សឹងតែជាក្លាយជាវប្បធម៌មួយ ដែលអ្នកប្រើប្រាស់ទ្រូងថ្នល់ទូទៅ បានជួបនឹងគ្រោះថ្នាក់ចរាចរណ៍រួច បាន​រត់​ចោលកន្លែងកើតហេតុ ជាពិសេសនៅពេលដែលដឹងថា ភាគីម្ខាងទៀត បានរងគ្រោះធ្ងន់ធ្ងរ។ តើលទ្ធផល​ចុង​ក្រោយជាអ្វី? លទ្ធផលនៃការទទួលខុសត្រូវ នឹងធ្លាក់មកលើ អ្នកប្រើប្រាស់ទ្រូវផ្លូវ ដែលរត់ចោល កន្លែងកើត​ហេតុនោះដដែល ដោយត្រូវចាត់ទុក មិនត្រឹមតែបានបំពាន ច្បាប់​ចរាចរណ៍ជាធរមាននោះទេ តែថែមទាំងជា​ទង្វើអសីលធម៌ គ្មានមនុស្សធម៌។

នេះជាហេតុការណ៍ គ្រោះថ្នាក់ចរាចរណ៍ រហូតមានមនុស្សស្លាប់ ដ៏អាណោចអធមមួយទៀត ដែលបានកើត​ឡើង នៅថ្ងៃទី១៥ ខែមិថុនា ឆ្នាំ២០១៥ វេលាម៉ោង១៦ និង៣០នាទី នៅលើផ្លូវលេខ ១២៩ ស្ថិតក្នុងភូមិទួល​ចារ ឃុំសំរោង ស្រុកសំរោង ខេត្តតាកែវ រវាងរថយន្ត និងម៉ូតូ ២គ្រឿង ដែលបើកបរ ក្នុងទិសដៅបញ្ច្រាស់គ្នា។

បើតាមរបាយការណ៍ របស់អធិការដ្ឋាននគរបាល ស្រុកសំរោង បានឲ្យដឹងថា រថយន្តម៉ាក កូរ៉េ ពណ៌ ស មិន​ស្គាល់​ផ្លាកលេខ មានអ្នកបើកបរមិនស្គាល់អត្តសញ្ញាណ តែបុរសរូបនោះបានគេចខ្លូនបាត់ បន្ទាប់ពីកើតហេតុ។ បុរសនោះបើកបរ ពីលិចទៅកើត រហូតមកដល់ ចំណុចខាងលើ បានបុកពេញទំហឹង ជាមួយម៉ូតូ០២គ្រឿង ដែល​បើកមកពីទិសផ្ទុយគ្នា បណ្តាលឲ្យភាគីរងគ្រោះស្លាប់ម្នាក់ និងរងរបួសធ្ងន់ម្នាក់។

ម៉ូតូរបស់ជនរងគ្រោះធុន ស្មាស់រ៉េវ៉ូ ពណ៌ខ្មៅ សេរី២០១០ ពាក់ផ្លាកលេខ ក្រុង ព្រះសីហនុ1A-3524 បើកបរ​ដោយបុរសរងគ្រោះឈ្មោះ ង៉ែត វុធ ភេទប្រុស អាយុ ៣៤ឆ្នាំ ជាកសិករ រស់នៅភូមិកន្សោមផ្អក ឃុំសំរោង ស្រុក​សំរោង បានស្លាប់នៅកន្លែងកើតហេតុ និងអ្នករួមដំណើរឈ្មោះ អៀន ង៉ែត ភេទស្រី អាយុ៣២ឆ្នាំ ត្រូវជាប្រពន្ធ រងរបួសធ្ងន់។

ចំណែកឯម៉ូតូមួយគ្រឿងទៀតធុន HONDA C125 សេរីឆ្នាំ២០០៨ ពណ៌ខ្មៅ ពាក់ផ្លាកលេខ តាកែវ 1C-2465 បើក​បរដោយឈ្មោះ នឹម ចែម ភេទប្រុស អាយុ៤៣ឆ្នាំ កិសិករដូចគ្នា រស់នៅភូមិម៉ឺនទំរង់ ឃុំស្រង៉ែ ស្រុកទ្រាំង របួស​ធ្ងន់ដែរ។ ក្រោយពេលកើតហេតុ សមត្ថកិច្ចបានចុះដល់កន្លែង ហើយបានធ្វើកោសល្យវិច័យ រួចបញ្ជូន​ជនរង​គ្រោះ ទៅកាន់មន្ទីរពេទ្យបង្អែកខេត្តតាកែវ។

រីឯសាកសពវិញ ត្រូវបានប្រគល់ឲ្យក្រុមគ្រួសារ យកទៅធ្វើបុណ្យ តាមប្រពៃណីនៅឯស្រុកកំណើត និងបាន​ដក​ហូតវត្ថុតាង ដែលពាក់ព័ន្ធ យកទៅរក្សាទុក នៅអធិការដ្ឋាននគរបាលស្រុកសំរោង ដើម្បីបំពេញបែបបទ តាម​នីតិវិធីច្បាប់៕

» រូបភាពខាងក្រោមនេះ បង្ហាញពីភាពរន្ធត់ នៃការរងរបួស គ្រប់ដណ្ដប់ដោយឈាមយ៉ាងធ្ងន់ធ្ងរ ប្រកប​ដោយ​ការ​ឈឺចាប់ ជាទីបំផុត។ ប៉ុន្តែក្រមវិជ្ជាជីវៈ បានកំណត់ឲ្យទស្សនាវដ្ដី ចាំបាច់ត្រូវធ្វើការ បិតបាំងរូបភាពនេះ។