«មេធាវីសិទ្ធិមនុស្ស ប្រឈមនឹងការជាប់ពន្ធនាគារ បន្ទាប់ពីសវនាការ ដ៏អយុត្តិធម៌»។ នេះជាចំណងជើង នៃសេចក្តី​ប្រកាស​ព័ត៌មានបន្ទាន់មួយ របស់មជ្ឃមណ្ឌលសិទ្ធិមនុស្សកម្ពុជា បន្ទាប់ពីសាលាដំបូង ខេត្តកណ្តាល សម្រេច​ផ្តន្ទា​ទោស​លោក មេធាវី ជូង ជូងីកាលពីថ្ងៃទី១៣ ខែមីនា ម្សិលម៉ិញនេះ។

ក្នុងសេចក្រីប្រកាសព័ត៌មានបន្ទាន់នោះ បានសរសេរថា៖ «មេធាវីសិទ្ធិមនុស្សលោក ជូង ជូងី ត្រូវបានផ្តន្ទាទោស បន្ទាប់​ពីសវនាការដ៏អយុត្តិធម៌ ពីបទ “ផ្ដល់មធ្យោបាយលួចរត់” តាមមាត្រា ៥៦៥ នៃក្រមព្រហ្មទណ្ឌ នៃព្រះ​រាជា​ណា​ចក្រ​កម្ពុជា ឆ្នាំ ២០០៩ បន្ទាប់ពីគាត់ បានជួយឲ្យកូនក្តីរបស់គាត់ ចេញពីពន្ធនាគារ។»

មជ្ឈមណ្ឌលសិទ្ធិមនុស្ស បានទទួលស្គាល់ថា លោក ជូង ជូងី ជាមេធាវីម្នាក់ ដែលហ៊ានចេញមុខការពារ ឬតំណាង​ឲ្យ​កូន​ក្តី​នយោបាយ សំខាន់ៗមួយចំនួន ដូចជា លោក សម រង្ស៊ី ដែលជាមេដឹកនាំ នៃគណៈបក្សសង្គ្រោះជាតិ ដែលជា​គណបក្ស​ប្រឆាំងដ៏ធំ នៅកម្ពុជា ជាដើម។

សេចក្ដីប្រកាសនោះ បានចោទប្រកាន់យ៉ាងដូច្នេះថា៖ «នេះជាការរំលោភកាតព្វកិច្ច របស់រាជរដ្ឋាភិបាលកម្ពុជា ក្នុងការ​ធានាសិទ្ធិ ទទួលបានការជុំនុំជម្រះក្តី ដោយយុត្តិធម៌ ឲ្យស្របតាមរដ្ឋធម្មនុញ្ញ និងកតិកាសញ្ញាអន្តរជាតិ ស្តីពីសិទ្ធិ​ពលរដ្ឋ និងសិទ្ធិនយោបាយ ដែលកម្ពុជាជារដ្ឋភាគី។»

មជ្ឈមណ្ឌលសិទ្ធមនុស្សកម្ពុជា បានមើលឃើញថា ការចេញសាលក្រមថ្ងៃនេះ បន្ទាប់ពី សវនាការកាលពីថ្ងៃទី២២ ខែ​កក្កដា ឆ្នាំ២០១៤ ដោយពុំមានវត្តមានលោក ជូង ជូងី ឬក៏មេធាវីរបស់លោកឡើយ។ ហើយសវនាការនោះ ក៏មិនមាន​សាក្សីផ្ដល់ភស្តុតាងតទល់ ឬគាំទ្របទចោទ ទៅលើលោក ជូង ជូងី នោះដែរ។ តុលាការមួយនេះ មិនបាន ទទួល​យក​ការដាក់ពាក្យសុំពន្យាសវនាការ ព្រោះតែលោក ជូង ជូងី គ្មានពេលគ្រប់គ្រាន់ ក្នុងការត្រៀមការពារក្តីនោះដែរ។

ប្រហែលគ្នានេះ ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ លោក អំ សំអាត បាន​លើកឡើងថា ការចោទប្រកាន់ របស់សាលាដំបូងខេត្តកណ្តាលនេះ ជារឿងនយោបាយ សុទ្ធសាធ។ មន្រ្តីសិទ្ធិមនុស្ស បានមើលឃើញថា ទាំងការកាត់សេចក្តី ទាំងការប្រកាស សុទ្ធតែត្រូវបានធ្វើឡើង ដោយកំបាំងមុខ។ លោកបញ្ជាក់បន្ត ក្នុងកិច្ចសម្ភាសជាមួយសារព័ត៌មាន ក្នុងស្រុកមួយ យ៉ាងដូច្នេះថា៖ «យើងមើលទៅ រឿងនេះពាក់ព័ន្ធ នឹងរឿង​នយោបាយ​សុទ្ធសាធ។ (…)ហេតុអ្វីបានជាមិនជូនដំណឹង មិនកោះហៅគេ។»

«ការអនុវត្តបែបកុម្មុយនីស»

អ្នកឃ្លាំមើល និងស្រាវជ្រាវផ្នែកសង្គម ក្នុងកិច្ចសម្ភាសជាមួយ ទស្សនាវដ្តីមនោរម្យ.អាំងហ្វូ លោក កែម ឡី បានបង្ហាញ​ថា តុលាការកម្ពុជាបច្ចុប្បន្ន ត្រូវបានបុគ្គលមួយចំនួន ធ្វើការបញ្ជាបានតាមចិត្ត។ លោកក៏ស្នើឲ្យរដ្ឋាភិបាលសព្វថ្ងៃ ធ្វើ​យ៉ាង​ណាពង្រឹងប្រព័ន្ធតុលាការ ឲ្យមានភាពឯករាជ្យឡើង។ លោកបន្តថា៖ «បើមិនដូច្នេះទេ ទាំងអ្នកធំ និងអ្នកតូច ត្រូវ​តែ​រងគ្រោះដូចគ្នា។ (…) វាមិនមែនជាសង្គមប្រជាធិបតេយ្យទេ តែជាសង្គមកុម្មុយនីស ព្រោះតែគេអាចបញ្ជា​តុលាការ​បាន​គ្រប់គ្នា។ (…) ក្នុងរដ្ឋធម្មនុញ្ញ ជាសង្គមប្រជាធិបតេយ្យហើយ តែការអនុវត្តបែបកុម្មុយនីស។»

សូមបញ្ជាក់ថា ប្រសិនបើទោសនោះត្រូវអនុវត្ត លោក ជូង ជូងី អាចប្រឈមនឹងការជាប់ពន្ធនាគារ រយៈពេលពីរឆ្នាំ និង​ពិន័យជាប្រាក់ រហូតដល់បីលានរៀល តាមមាត្រា ៥៦៥ នៃក្រមព្រហ្មទណ្ឌកម្ពុជា។ ឯតំណាងរាស្ត្រគណបក្ស​សង្គ្រោះ​ជាតិ លោក ចាន់ ចេង ក៏ត្រូវបានផ្តន្ទាទោស ពីបទចោទដូចគ្នាផងដែរ។ នេះបើតាមការសន្និដ្ឋានចុងក្រោយ របស់​មជ្ឈ​មណ្ឌល​សិទ្ធមនុស្សកម្ពុជា៕