មិនត្រូវយកប្រព័ន្ធច្បាប់ នៅបស្ចឹមលោក មកលេងសើចនោះឡើយ ជាពិសេសប្រព័ន្ធច្បាប់ នៅប្រទេសអាមេរិក ដែល​ដាក់ប្រឆាំង នឹងអំពើអានាចារ ជាសាធារណៈ។ នេះជាករណី របស់ស្ត្រីបុរស ជាសង្សាមួយគូ ដែលបានប្រព្រឹត្តិការរួមរ័ក្ស នៅកណ្ដាលថ្ងៃ លើឆ្នេរសមុទ្រ Bradenton Beach ដែលសម្បូរទៅដោយមនុស្ស។ ការប្រព្រឹត្តិ បានកើតឡើងតាំងពីខែ​កក្កដាកន្លងទៅ តែសវនាការកាត់ទោសអ្នកទាំងពីរ ទើបនឹងបើកធ្វើ កាលពីថ្ងៃចន្ទ ក្នុងសប្ដាហ៍នេះប៉ុណ្ណោះ។

នាង អេលីសា អាលវ៉ារេស (Elissa Alvarez) អាយុ២០ឆ្នាំ និងលោក ចូសេ កាបាឡេរ៉ូ (Jose Caballero) អាយុ​៤០​ឆ្នាំ ត្រូវ​បានរកឃើញថាមានកំហុស ហើយអាចប្រឈមនឹងទោស ១៥ឆ្នាំ ក្នុងពន្ធនាគារ។ មនុស្សជាច្រើន បានធ្វើ​សាក្សី បក​អាក្រាត​ពីទង្វើរបស់អ្នកទាំងពីរ ក្នុងនោះមានកុមារអាយុ៣ឆ្នាំម្នាក់ផង។ សាក្សីម្នាក់ ថែមទាំងឆ្លៀតថត​បាន​ជា​វីដេអូ នៃ​ឈុត​ឆាកក្ដៅសាច់ នៅចំពេលស្ត្រីម្នាក់ កំពុងទូរស័ព្ទហៅនគរបាល មកទុកជាភស្ដុតាង បង្ហាញចៅក្រម​នោះ​ទៀត។

គេបានស្ដាប់ឮសម្លេងស្ត្រី ដែលនិយាយទូរស័ព្ទ ជាមួយនគរបាល យ៉ាងដូច្នេះថា៖ «ពួកគេអត់មាន ឲ្យតម្លៃនរណា​ម្នាក់​ទេ។ គួរឲ្យស្អប់ខ្ពើមណាស់។ ហើយអាប្រុស វាទើបនឹងដោះអាវនាង ជាសង្សាចេញ មុននេះ។ នៅទីនេះ មានកូន​ក្មេង​ម្នាក់។»

នៅក្នុងសវនាការ ចៅក្រមបានប្រើពេលតែ១៥នាទីប៉ុណ្ណោះ ដើម្បីពិចារណា ពីសាលក្រមរបស់ខ្លួន។ សារព័ត៌មានអាមេរិក «New York Daily News» បានរាយការណ៍ថា៖ នាង អាលវ៉ារេស និងលោក កាបាឡេរ៉ូ បានប្រព្រឹត្តិខុស ជាមួយនឹង​ទង្វើ​អាសអាភាស ហើយពួកគេនឹងដឹង ពីសាលក្រមចុងក្រោយ នៅពេលខាងមុខ។ ក្រៅពីទោសទណ្ឌ ដែលនឹង​ត្រូវ​ផ្ដន្ទាទោស​នេះ អ្នកទាំងពីរ នឹងត្រូវជាប់ឈ្មោះ ក្នុងបញ្ជីស្បែកខ្មៅអាមេរិក ផ្នែកបទល្មើសខាងផ្លូវភេទបន្ថែមទៀត។

រដ្ឋអាជ្ញាប្រចាំរដ្ឋផ្លរីដា លោក អង់តូនី ដាហ្វុងស៊ីកា (Anthony Dafonseca) បានថ្លែងឲ្យដឹងថា៖ «តុលាការបាន​រក​​ឃើញ​ថា អ្នកទាំងពីរបានប្រព្រឹត្តិកំហុស នៅវេលាម៉ោង១៤និង៣០នាទីរសៀល នៅលើឆ្នេរសមុទ្រមួយ ដែលសម្បូរ​ទៅ​ដោយ​មនុស្ស និងមានកុមារ នៅមិនឆ្ងាយពីអ្នកទាំងពីរ»។

លោក ចូសេ កាបាឡេរ៉ូ ធ្លាប់ជាប់ពន្ធនាគារ៨ឆ្នាំម្ដងហើយ ពីបទជួយដូរ ម្សៅកូកាអ៊ីន។ ប៉ុន្តែក្រុមគ្រួសារបស់លោក នៅ​​តែ​ការពារលោកថា ទោសកំហុសរួមរ័ក្ស នៅលើឆ្នេរនេះ មិនសាកសមនឹងការផ្ដន្ទាទោស រាប់សិបឆ្នាំនោះឡើយ។ ផ្ទុយ​ទៅ​វិញ នៅក្នុងសវនាការ លោករដ្ឋអាជ្ញាបានថ្លែងចំពោះចៅក្រមថា៖ «តើពួកគេបានធ្វើរឿងនេះ ដោយលួចលាក់​ឬទេ? តើ​ពួក​គេ​បានចុះ ទៅក្នុងទឹក ដើម្បីធ្វើរឿងនេះ ឲ្យផុតកំបាំងពីភ្នែកសាធារណៈជនឬទេ? តើនាង អាលវ៉ារេស បាន​សាក​ល្បង​​យក​កន្សែង ឬអ្វីផ្សេង មកគ្របដាក់ពីលើខ្លួនឬទេ? អត់ទេ! ពួកគេមិនបានខ្វល់ ពីអ្វីទាំងអស់។»៕