្នា​៥នាក់ ហើយទិញរបស់ញ៉ាំនៅទីនោះ។ ស្រាប់តែជនបង្ក មិនដឹងបើកម៉ូតូមកពីណា ទាត់ខ្លួនមួយជើង​ពេញ​ទំហឹង ចំកណ្តាលមុខ  បន្ទាប់មកយកខ្សែក្រវ៉ាត់ មកវាយទាំងកំរោលទៀត។ ក្រុមមិត្តភក្កិយុវជននេះ បាន​ឃើញ​ដូច្នេះ ក៏បានតដៃ ដើម្បីជួយសង្គ្រោះ ពីការវាយប្រហារ របស់យុវជននោះ។

បន្ទាប់ពីហេតុការណ៍វាយតប់ នេះហើយ យុវជនបង្ក បានបើកម៉ូតូ ម៉ាកឌ្រីម សេរី ២០១៥ ស្លាកលេខ ភ្នំពេញ​១AQ-៣៥៨៣ ពណ៍ខ្មៅ ដើម្បីគេចខ្លូន តែបានជ្រុលទៅបុកម៉ូតូមួយទៀត បន្ទាប់មក បានរត់គេចខ្លួន​បាត់​ស្រមោល ដោយទុកឲ្យម្ចាស់ម៉ូតូ មកដោះស្រាយកម៉ូតូ។ ម្ចាស់ម៉ូតូបង្កឈ្មោះ ជា ស៊ិនហ៊ី បានប្រាប់ឲ្យដឹង​ថា មិត្តភក្កិ ដែលជាជនបង្កខាងលើ បានខ្ចីម៉ូតូខ្លួនទៅ ថាទៅយកសង្សា តែបែរជាមកបង្កបញ្ហាទៅវិញ។ យុវជន​ ស៊ិនហ៊ី មិនបានដឹងថា យុវជនបង្កហេតុនោះ មានបងប្អូននោះទេ គ្រាន់តែហៅឈ្មោះក្រៅថា ទី គ្មានមុខរបរ និងអាស័យដ្ឋានពិតប្រាកដឡើយ។

ចុងបញ្ចប់ម្ចាស់ម៉ូតូ បានសងថ្លៃការខូចខាត ទៅភាគីរងគ្រោះ ទាំងពីរ ដោយភាគីម៉ូតូរងគ្រោះ ទទួលបាន​ចំនួន ៨០ដុល្លា និងភាគីរងការវាយតប់ ចំនួន ៥ម៉ឺនរៀល។ តែផ្ទុយទៅវិញ ស្រ្តីជាម្តាយយុវជន បញ្ញាសំបូរ មិន​ព្រម​ទទួលយកសំណង ៥ម៉ឺនរៀលទេ។ អ្នកស្រី ម៉ម ចន្ថា បានលើកឡើងថា៖ «គេគ្រាន់តែបុកម៉ូតូ សង៨០ដុល្លា កូនខ្ញុំវាយចំភ្នែក ចូលពេទ្យចេញសងខ្ញុំ ៥ម៉ឺនរៀល ខ្ញុំមិនសុខចិត្តទេ»។

ម្ដាយយុវជនរងគ្រោះ បានបន្តដាក់ពាក្យប្តឹង នៅប៉ុស្តិ៍រដ្ឋាបាលនគរបាល ចតុមុខ នាម៉ោង ៩យប់ថ្ងៃ ខែ ឆ្នាំ ដដែល ដើម្បីទារថ្លៃព្យាបាល ឲ្យកូនអ្នកស្រីចំនួន៨០ដុល្លា៕