ថ្លែងក្នុងសន្និសីទសារព័ត៌មាន នាទីស្តីការគណរដ្ឋមន្រ្តី នាព្រឹកថ្ងៃទី១៩ ខេសីហា ឆ្នាំ២០១៥នេះ អ្នកនាំ​ពាក្យ​ក្រសួងយុត្តិធម៌ ទំនងជាចង់ធ្វើការ«ព្រមាន»ជាទូទៅ ដល់បណ្តាអ្នកលេងហ្វេសប៊ូកទាំងអស់ អាចនឹងត្រូវ​ចោទ​ប្រកាន់ ពី«បទល្មើសជាក់ស្តែង» ក្នុងករណីនៃការផុសណាមួយ ក្នុងន័យចោទប្រកាន់ ឬនិយាយខុស ពី​ការ​ពិត​នោះ។

លោកបានយកករណីលោក ហុង សុខហួរ សមាជិកព្រឹទ្ធសភា មកពីគណបក្សសម រង្ស៊ី ដែលត្រូវបានចាប់ខ្លួន កាលពីពេលថ្មីៗថា ជាការផុសវីដេអូ ដែលនិយាយខុសការពិត ហើយនើ ជាបទល្មើសជាក់ស្តែងមួយ ដែល​មាន​ចែងក្នុងច្បាប់ព្រហ្មទណ្ឌកម្ពុជា។ លោកបានបន្តថា តាមក្របខណ្ឌនៃអង្គហេតុ តាមរយៈការផុសក្នុង​បណ្តាញ​សង្គមរបស់ លោក ហុង សុខហួរ នេះ អាចធ្វើឲ្យសមត្ថកិច្ចធ្វើការស្រាវជ្រាវ និងបន្តចាប់ខ្លួនតាម​នីតិវិធី ដោយមិនចាំបាច់ ត្រូវការដកអភ័យឯកសិទ្ធិ ជាមុនឡើយ។

អ្នកនាំពាក្យក្រសួងយុត្តិធម៌ បានថ្លែងទៀតថា៖ «នៅថ្ងៃទី១៥ ព្រឹក សមត្ថកិច្ចបានធ្វើការចាប់ខ្លួន ឯកឧត្តម ហុង សុខហួរ។ ដោយធ្ចើការស៊ើបអង្កេត លើបទល្មើសជាក់ស្តែងនេះ និងបានបញ្ជូនខ្លួន ជាបន្តបន្ទាប់ទៅដល់​ស្ថាប័ន​អយ្យការ ដើម្បីធ្វើការចោទប្រកាន់ ចំនួនបីបទល្មើស (...) បទក្លែងឯកសារសាធារណៈ, បទប្រើប្រាស់​ឯកសារសាធារណៈក្លែង និងបទញុះញុងបង្កឲ្យមានភាពវិកវរដល់សន្តិសុខសង្គម។»

លោក គឹម សន្តិភាព បានអះអាងថា ការសម្រេចចោទប្រកាន់ និងការបង្គាប់ឲ្យឃុំខ្លួននៃតំណាងអយ្យការ ទៅ​លើលោក ហុង សុខហួរ នេះ ជាការអនុវត្តត្រឹមត្រូវតាមច្បាប់។ លោកបានថ្លែងបន្ថែមថា៖ «ក្នុងប្រតិបត្តិការ នៃមន្រ្តីនគរបាលយុត្តិធម៌ ខ្ញុំសូមបញ្ជាក់ជូនថា មាត្រា១០៦ នៃនីតិវិធីព្រហ្មទណ្ឌ មានរយៈពេល៧ថ្ងៃ។ បើគិត​ពីថ្ងៃទី១២ ដល់ថ្ងៃទី១៤ មានរយៈពេលបីថ្ងៃ នេះជានីតិវិធីត្រឹមត្រូវ។ (...) ខ្ញុំសូមបញ្ជាក់ជូនដើម្បីច្បាស់លាស់ ព្រោះកន្លងមក មានការជជែកគ្នា មានការភាន់ច្រលំច្រើន ពិសេសពាក់ព័ន្ធ រឿងអភ័យឯកសិទ្ធិសភា នៃ​សមាជិក​ព្រឹទ្ធិសភា។ (...) មាត្រា១០៤ ថ្មីនៃរដ្ឋធម្មនុញ្ញ បានបញ្ចាក់យ៉ាងច្បាស់ ពីអភ៏យឯកសិទ្ធិនេះ។»

អ្នកនាំពាក្យក្រសួងយុត្តិធម៌ បានបញ្ជាក់បន្ថែមថា៖ «បទល្មើសព្រហ្មទណ្ឌជាក់ស្តែង អភ័យឯកសិទ្ធិព្រឹទ្ធិសភា មិនអាចរាំងស្ទះដល់ការចាប់ខ្លួន ការឃាត់ខ្លួន ការឃុំខ្លួន ឬការចោទប្រកាន់ របស់ស្ថាប័ន្ថមានសមត្ថកិច្ច​បាន​ទេ។ (...) តើចាំបាច់ ត្រូវទៅដកអភ័យឯកសិទ្ធិព្រឹទ្ធិសភាដែរឬទេ បើដំណើរការរបស់ស្ថាប័នមានសមត្ថកិច្ច បានចាប់ផ្តើមរួចទៅហើយ ការចាប់ខ្លួនបានធ្វើ ការចោទប្រកាន់បានធ្វើ ការឃុំខ្លួនបានធ្វើ។ (...) វាមិនចាំបាច់ ទៅដកអភ័យឯកសិទ្ធិព្រឹទ្ធិសភាទេ។ ព្រោះអភ័យឯកសិទ្ធិសភា វាមិនចាំបាច់ និងមិនអាចរាំងស្ទះការងារនេះ បានទៀតទេ។»