បើមានសេចក្ដីស្នេហា របស់បង ដែល«ស្រឡាញ់អូនដល់ឆ្អឹង» ក៏មាននរកលោកិយ៍ ដែលបង«ស្អប់អូនដល់ឆ្អឹង»ដែរ។ «កោដិ កំទេចឆ្អឹង និងផេះ» ជាអ្វីដែលបុគ្គលិកអនាម័យ នៃផ្សារទំនើបមួយ កណ្ដាលរាជធានីតូក្យូ បានរកឃើញ នៅ​ក្នុង​បង្គន់​សាធារណៈ។ ការរកឃើញដ៏ភ្ញាក់ផ្អើលនេះ បានជំរុញឲ្យបុគ្គលិករូបនោះ រាយការណ៍ទៅប្រាប់អាជ្ញាធរ ដោយបារម្ភ​ខ្លាចមាន ឧក្រិដ្ឋកម្មអ្វីមួយ ស្ថិតនៅពីក្រោយ «កោដិ កំទេចឆ្អឹង និងផេះ» នៅក្នុងបង្គន់បែបនេះ។ នេះបើតាមសេចក្ដី​រាយ​ការណ៍ របស់សារព័ត៌មានជប៉ុន Yomiuri Shimbun។

ប៉ុន្តែការបារម្ភ របស់បុគ្គលិកអនាម័យខាងលើ មានភាពខុសស្រឡះទាំងស្រុង នៅពេលដែលបុរសចំណាស់មួយរូប បាន​ចូលខ្លួន ទៅប៉ុស្ដ៍នគរបាល ដើម្បីធ្វើការបកស្រាយ ពីហេតុការណ៍នេះ។ បុរស អាយុ៦៨ឆ្នាំ បានសារភាពភ្លាមៗថា លោក​បានយកផេះ និងធាតុ របស់ភរិយាលោក ទៅចាក់ចោលក្នុងបង្គន់ នៅក្រោយពីពិធីបូជា សពភរិយារូបនេះ ទើបនឹងបាន​បញ្ចប់។

ដើម្បីអះអាង ពីទង្វើរបស់ខ្លួន លោកតាចំណាស់ បានពន្យល់ថា ជាច្រើនឆ្នាំមកហើយ ជីវិតអាពាហ៍ពិពាហ៍ របស់លោក បានប្រែក្លាយជានរកលោកិយ៍។ លោកតា បានថ្លែងឡើងថា៖ «ការស្អប់ខឹងរបស់ខ្ញុំ ចំពោះប្រពន្ធខ្ញុំ បានពង្រីកខ្លួនធំ​ឡើង។ ជីវិតយើង មានភាពតឹងតែងខ្លាំងណាស់ នៅមុនមរណភាពនេះ។» ដូច្នេះហើយ គ្រាន់តែពិធីបូជា បានកន្លងផុតទៅ​ភ្លាម លោកតាបានសម្រេចចិត្ត បោសសម្អាតស្លាកស្នាម នៃភរិយាខ្លួន ចេញពីជីវិតលោកតា ជាស្ថាពរ (បើទោះជា នៅ​សល់​តែ​ធាតុ ឬជាផេះក៏ដោយ)។

សម្រាប់ក្រុមអ្នកស៊ើបអង្កេតជប៉ុនវិញ មិនបានបញ្ចប់ត្រឹមនេះទេ ព្រោះទង្វើរបស់លោកតា អាចត្រូវបានចោទប្រកាន់ ពី​បទ​«បោះបង់» និង«មិនរវីរវល់» ពីសាកសព។ បើតាមអ្នកនាំពាក្យ នគរបាលរាជធានីតូត្យូ បានឲ្យដឹងថា ផេះសំណល់បន្សល់​ទុក ពីការបូជាសព អាចត្រូវបានអនុញ្ញាត ឲ្យយកទៅ«បាច» តែនៅកន្លែងមួយចំនួនប៉ុណ្ណោះ៕