ភាពរកាំរកូស នៅក្នុងវប្បម៌សន្ទនា នៃមេដឹកនាំ គណបក្សធំៗទាំងពីរ នៅតែមានសភាពស្រួចស្រាវ។ រីឯឲ្យសកម្មជនមួយ​ចំនួន រួមទាំងតំណាងរាស្រ្តផង របស់គណបក្សសង្គ្រោះជាតិនោះ ក៏កំពុងស្ថិតនៅក្នុង ភាព«គ្មានលំនឹង» ដោយសារនិតិវិធី របស់ប្រព័ន្ធតុលាការកម្ពុជា កំពុងដំណើរការទៅមុខ។

លោក អឿ ណារិទ្ធិ ជាជំនួយការផ្ទាល់របស់អ្នកស្រី មួរ សុខហួរ បានថ្លែងប្រាប់អ្នកសារព័ត៌មាន នៅមុខសាលាដំបូង​រាជធានី​ភ្នំពេញ ក្រោយពីការសាកសួរ ដោយចៅក្រម និងព្រះរាជអាជ្ញា ស្ទើរពេញមួយថ្ងៃ នារសៀលថ្ងៃទី១៩ ខែឧសភាថា ក្នុងការសាកសួរនាពេលនេះ ទាំងចៅក្រម និងព្រះរាជអាជ្ញា បានធ្វើការចោទសួរជាច្រើន។ លោកថា រាល់សំនួនទាំងនោះ ភាគច្រើនជាសំនួរដាក់បន្ទុក ហើយការចោទសួរម្តងៗ មានសំលេងកំហែងធ្ងន់ៗ (ខ្លាំងៗ) មួយចំនួន។ លោកបង្ហាញ ការ​សោកស្តាយថា ព្រះរាជអាជ្ញា មិនគួរប្រើប្រាស់ នូវសំលេងបែបនេះឡើយ។

យ៉ាងណា សមាជិកនៃអគ្គនាយកដ្ឋាន កិច្ចការសាធារណៈ នៃគណបក្សសង្គ្រោះជាតិរូបនេះ ក៏មិនបានបន្ថែមអ្វី ឲ្យច្រើន​ជាងនេះ ឬចោទប្រកាន់ថា យ៉ាងណានោះដែរ ចំពើការចោទសួរទាំងព្រះរាជអាជ្ញា និងចៅក្រមនោះ។ តែលោកសន្និដ្ឋានថា នេះប្រហែលជានីតិវិធី របស់តុលាការ របស់ព្រះរាជអាជ្ញា ដែលត្រូវធ្វើក្នុងសវនាការ។

ត្រឡប់មកកាន់ករណីហិង្សា នាស្ពាននាគ កាលពីថ្ងៃទី១៥ ខែកក្កដា ឆ្នាំ២០១៤ កន្លងមកនេះ ដែលបង្កឲ្យភាគី​ទាំង​សង​ខាង (ទាំងសន្តិសុខ របស់រដ្ឋាភិបាល និងទាំងក្រុមបាតុករ) ធ្វើឲ្យមានរបួស ជាច្រើននាក់នោះ សកម្មជនម្នាក់ ក្នុង​ចំណោម​សកម្មជនបួននាក់ផ្សេងទៀត ដែលបានឆ្លងកាន់ ការសាកសួរ របស់តុលាកា នាពេលកន្លងមក និងមកទល់ពេលនេះ នៅ​តែ​ចាត់ទុកថា ការចោទប្រកាន់ និងការចាប់ខ្លួនកន្លងមកនេះ ជារឿងនយោបាយសុទ្ធសាធ។

លោក អឿ ណារិទ្ធិ ខ្លួនលោក នៅតែបរិសេធ មិនទទួលយក ការចោទប្រកាន់របស់តុលាការ ដែលថា ក្រុមលោក ជាអ្នក​ប្រើ​ប្រាស់នូវហិង្សានោះ។ លោកបានសំអាងថា នេះជារឿងនយោបាយ ដែលត្រួវធ្វើការដោះស្រាយ តាមបែប​នយោបាយ។ លោកបានថ្លែងបញ្ជាក់ថា៖ «ដំណោះស្រាយ មានតែបញ្ហានយោបាយទេ។ (...) រឿងនេះ ជារឿងនយោបាយពិតប្រាកដ។»

ជំនួយការផ្ទាល់ របស់តំណាងរាស្ត្ររូបនេះ បានបន្ថែមថា បើពិតជា«មិន»មែន ជារឿងនយោបាយទេនោះ ហើយតុលាការ​ស្ថិតនៅឯករាជ្យ នោះលោកប្រាកដ និងជឿថា ខ្លួនលោកផ្ទាល់ នឹងអាចទទួលបាននូវយុត្តិធម៌។ លោក ណារិទ្ធិ បានថ្លែង​ឲ្យដឹងទៀតថា៖ «យើងនៅតែសង្ឃឹម យើងគ្មានក្តីបារម្មណ៍ទេ ព្រោះយើងមិនបានប្រព្រឹត្តិ អ្វីដូចដែលតុលាការ ធ្វើការចោទ​ប្រកាន់នេះ។ (...) ពួកយើងសុច្ចរិត ពួកយើងមិនបានធ្វើធ្វើ ដែលជាការចោទប្រកាន់ របស់តុលាការ។»

មិនអាចទាក់ទងមន្ត្រី របស់សាលាដំបូង ដើម្បីធ្វើការបកស្រាយ ទាក់ទងនឹងការលើកឡើង ខាងលើនេះ បាននៅឡើយ៕