មិនគោរពច្បាប់ចរាចរណ៍ និងបើកបរទាំងបំពាន... នៅពេលដែលជួបគ្រោះថ្នាក់រួច បើទោះជាដឹងខ្លួន ស្គាល់​កំហុស... តែវាហួសពេលហើយ។ នៅក្នុងគ្រោះថ្នាក់ចរាចរណ៍មួយ ឪពុកម្តាយជាមនុស្សធំ មិនជួបបញ្ហា តែ​កូនតូច នៅក្នុងដៃ បែរជាត្រូវរបួសក្បាលទៅវិញ។ ហេតុការណ៍នេះ បានកើឡើង កាលពីវេលម៉ោង ០៤ ល្ងាច​ថ្ងៃទី១០ ខែកក្កដា ឆ្នាំ២០១៥ នៅពេលកំពុងភ្លៀង តាមបណ្តោយផ្លូវ ១៧៨ កែងផ្លូវលេខ ១៣ សង្កាត់​មានជ័យ ខណ្ឌដូនពេញ រាជធានីភ្នំពេញ។

សាក្សីនៅកន្លែងកើតហេតុ បានឲ្យដឹងថា ដំបូងម៉ូតូស្លាកលេខ ១Q-១៦៣៧ ដែលបើកបរដោយបុរស ជា​ឪពុក​ក្មេងស្រីរងគ្រោះ បានបើកម៉ូតូបញ្ច្រាសទិស ពីកើតទៅលិចតាមបណ្តោយផ្លូវខាងលើ ស្រាប់តែដល់កន្លែង​កើត​ហេតុ ម៉ូតូបានជល់ជាមួយឡាន ស្លាកលេខ ភ្នំពេញ២ ថ-៩៥០១ ម៉ាកសាំយ៉ុង របស់ក្រុមហ៊ុនឯកជនមួយ បណ្តាលឲ្យកូនស្រី ម្ចាស់ម៉ូតូរងគ្រោះ រងរបួសក្បាលធ្ងន់ធ្ងរ។

អ្នកបើករបម៉ូតូ ត្រូវបានគេស្គាល់ឈ្មោះ សារឿន ឆៃ អាយុ២០ ឆ្នាំ រស់នៅភូមិអន្លង់ឆ្លាត ស្រុកកោះធំ ខេត្ត​កណ្តាល។ រីឯប្រពន្ធឈ្មោះ ស៊ឹម ស៊ី អាយុ២៨ មានកូនស្រីពីរនាក់ ម្នាក់អាយុ ២ ឆ្នាំ និងម្នាក់ទោតអាយុ១ឆ្នាំ។ បន្ទាប់ពីកើតហេតុ ក្មេងស្រីរងគ្រោះ ត្រូវបានបញ្ជូន ទៅមន្ទីរពេទ្យគន្ធបុប្ផា ដើម្បីសង្គ្រោះជាបន្ទាន់។

ដោយឡែក ម្ចាស់រថយន្តឈ្មោះ សួន សុខ អាយុ ២០ ឆ្នាំ ជាអ្នកបើករថយន្ត របស់ក្រុមហ៊ុននំប៉័ងមួយ នៅ​សង្កាត់ទន្លេបាសាក់ខណ្ឌ ចំការមន រាជធានីភ្នំពេញ មិនមានរងរបួសនោះទេ។

មន្រ្តីចរាចរណ៍ លោក ជា មុន្នី បានបញ្ជាក់ប្រាប់ ទស្សនាវដ្តីមនោរម្យ.អាំងហ្វ ឲ្យដឹងថា ស្រ្តីបុរសម្តាយឪពុក​កុមារី​រងគ្រោះ បានសុំឲ្យមន្រ្តីចររាចរណ៍ សម្រួលបញ្ចប់រឿង ជាមួយម្ចាស់ឡាន ដោយទទួលស្គាល់ថា ខ្លូន​ជា​អ្នកខុស បើកទៅប៉ះឡាន។ មន្រ្តីដដែល បានបញ្ជាក់ទៀតថា អ្នកទាំងពីរគ្មានមុខរបរច្បាស់លាស់ទេ បច្ចុប្បន្ន​ជាគ្រួសារអនាថា នៅតាមផ្លូវ។ មិនតែប៉ុណ្ណោះ គ្រួសារនេះឧស្សាហ៍បង្កបញ្ហា វាយតប់គ្នា ក្នុងគ្រួសារណាស់ នៅពេលស្រវឹង៕