ការឈ្លោះប្រកែកគ្នា ដល់ថ្នាក់«វាយតប់» មិនមែនជាដំណោះស្រាយដ៏ល្អ នៅក្នុងសង្គមនោះឡើយ បើទោះជានៅក្នុង សមាគម​តែមួយ ឬផ្សេងគ្នា ឬនៅទីណាក៏ដោយ។ ការវាយដំ នៅលើរូបរាងកាយ ជាអំពើអសីលធម៌ និងខុសពីច្បាប់រដ្ឋ ដែលអាចនឹង​ត្រូវ​ផ្ដន្ទាទោស ឲ្យជាប់ពន្ធនគារ។

ប៉ុន្តែ ហេតុការណ៍វាយតប់ ជៀសមិនរួច រវាងសមាជិកគ្នាឯង ក្នុងសមាគមតែមួយនេះ បានកើតឡើង កាលពីវេលាម៉ោ៧ និង៣០នាទី ល្ងាចថ្ងៃទី២៨ ខែឧសភា ឆ្នាំ២០១៥ នៅក្បែរផ្សារអូឬស្សី ក្នុងសង្កាត់បឹងព្រលឹតទី១ ខណ្ឌ៧មករា រាជធានី​ភ្នំពេញ។ ហេតុការណ៍នោះ បានបណ្តាល ឲ្យបុរសម្នាក់ ក្លាយជាជនរងគ្រោះ រងរបួសត្រង់ដៃ ចង្ការ និងពោះ ហើយត្រូវ​បាន​បញ្ជូន ទៅមន្ទីពេទ្យឯកជនឈ្មោះ «សម្ភពសុក្រិត្យ»។

ករណីនេះ ត្រូវបានប្រភពបានការមួយ បញ្ជាក់ថា ហេតុការណ៍ដំបូង ដែលបណ្តាលឲ្យមាន ការវាយតប់គ្នានេះ បណ្តាល​មក​ពីការជំពាក់លុយគ្នា រវាងភាគីរងគ្រោះ និងភាគីម្ចាស់លុយ។

ប្រភពបានបន្តទៀតថា ភាគីរងគ្រោះឈ្មោះ យូ រដ្ឋា ជាអ្នករត់ម៉ូតូឌុប បានជំពាក់លុយ បុរសម្នាក់ទៀតឈ្មោះ ម៉េង ជាអ្នក​រត់រឺម៉កកង់បី នៅក្នុងសមាគជាមួយគ្នា មិនដឹងតាំងពីពេលណាមកទេ។ រហូតមកដល់ថ្ងៃកើតហេតុ ភាគីម្ចាស់លុយ បាន​មកទារការប្រាក់ ពីភាគីជំពាក់ ដែលមិនបានឃើញបង់ឲ្យខ្លួន ដូចរាល់ខែមកទេ។ តែពេលមកដល់ ភាគីជំពាក់ប្រកែកថា ខែនេះខ្លួនគ្មានលុយទេ។

កម្ដៅបានផ្ទុះឡើង រវាងបុរសទាំងពីរ ដោយបង្ក ជាសម្លេងខ្លាំងៗដាក់គ្នា មុននឹង«ចេញក្បាច់គុណ ដែលហាត់ចេះ​រៀងៗ​ខ្លួន» ធ្វើការវាយតប់គ្នា ទៅវិញទៅមក នៅកន្លែងកើតហេតុ។ តែដោយម្ចាស់លុយ មានគ្នា៤នាក់ រីឯជនរងគ្រោះមាន​តែ​ម្នាក់ឯង ទោះចេះ«ក្បាច់គុន»យ៉ាងណា ក៏ត្រូវភាគីម្ចាស់លុយ វាយឲ្យរបួសជាធម្ងន់។

បន្ទាប់ពីវាយដំគ្នា រហូតដល់មានរបួស បែកឈាមនេះ ភាគីទាំងសងខាង ត្រូវបានប្រធាននៅក្នុងសមាគមរបស់ខ្លួន ចូល​មកសម្របសម្រួល ឲ្យដោយបញ្ជូនអ្នករងគ្រោះ ទៅមន្ទីពេទ្យ និងនិយាយសម្រុះសម្រួល ឲ្យសងលុយ ទៅភាគីម្ចាស់​ទ្រព្យ​វិញ នៅពេលជាសះស្បើយ។ អ្នកទាំងពីរ បានស្រុះស្រួលគ្នា ដោយមានសាក្សីនៅជាមួយ ដើម្បីបញ្ចប់រឿង៕