ហេតុការណ៍ បានទាក់ទាញឲ្យប្រព័ន្ធផ្សព្វផ្សាយ ពាសពេញប្រទេសអេស្ប៉ាញ យកមកចុះផ្សាយ យ៉ាង​ទ្រហឹង​អឺងអាប់ ជាពិសេស បានយកវីដេអូខាងលើនេះ យកទៅផ្សាយបន្តថែមទៀត។ គ្រួសារជាតិបារាំង​មួយ បាន​ធ្វើដំណើរទៅចូលរួម ក្នុងអាពាហ៍ពិពាហ៍ របស់មិត្តភ័ក្រ ហើយបានឈប់ចូល ទៅក្នុងហាង​លក់គ្រឿង សង្ហារឹម​មួយ​កន្លែង នៅតាមដងផ្លូវ ដើម្បីទិញអំណោយ សម្រាប់ពិធីមង្គលការនោះ។

ប៉ុន្តែរឿងដែលអាណោចអាធម បានកើតឡើង ដែលមិននឹកស្មានដល់។ គ្រួសារដែលមានគ្នាពីរនាក់នេះ បាន​ចូលទៅទិញអំណោយ ដោយ​ប្រើ​រយៈពេល រហូតដល់ទៅ ៤ម៉ោង និងបានទុក (ឬភ្លេច) ឲ្យសុនខ​ជំទង់​មួយ​ក្បាល អាយុ១៤ខែ ដែលជិះមក​ជា​មួយ នៅជាប់ក្នុងរថយន្ដ ចតចោលបិទកញ្ចក់ជិត ទាំងកណ្ដាល​ថ្ងៃ​ចេស។

ភ្នាក់ងារនគរបាលមួយរូប បានធ្វើអន្តរាគមន៍ នៅពេលនោះ ដោយបានគោះបំបែកកញ្ចក់រថយន្ដ ហើយ​បាន​យកទឹក មកចាក់ពីលើ និងបញ្ច្រកចូលមាត់ឆ្កែ។ ដូចនៅក្នុងវីដេអូ គេឃើញមនុស្សជាច្រើននាក់ បាន​ស្រក់​ទឹក​ភ្នែក នៅចំពោះការដង្ហក់របស់សត្វឆ្កែ។

ជាអកុសល សត្វឆ្កែមិនអាចទ្រាំទ្ររួច នឹងសីតុណ្ហភាពខាងក្រៅ ជិត៤០អង្សា និងខាងក្នុងរថយន្ដចតចោល ដោយបិទកញ្ចក់ ដែលមានសីតណ្ហភាពក្ដៅជាង ដល់ទៅជិត២ដងនោះទេ។ បន្ទាប់ពីបានយក ទៅ​ដល់​គ្លីនិក​ពេទ្យសត្វមួយ នៅក្បែរនោះ និងបើទោះជា​ត្រូវបានគ្រូពេទ្យសត្វ ជួយសង្គ្រោះយ៉ាងណាក៏ដោយ ក៏សត្វដ៏​កំសត់​​បាន​ស្លាប់ នៅបីម៉ោងក្រោយមក (ម៉ោងប្រមាណជា២០ ម៉ោងក្នុងស្រុក)។ សុនខបានរងគ្រោះ នឹង​កង្វះ​ជាតិទឹកនៅក្នុងខ្លួន ហើយប្រព័ន្ធគ្រឿងក្នុងរបស់វា ត្រូវបានក្រៀមខះ មិនអាចផ្សើម ឲ្យងើបដើរ​មក​វិញ​បាន។

ការស្ដាយក្រោយ របស់ម្ចាស់វា ជារឿងមួយដែលត្រូវមានវិប្បដិសារី អស់មួយជីវិត។ ប៉ុន្តែមិនមែនតែប៉ុណ្ណឹងទេ ព្រោះប្រព័ន្ធយុត្តិធម៌ របស់ប្រទេសអេស្ប៉ាញ អាចនឹងចាត់វិធានការ ទៅលើម្ចាស់ឆ្កែទាំងពីរ ពីបទ​ខ្ជីខ្ជា​ចំពោះ​សត្វ ដែលខ្លួនចិញ្ចឹមនោះថែមទៀត៕