១០ឆ្នាំក្នុងពន្ធនាគារ ព្រោះបានថតចម្រៀងមួយ ដែលមានលក្ខណៈ អាសអាភាសជ្រុល សម្រាប់ក្រសែភ្នែក នៃប្រព័ន្ធ​យុត្តិធម៌ របស់ប្រទេសអ៊ូហ្គង់ដា។ នេះជាទោស ដែលប្រព័ន្ធយុត្តិធម៌ របស់ប្រទេសអាហ្វ្រិកខាងកើត មួយនេះ អាចនឹង​ដាក់​ប្រឆាំងនឹងតារាចម្រៀងវ័យ២១ឆ្នាំ នាង ចេមីណា កានស៊ីអីម។ នាងត្រូវបានចោទប្រកាន់ ថាបានប្រព្រឹត្តិល្មើស​នឹង​ច្បាប់ ព្រោះធ្វើរឿងអនាចារ បង្ហាញសាច់សុដន់ និងកំប៉េះគូទ ជ្រុលហួសហេតុ នៅក្នុងឃ្លីបចម្រៀង របស់នាង។

ឃ្លីបចម្រៀងរបស់នាង ដូចលោកអ្នក បានទស្សនានៅខាងលើ មានចំណងជើងដើមថា «In ensolo Yange»។ ឃ្លីបនេះ ត្រូវបាន​យក​មកបង្ហោះ កាលពីចុងខែកញ្ញាឆ្នាំមុន ហើយមានមនុស្សចុចចូល ទៅទស្សនាប្រមាណជា ជាង៥សែនដង​ហើយ មកទល់សព្វថ្ងៃ។ សម្ដែង​អម​ជា​មួយនឹងតារាប្រុសម្នាក់ទៀត នាង ចេមីណា បានបង្ហាញរូបរាងរបស់នាង នៅក្នុង​ឃ្លីប​ចម្រៀង នូវឈុតឆាក«ហ៊ានៗ»​មួយ​ចំនួន ដែលមនុស្សមួយចំនួន គិតថា នេះជាការបង្កភាពស្រើបស្រាល។

ជាពិសេស សម្រាប់តុលាការក្នុងប្រទេសអ៊ូហ្គង់ដា ឃ្លីបវីដេអូរបៀបនេះ មានលក្ខណៈជាភាពយន្ដ កូនជ្រូក បើគេ​អនុលោម​ទៅ​តាមច្បាប់មួយ ទើបនឹងត្រូវបានអនុម័ត កាលពីខែកុម្ភៈឆ្នាំទៅម៉ិញ។ នាង ចេមីណា និងផលិតករ (អ្នក​ផលិត​វីដេអូ​ឃ្លីប) ត្រូវបានឃាត់ខ្លួន កាលពីខែវិច្ឆិកាកន្លងទៅ។ ពួកនាងត្រូវបានដោះលែងមកវិញ ជាបណ្ដោះអាសន្ន បន្ទាប់​ពី​ត្រូវ​បាន​ដាក់ ក្នុងការឃុំខ្លួន អស់រយៈពេល៥សប្ដាហ៍។ សវនាការកាត់ក្ដី ទំនងជាត្រូវធ្វើក្នុងចុងខែនេះ ឬដើមខែក្រោយ​យ៉ាង​យូរ ហើយក៏ជាសវនាការដំបូងគេដែរ ដែលបានយកច្បាប់ថ្មីនោះ មកប្រើប្រាស់។

មេធាវីរបស់តារាចម្រៀង បានសុំឲ្យមានលើកពេលធ្វើសវនាការ រហូតដល់ក្រុមប្រឹក្សាធម្មនុញ្ញ សម្រេចលើសេចក្ដី​ជំទាស់​មួយ របស់ក្រុមសកម្មជនដើម្បីសេរីភាព ប្រឆាំងទល់នឹងច្បាប់ខាងលើ។ នាង ចេមីណា បានថ្លែងប្រាប់សារព័ត៌មាន​បារាំង អាអេហ្វប៉េ (AFP) ថា៖ «នៅពេលដែលខ្ញុំថតឃ្លីបនេះ ខ្ញុំមិនគិតថាថាធ្វើវា ដើម្បីឲ្យក្មេងទស្សនាទេ។ ខ្ញុំថតសម្រាប់​មនុស្ស​ធំ។ ខ្ញុំក៏មិនបានលក់ ឬចែកចម្រៀងនេះដែរ។ (...) សិទ្ធិ នៃការគិត និងការនិយាយស្ដីរបស់ខ្ញុំ ត្រូវបានលេបត្របាក់។»

អ៊ូហ្គង់ដា ជាប្រទេសតូចមួយ ក្នុងទ្វីបអាហ្វ្រិកខាងកើត ដែលដឹកនាំដោយប្រធានាធិបតី អភិរក្សនិយមជ្រុលមួយរូប។ ឆ្នាំ​កន្លងទៅ ប្រធានាធិបតីរូបនេះ ក៏បានស្វែងរកការដាក់ទោសទណ្ឌដែរ ទៅរកការផ្សព្វផ្សាយទាំងឡាយ ដែលបម្រើឲ្យក្រុម​ស្រឡាញ់​ភេទតែមួយ។ ប៉ុន្តែការប៉ុនប៉ងនេះ ត្រូវបានច្រានចោល ដោយក្រុមប្រឹក្សាធម្មនុញ្ញ។ យ៉ាងណាក៏ដោយ ក៏​ឃ្លីប​ចម្រៀង របស់តារាចម្រៀងអន្តរជាតិធំៗ ដូចយ៉ាង Beyoncé Madonna ឬ Nicki Minaj ជាដើម សុទ្ធតែត្រូវបាន​ហាម​ឃាត់ មិន​ឲ្យ​ចាក់បញ្ចាំង នៅក្នុងប្រទេសឡើយ៕