ខៀវ សុភ័គ៖ ជុន ច័ន្ទបុត្រ ជា«ឆ្កែបម្រើ»ឲ្យប្រធានវិទ្យុអាស៊ីសេរី
- ដោយ: ដារា រិទ្ធ ([email protected]) - ភ្នំពេញ ថ្ងៃទី០២ ឧសភា ២០១៧
- កែប្រែចុងក្រោយ: May 02, 2017
- ប្រធានបទ: ប្រព័ន្ធផ្សព្វផ្សាយ
- អត្ថបទ: មានបញ្ហា?
- មតិ-យោបល់
-
លោក ហួត វុទ្ធី ហៅ ជុន ច័ន្ទបុត្រ កំពុងមាន«ឈ្មោះហៅ»ថ្មីមួយទៀត ពីសំណាក់លោក ខៀវ សុភ័គ អ្នកនាំពាក្យក្រសួងមហាផ្ទៃ៖ «ឆ្កែបម្រើ»។ លោក ខៀវ សុភ័គ បានហៅលោក ហួត វុទ្ធី ដូច្នេះ នៅក្នុងកិច្ចសម្ភាសមួយ ជាមួយសារព័ត៌មាន ខេមបូឌា ដេលី (The Cambodia Daily) កាលពីម្សិលមិញ ក្រោមហេតុផលថា លោក ហួត វុទ្ធី បានស្ដាប់បញ្ជាគេ «ឲ្យចាកចេញ» ពីប្រទេសកម្ពុជា។
លោក ហួត វុទ្ធី ដែលជាអ្នកសារព័ត៌មាន និងជានាយករងវិទ្យុអាស៊ីសេរី ផ្នែកខេមរភាសា បានចាកចេញពីកម្ពុជា កាលពីរសៀលថ្ងៃសុក្រ ទី២៨ ខែមេសា នៅប៉ុន្មានថ្ងៃ បន្ទាប់ពីលោកបានរង ការចោទប្រកាន់ពីអាជ្ញាធរ ថាលោកបានធ្វើ «សេចក្ដីប្រកាសក្លែងបន្លំ» ដើម្បីបានចូល ទៅក្នុងពន្ធនាគារព្រៃស កាលពីថ្ងៃ១៩ ខែមេសា កន្លងមក ជាមួយនឹងក្រុមតំណាងរាស្ត្រ មកពីគណបក្សសង្គ្រោះជាតិ។
ការចោទប្រកាន់នោះ មិនបានប្រើរយៈពេលច្រើនឡើយ ដើម្បីឲ្យតុលាការសាលាដំបូងរាជធានីភ្នំពេញ តាមរយៈព្រះរាជអាជ្ញារង លោក សៀង សុខ ចេញដីកានៅថ្ងៃទី២១ ខែមេសា កោះហៅលោក ហួត វុទ្ធី ក្នុងនាមជា«ជនសង្ស័យ» ឲ្យចូលទៅបង្ហាញខ្លួន នៅថ្ងៃទី២ ខែឧសភានេះ។
តែអ្នកសារព័ត៌មានរូបនេះ មិនបានមកបង្ហាញខ្លួន តាមដីកាកោះទេ។ កាលពីពេលកន្លងមក លោកបានបដិសេធការចោទប្រកាន់ និងអះអាងថា លោកមិនបានក្លែងឈ្មោះពិត របស់លោក នៅក្នុងបញ្ជីកត់ឈ្មោះ អ្នកចូលពន្ធនាគារនោះឡើយ។
នៅក្នុងសេចក្ដីថ្លែងការណ៍មួយ ដែលចេញផ្សាយ នៅយប់ថ្ងៃទី១ ខែឧសភា បានឲ្យដឹងថា ស្ថាប័នវិទ្យុអាស៊ីសេរី ពីរដ្ឋធានី វ៉ាស៊ីនតោន សហរដ្ឋអាមេរិក បានសម្រេច មិនឲ្យលោក ហួត វុទ្ធី វិលត្រឡប់ទៅប្រទេសកម្ពុជាវិញទេ។ ស្ថាប័នផ្សព្វផ្សាយចម្រុះភាសាមួយនេះ បានចាត់ទុក ចំណាត់ការរបស់អាជ្ញាធរកម្ពុជា ប្រឆាំងលោក ហួត វុទ្ធី គឺជារឿងនយោបាយ ក្នុងចេតនាបង្វែង ចំណាប់អារម្មណ៍ប្រជាពលរដ្ឋខ្មែរ ក្នុងរដូវកាលបោះឆ្នោត និងរឹតតែបង្ហាញឲ្យឃើញ នូវស្ថានភាពដ៏អាក្រក់ នៃសេរីភាពសារព័ត៌មាន នៅកម្ពុជា។
សម្រាប់លោក ខៀវ សុភ័គ អ្នកនាំពាក្យក្រសួងមហាផ្ទៃកម្ពុជាវិញ មិនបានយល់ដូច្នោះឡើយ។ លោកបានថ្លែងថា៖ «(នេះ)បញ្ជាក់ឱ្យឃើញថា វិទ្យុអាស៊ីសេរី តាំងពីដើមរៀងមក ជាវិទ្យុមិនអព្យាក្រឹត ជាវិទ្យុដែលមានបំណង ផ្ដួលរំលំរាជរដ្ឋាភិបាល ដែលបោះឆ្នោតដោយប្រជាពលរដ្ឋកម្ពុជា»។
អ្នកនាំពាក្យរូបនេះ បានចោទលោក ហួត វុទ្ធី ហៅ ជុន ច័ន្ទបុត្រ ថាជា «ឆ្កែបម្រើ» ឲ្យប្រធានវិទ្យុអាស៊ីសេរី តាំងពីដើមរៀងមក «ព្រោះវាស្ដាប់បញ្ជាគេ» ឱ្យចាកចេញពីប្រទេសកម្ពុជា។ លោក ខៀវ សុភ័គ បានឲ្យដឹងទៀតថា អាជ្ញាធរនឹងចាត់វិធានការ ជាបន្តទៅទៀត ទៅលើលោក ហួត វុទ្ធី ក្នុងករណីមិនមកបង្ហាញខ្លួន ក្នុងថ្ងៃទី២ ខែឧសភានេះ នៅសាលាដំបូងរាជធានីភ្នំពេញ។
មិនខុសទេ! ត្បិដអីនៅរសៀលថ្ងៃទី ២ ខែឧសភាដដែល អយ្យការអមសាលាដំបូងរាជធានីភ្នំពេញ បានចេញដីកាមួយទៀត បង្គាប់ឱ្យអាជ្ញាធរប្រើប្រាស់កម្លាំងសាធារណៈ ដើម្បីបង្ខំឱ្យលោក ជុន ច័ន្ទបុត្រ បង្ហាញខ្លួននៅតុលាការភ្លាម ខណៈអ្នកសារព័ត៌មានរូបនេះ បានទៅដល់សហរដ្ឋអាមេរិក រួចទៅហើយ។ នៅក្នុងដីកាថ្មីនោះ អយ្យការតុលាការ បានសំអាងពីមូលហេតុថា ដោយសារតែការគេចវេស របស់លោក ហួត វុទ្ធី ចំពោះសវនាការឆ្លើយបំភ្លឺ នៅថ្ងៃនេះ៕