សង្គ្រាមពាក្យសម្តី រវាងថ្នាក់ដឹកនាំកំពូល នៃគណបក្សទាំងពីរ ក្នុងរដ្ឋសភា ដូចជាបានកម្រើកសារជាថ្មី ក្រោម​ប្រធានបទ«ស្បថ» ឲ្យ«រន្ទៈបាញ់» របស់លោកនាយករដ្ឋមន្រ្តីកម្ពុជា ទៅលើនរណា ឬគណបក្សណាមួយ ដែល​ភូតភរ កុហក បោកប្រាស់ប្រជាពលរដ្ឋ ដើម្បីជាការព្រមានមួយ សម្រាប់រក្សាទុក នូវ«វប្បធម៌សន្ទនា»។ ប៉ុន្តែ​សម្រាប់​លោក សម រង្ស៊ី មេដឹកនាំគណបក្សប្រឆាំងវិញ បានថ្លែងអះអាងថា «វប្បធម៌សន្ទនា»នៅតែបន្ត មិន​អាច​បាត់បង់បាន ប៉ុន្តែអាចធ្វើទៅបាន ក៏អាស្រ័យលើការពិត និងយុត្តិធម៌ដែរ។

ថ្លែងទៅកាន់អ្នកសារព័ត៌មាន នាព្រលានយន្តហោះអន្តរជាតិភ្នំពេញ កាលពីព្រឹកថ្ងៃទី១០ ខែមិថុនានេះ លោក សម រង្ស៊ី ប្រធានគណបក្សសង្គ្រោះជាតិ បានថ្លែងឡើងថា មកទល់នឹងពេលនេះ គណបក្សទាំងពីរនៅ តែ​គោរព​វប្បធម៌សន្ទនាទាំងអស់គ្នា។ លោកថា គណបក្សទាំងពីរនៅតែមានឱកាសច្រើន ក្នុងការជួប និងជជែក​ជាមួយ​គ្នា​តាមវប្បធម៌សន្ទនារបស់ខ្លួន។ លោកបន្តថា ការជជែកគ្នា ជាយុត្តិសាស្រ្តមួយដ៏ត្រឹមត្រូវ ដែលប្រកាន់ភ្ជាប់លើ​ការ​ពិត និងភាពយុត្តិធម៌ សម្រាប់ជនរងគ្រោះ និងប្រជាពលរដ្ឋខ្មែរទាំងមូល។

លោក សម រង្ស៊ី បានអះអាងទៀតថា វប្បធម៌សន្ទនា ត្រូវតែមាន និងច្បាស់លាស់។ លោកបានថ្លែងឲ្យដឹងថា៖ «នេះ ជារបត់នយោបាយ។ មិនត្រឹមតែ ជារបត់នយោបាយប៉ុណ្ណោះទេ នេះជារបត់ប្រវត្តិសាស្រ្ត ដែលមាន​សារៈ​សំខាន់ និងសារប្រយោជន៍ យ៉ាងធំធេង។ (...) វប្បធម៌សន្ទនា ពលរដ្ឋភាគច្រើនបានយល់ដឹង និងមួយចំនួន កំពុង​ធ្វើការតាមដាន។ អ្នកមិនយល់ នឹងយល់ពីទឹកចិត្ត និងគោលបំណងរបស់ខ្ញុំ។»

ជុំវិញ ការថ្លែងទាក់ទងនឹងព្រំដែន និងបញ្ហាកាកបាតក្រហម ដែលធ្វើឲ្យលោក ហ៊ុន សែន បបួលលោកទៅ​ស្បថ​នោះ ត្រូវបានលោក សម រង្ស៊ី ជឿថា ប្រជាពលរដ្ឋជាជនរងគ្រោះ ហើយបានបាត់បង់ដីធ្លី ស្រែចំការយ៉ាងណា​នោះ ប្រទេសកម្ពុជា បានបាត់បង់ទឹកដី យ៉ាងដូច្នោះដែរ។ ចំពោះបញ្ហា កាកបាទក្រហមកម្ពុជា ធ្វើការចែក​អំណោយ ឲ្យតែសកម្មជនគណបក្សរបស់ខ្លួន និងមិនចែកឲ្យសកម្មជន មកពីគណបក្សសង្គ្រោះជាតិនោះ ត្រូវ​បាន​ប្រធានគណបក្សប្រឆាំងបដិសេធថា លោកមិនបានលើកឡើងទេ។ តែករណីនេះ លោកបានលឺអ្នកខ្លះ លើក​មកនិយាយ និងគួរឲ្យមាន ការស៊ើបអង្កេត ឲ្យបានច្បាស់លាស់៕