មិនមែនជារឿង ដែលទើបនឹងកើតមានថ្មីនេះទេ តែវាជារឿងចាស់ ដែលកើតឡើង តាំងពីដើមឆ្នាំ២០១៥​មក​ម្លេះ ហើយការព្រួយបារម្ភ របស់ប្រជាពលរដ្ឋមួយចំនូន ព្រះសង្ឃ និងនាយកសាលា នៅតែមានដដែល។ ទស្សនាវដ្ដី​មនោរម្យ.អាំងហ្វូ ធ្លាប់ធ្វើរបាយការណ៍ ពីករណីនេះម្ដងហើយ នៅពេលនោះ ដែលអាចរកអាន​ឡើង​វិញ​បាន ដោយចុចនៅលើទីនេះ។

ផ្ទុយពីការខ្វល់ខ្វាយ របស់ពលរដ្ឋ ព្រះសង្ឃ និងនាយកសាលា មកទល់នឹងពេលនេះ នៅលើចិញ្ចើមផ្លូវ​សាធារណៈ​នោះ រឹតតែមានការីកដុះដាល នូវតូបធ្វើអាជីវកម្មឯកជន កាន់តែច្រើនឡើងៗ (១ទៅ១០តូប)។ នោះ​ដោយសារតែ ការបារម្ភទាំងអស់ខាងលើ ត្រូវបានអាជ្ញាធរក្រុងប៉ោយប៉ែតបដិសេធ ដោយប្រាប់មក​វិញថា វាគ្មានផលប៉ះពាល់អ្វីធ្ងន់ធ្ងរឡើយ។

លោក ង៉ោ ម៉ែងជ្រួន អភិបាលក្រុងប៉ោយប៉ែត បានថ្លែងនៅរសៀលថ្ងៃទី១០ ខែកក្កដា ឆ្នាំ២០១៥នេះថា គ្មាន​ផលប៉ះពាល់ធ្ងន់ធ្ងរ ដូចអ្វីដែលអ្នកបារម្ភ បានលើកឡើងនោះទេ គឺលោកគ្រាន់តែចង់ឲ្យទីនោះ មាន​ភាព​អ៊ូរអរ និងគ្មានបរិស្ថានកខ្វក់ ដូចកាលពីមុនប៉ុណ្ណោះ។ លោកថា កន្លែងលក់នោះ ជាកន្លែងនៅតាម​ចិញ្ចើម​ផ្លូវ​ សារធារណៈមែន តែគេបើកលក់ តែពេលយប់ប៉ុណ្ណោះ។ ម្យ៉ាងទៀតលោកថា គ្មានសិស្សានុសិស្សណា ទៅ​សាលា​រៀនពេលយប់ឡើយ។ លោកបានបញ្ជាក់ ដោយប្រើសំដីខ្លាំងៗថា៖ «ខ្ញុំសួរ បើថា ប៉ះពាល់ដល់​សិស្ស តើសិស្សទៅរៀនយប់ឬ?»។

អភិបាលក្រុងខាងលើ បានបន្ថែមដោយចោទប្រកាន់ ទៅលើនាយកសាលា ព្រះសង្ឃ និងពលរដ្ឋថា ការ​បារម្ភ និងការហាមឃាត់ មិនឲ្យមានការសាង់សង់ តូបអាជីវកម្មនេះ គឺដោយសារអ្នកទាំងនោះ មិនទទួល​បានផល​ប្រយោជន៍។ តែលោកមិនបានប្រាប់ថា អ្នកដែលកំពុងទទួល បានផលប្រយោជន៍ ពីគម្រោងអាជីវកម្មទាំង​​នោះ ជាអ្នកណានោះទេ។ ទស្សនាវដ្តីមិនអាចលុំការបំភ្លឺ ពីលោកនាយកសាលា អៀរ លំអង បានទេ នៅថ្ងៃសៅរ៍​ទី១១ ខែកក្កដានេះ ដោយទូរស័ព្ទ​របស់លោកបានបិទ។

គួររំលឹកថា មកដល់ពេលបច្ចុប្បន្ន ទីតាំងតាមបណ្តោយផ្លូវសាធារណៈ ក្នុងភូមិបាលិលេយ្យទីមួយ សង្កាត់​ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ជាប់នឹងរបងវត្ត និងសាលាបឋមសិក្សានោះ សាងសង់​តូប​លក់ដូរ តម្លើងដោយគ្រឿងដែក បានជាង១០តូបរួចហើយ ដោយគ្មានការឃាត់ឃាំង ពីអាជ្ញាធរមូលដ្ឋាន​នោះ​ឡើយ៕