សារព័ត៌មាន «Washington Post» បានបង្ហាញពីរបាយការណ៍ស៊ើបអង្កេត របស់ខ្លួន ស្ដីពីការបាញ់សម្លាប់របស់នគរបាល ដែលបានធ្វើឡើង នៅទូទាំងប្រទេស ក្នុងនោះមនុស្សចំនួន៣៨៥នាក់ ត្រូវបានសម្លាប់ ដោយនគរបាលអាមេរិក រាប់ចាប់​តាំងពីខែមករាមក។

តួលេខ ដែលបង្ហាញថា មនុស្សយ៉ាងតិច ២នាក់ ត្រូ​វបានសម្លាប់ដោយនគរបាលអាមេរិក មានលក្ខណៈខ្ពស់ជាង របាយ​ការណ៍ស្ថិតិ ដែលចេញផ្សាយដោយ រដ្ឋាភិបាលសហព័ន្ធ (រដ្ឋាភិបាលកណ្ដាល) នៅក្នុងរយៈពេល១០ឆ្នាំចុងក្រោយ​នេះ។ របាយការណ៍នោះ ត្រូវបានពន្យល់ថា បានដកស្រង់ចេញ តែពីតួលេខមិនពេញលេញ របស់ស្នងការដ្ឋាននគរ​បាល​តំបន់​នានា ដោយហេតុថា ពួកគេទាំងនោះ មិនមានភាពចាំបាច់ ក្នុងការធ្វើរបាយការណ៍បញ្ជាក់ បន្ទាប់ពីការបាញ់សម្លាប់​ណា​មួយ ដោយកងកម្លាំងអាជ្ញាធរនោះឡើយ។

របាយការណ៍របស់សារព័៌មាន បានចេញផ្សាយ ខណៈសហរដ្ឋអាមេរិក កំពុងស្ថិតក្នុងរលកតវ៉ា របស់ពលរដ្ឋខ្លួន ប្រឆាំង​នឹងអំពើហិង្សា និងការបាញ់សម្លាប់ «ឆៅៗ» ដោយកងកម្លាំងនគរបាល ជាពិសេសទៅលើពលរដ្ឋស្បែកខ្មៅ និង​ពលរដ្ឋ​មានដើមកំណើត មកពីអាមេរិកឡាទីន (ទ្វីបអាមេរិកខាងត្បូង)។

១៦% គ្មានអាវុធនៅនឹងដៃ

សារព័ត៌មាន បានអះអាងទៀតថា ពលរដ្ឋស្បែកខ្មៅអាមេរិក បានក្លាយជាជនរងគ្រោះ ពីការបាញ់សម្លាប់ របស់​នគរបាល មានកម្រិតដល់ទៅ៣ដង ច្រើនជាងបណ្ដាជនផ្សេងទៀត តាំងពីដើមឆ្នាំ២០១៥។ បើតាមរបាយការណ៍ដដែលនោះ មនុស្ស​ភាគច្រើន ដែលត្រូវបានសម្លាប់ សុទ្ធតែមានបំពាក់ ឬកាន់អាវុធ នៅនឹងខ្លួន ជាពិសេសកាំភ្លើងខ្លី ខណៈមនុស្ស មួយ​ចំនួន​ទៀត មានកាន់កាំបិត និងវត្ថុចុងស្រួច ឬវត្ថុដ៏គ្រោះថ្នាក់ផ្សេងៗ។ ការស៊ើបអង្កេតរបស់សារព័ត៌មាន បាន​រក​ឃើញ​ថា មានមនុស្ស១៦% ដែលមិនមានបំពាក់ដោយអាវុធ ឬវត្ថុគ្រោះថ្នាក់ ក៏ត្រូវបានសម្លាប់ដែរ។

សម្លាប់ព្រោះមានដងអំបោស

ការសម្លាប់ទាំងនេះ ភាគច្រើន កើតចេញ ពីជម្លោះឆ្លើយឆ្លងឌឺដង រវាងនគរបល និងសមាជិកសហគមន៍ ដែល​ស្ថាន​ការណ៍ ប្រែក្លាយជាគ្រប់គ្រង់លែងបាន។ សារព័ត៌មានបានលើកយកករណីមួយ ក្នុងរដ្ឋផ្លរីដា (Florida) មកបញ្ជាក់ថា នគរបាលបានសម្លាប់ ជនមានសតិមិនគ្រប់មួយរូប ដោយគ្រាន់តែជននេះ គ្រវីដងអំបោសនៅនឹងដៃ។ ម្ដាយរបស់​ជន​នេះ បានទូរស័ព្ទហៅនគរបាល ព្រោះគាត់មិនអាចហៅ ឲ្យចូលផ្ទះបាន ដោយខ្លាចត្រជាក់៕