នេះ ជាកំពូលវេជ្ជសាស្ត្រ ទើសមេឃ ដែលគេអាចវះកាត់ ប្ដូរទម្រង់មុខមនុស្សបាន ហើយក៏បានផ្ដល់ក្ដីសង្ឃឹម និង​ជីវិតមួយថ្មី ទៅមនុស្សដែលមានមុខ ខូចទ្រង់ទ្រាយនោះដែរ។ ប៉ុន្តែមិនមែនមានត្រឹមតែក្ដីសង្ឃឹមប៉ុណ្ណោះ​ទេ តែវាថែមទាំង បានបង្កើតការរញ្ជួលចិត្ត ទៅដល់មនុស្សជាច្រើន ដែលនៅជុំវិញនោះទៀត។

យុ​វជន ចូសហាវ អាវ៉ែសាណូ (Joshua Aversano) បានស្លាប់ទៅទាំងវ័យក្មេង ត្រឹមតែអាយុ២១ឆ្នាំប៉ុណ្ណោះ ដោយ​បណ្ដាលមកពី គ្រោះថ្នាក់ចរាចរណ៍ ដ៏រន្ធត់មួយ កាលពី៣ឆ្នាំមុន។ ចំពោះយុវជន រីឆារ ណូរីស វិញ បាន​សឹងតែបានបាត់បង់ជីវិតទៅដែរ កាលពីឆ្នាំ១៩៩៧ ដោយសារតែបានលលេង ជាមួយនឹងកាំភ្លើង ហើយ​បាន​រាកៃ មកប៉ះចំមុខខ្លួនឯង។ តែមរណៈភាពរបស់យុវជន ចូសហាវ អាវ៉ែសាណូ បានផ្ដល់ក្ដីសង្ឃឹមថ្មី ទៅឲ្យ​យុវជន រីឆារ ណូរីស ដើម្បីបានរស់នៅ ដូចគេឯងជាបន្តទៀត។

ដោយសារប៉ិនប្រសព្វ របស់គ្រូពេទ្យជំនាញ ជាមួយនឹងប្រព័ន្ធវេជ្ជសាស្ត្រដ៏ទំនើបនោះផង ទើបធ្វើឲ្យយុវជន រីឆារ បានមានជីវិតថ្មី ដោយមានមុខមាត់របស់យុវជន ចូសហាវ។ ហើយក្នុងឱកាសថ្មីនេះ បងស្រីរបស់យុវជន ចូសហាវ គឺនាង រ៉ូបេកា អាវ៉ែសាណូ បានធ្វើដំណើរទៅជួបយុវជន រីឆារ ដើម្បីអាចឃើញឡើងវិញ នូវមុខមាត់ នៃអតីតបងប្អូនបង្កើតរបស់នាង។ មុខមាត់ដែលនាងធ្លាប់ស្គាល់ គឺប្អូនប្រុសនាង ដែលបានស្លាប់ទៅ អស់​រយៈ​កាល៣ឆ្នាំមកហើយ។

យុវជន ចូសហាវ អាវ៉ែសាណូ នៅពេលមានជីវិត។

ការជួបគ្នាេះ ត្រូវបានថតដាក់ក្នុងកម្មវិធីទូរទស្សន៍មួយ នៅប្រទេសអូស្ត្រាលី ដែលមានចំណងជើងថា ​«៦០​​នាទី (60 Minutes)» ដែលត្រូវបានចាក់ផ្សាយ កាលពីថ្ងៃទី៣១ ខែឧសភាកន្លងទៅនេះ។ ជាការពិត​ហើយ ការ​ជួប​គ្នា​នេះ បានបង្កឲ្យមានការរញ្ជួលចិត្ត បានកើតឡើង ជាពិសេសសម្រាប់នាង រ៉េបេកា។ នាងបាន​ថ្លែង​ឡើង​ថា៖ «នេះ​ជាមុខមាត់ ដែលខ្ញុំធ្លាប់បានរស់នៅជាមួយ តាំងតែពីតូច រហូតដល់ធំ»។

នាងបានសួរទៅយុវជន រីឆារ ថា៖ «តើខ្ញុំអាចប៉ះមុខ របស់អ្នកឯងបានឬទេ?»

សម្រាប់គ្រួសាររបស់នាង រ៉ូបេកា ការកាន់មរណៈទុក្ខ ឲ្យយុវជន ចូសហាវ បានកន្លងផុត និងបានរសាយរួច​ខ្លះ​ទៅ​ហើយ ហើយក្ដីកង្វល់ផ្សេងៗ ក៏បានផុតរលត់អស់ដែរ។ ឪពុករបស់នាង រ៉ូបេកា ធ្លាប់បានថ្លែងកាល​ពីឆ្នាំ​២០១៣​មកថា៖ «ខ្ញុំគិតថា កូនខ្ញុំ ចូលហាវ ទំនងជាចង់បានអញ្ចឹង។ (...) ហើយនេះ ក៏ជាក្ដីសង្ឃឹមតែមួយគត់ សម្រាប់​យុវជន រីឆារ ដែរ។»៕