សង្គ្រាមពាក្យសម្ដី ជុំវិញរឿងព្រំដែន កម្ពុជា-វៀតណាម នៅបន្តទៅមុខ មិនចេះដាច់។ ហើយការឆ្លើយឆ្លង ទាក់ទងនឹងការយកជើង «ជាន់»ផែនទីផ្លូវការ ក៏ដូចជានៅទាន់ស្ងាត់នៅឡើយដែរ។ លើកនេះ ដល់វេនលោក ផៃ ស៊ីផាន រដ្ឋលេខាធិការ និងជាអ្នកនាំពាក្យ ទីស្ដីការគណៈរដ្ឋមន្ត្រីម្ដង ដែលបានសរសេរចោទ ដោយត្រង់ៗ តំណាងរាស្ត្រមណ្ឌលសៀមរាប លោក អ៊ុំ សំអាន ថាមានចេតនាយកជើងជាន់ផែនទីផ្លូវការ ដែលត្រូវបាន​ទេសរដ្ឋមន្ត្រីទទួលបន្ទុកខាងព្រំដែន លោក វ៉ា គឹមហុង យកមកបង្ហាញ នៅក្នុងសន្និសីទសារព័ត៌មាន កាល​ពីថ្ងៃទី២ ខែកក្កដា។

នៅលើគណនេយ្យហ្វេសប៊ុក «អង្គភាពប្រតិកម្មរហ័ស» ដែលគេស្គាល់ថា ជារបស់លោក ផៃ ស៊ីផាន នោះ មាន​សរសេរថា៖ «អ្នកតំណាងរាស្រ្ត អ៊ុំ សំអាន មណ្ឌលសៀមរាប របស់គណបក្សសង្រ្គោះជាតិ បានយកជើងជាន់​ដោយចេតនា លើផែនទីផ្លូវការ ដែលជាមរតករបស់ ព្រះបរមរតនកោដ្ឋ ជាទីសក្ការៈ ជាមួយនិង​(សេច)ក្ដី​ប្រកាស មិនទទួលស្គាល់ផែនទីផ្លូវការ ដែលបានតម្កល់នៅអង្គការ សហប្រជាជាតិ ដោយអះអាងបន្ថែមថា ផែនទី​ជា​ផ្លូវការ​នេះ គូសដោយភាគីវៀតណាម»។

មន្ត្រីអ្នកនាំពាក្យ របស់រដ្ឋាភិបាលជាន់ខ្ពស់ បានបន្តសរសេរទៀតថា៖ «ខ្ញុំប្រាកដមិនអាចទទួលយកបាន នូវ​សកម្មភាព និងពាក្យសម្ដីគ្មានការទទួលខុសត្រូវ ស្ដែងជាសាធារណៈ របស់អ្នកតំណាងរាស្រ្តរូបនេះ ដែល​ប្រមាថ និងវាយប្រហារលើដែនសមត្ថកិច្ច និងការ ទទួលខុសត្រូវរបស់រាជរដ្ឋាភិបាល ដែលអាចធ្វើអោយ​មាន ឧបសគ្គ​ចំពោះ​ការងារព្រំដែន រវាងប្រទេសទាំងពីរ ដែលបានប្រឌិតចោទថា “រាជរដ្ឋាភិបាលប្រើប្រាស់​ផែនទី ផលិត​ដោយ​ភាគី វៀតណាម”»។

ប៉ុន្តែអ្នកតំណាងរាស្ត្រខ្លួនឯង លោក អ៊ុំ សំអាន បានប្រតិកម្មករណីនេះរួចហើយ កាលពីថ្ងៃទី៣ ខែកក្កដា​ម្សិលម៉ិញ ទៅនឹងសារព័ត៌មានក្នុងស្រុកមួយ ដែលបានធ្វើរបាយការណ៍ ពីករណីនេះ ភ្លាមៗ នៅក្រោយ​សន្និសីទ​សារព័ត៌មាន របស់លោក វ៉ា គីមហុង។ នៅក្នុងលិខិតមួយ ផ្ញើរទៅសារព័ត៌មានក្នុងស្រុកនោះ លោក អ៊ុំ សំអាន បានបដិសេធថា លោកមិនបានយកជើង ជាន់លើផែនទីព្រំដែនទាំងនោះទេ។ រីឯការប្រកាស របស់​​លោក​ទេសរដ្ឋមន្ត្រី ថាប្រយ័ត្នកុំជាន់ផែនទី ព្រោះមានតែមួយសន្លឹកនោះ ជាការប្រកាសមិនចំពោះ ទៅកាន់​នរណា​​ម្នាក់​ឡើយ។ (សូម​អាន​លិខិតសិទ្ធិឆ្លើយតប របស់លោក អ៊ុំ សំអាន នៅខាងក្រោមអត្ថបទនេះ)

យ៉ាងណាក៏ដោយ លោក ផៃ ស៊ីផាន នៅមិនទាន់អស់ចិត្តទេ បើទោះជាលោកបានសរសេរ ចោទ​ប្រកាន់​តំណាងរាស្ត្រ មកពីគណបក្សប្រឆាំង ហើយក៏ដោយ។ នៅប្រមាណជា កន្លះម៉ោងក្រោយមក លោក ផៃ ស៊ីផាន បានសរសេរបន្ថែម នៅលើជញ្ជាំង គណនេយ្យហ្វេសប៊ុក លោកទៀតថា៖ «សូមអ្នកនយោបាយទាំងឡាយ មេត្តាកុំយកគំរូតាម អ្នកនយោបាយ​ទាំងពីរ​រូបនេះ ព្រោះទង្វើពួកគាត់ នឹងនាំមកអន្តរាយ ដល់ប្រទេសជាតិ។ (...) អ្នកតំណាងរាស្រ្ត អ៊ុំ សំអាន មណ្ឌល​សៀមរាប របស់គណបក្សសង្រ្គោះជាតិ ជាអ្នកជំនាញខាងញុះញង់ រឿង​ព្រំដែន រើសអើងពូជសាសន៍ ប្រឆាំង​​ជន​ជាតិ​វៀតណាម និងជាន់ផែនទីផ្លូវការ ដែលជាមរតករបស់ ព្រះ​បរមរតន​កោដ្ឋ ជាទីសក្ការៈ បាន​​តម្កល់​​នៅ​អង្គការ សហប្រជាជាតិ។»

ទស្សនាវដ្ដីមនោរម្យ.អាំងហ្វូ កំពុងព្យាយាមសុំប្រតិកម្ម ពីលោក អ៊ុំ សំអាន ហើយនឹងធ្វើការចុះផ្សាយ នូវ​ប្រតិកម្ម​របស់លោក នៅក្នុងអត្ថបទលើកក្រោយ៕

» សូមអានលិខិតរបស់លោក អ៊ុំ សំអាន ប្រតិកម្មទៅនឹងការផ្សាយ របស់សារព័ត៌មានក្នុងស្រុកមួយ ដូច​ខាង​ក្រោម៖