សាលក្រមនានា ដែលដាក់បន្ទុកលើមេដឹកនាំគណបក្សប្រឆាំង ចេញដោយតុលាការក្នុងប្រទេសកម្ពុជា នឹងចូលជាស្ថាពរ ដោយហេតុមេដឹកនាំនិរទេសខ្លួនរូបនេះ បានសម្រេចចិត្តដកពាក្យបណ្តឹង តាមរយៈមេធាវីរបស់លោក នៅមុនមួយថ្ងៃ ដែលសាលាឧទ្ធរណ៍នឹងបើកសវនា។

ក្បួនដង្ហែឃោសនាបោះឆ្នោត របស់គណបក្សសម រង្សី កាលពីឆ្នាំ២០០៨។

សវនាកា​កាត់ទោស​កំបាំងមុខ​លោក សម រង្ស៊ី ក្នុង​សំណុំ​រឿងក្តី​បរិហារកេរ្តិ៍​ និង​ផ្សាយ​ព័ត៌មាន​មិន​ពិត​ លើរដ្ឋមន្ត្រី​ក្រសួង​ការបរទេស​កម្ពុជា លោក​ ហោ ណាំហុង ត្រូវបានចៅក្រម​តុលាការ​សាលា​ឧទ្ធរណ៍ សម្រេចប្រកាស​«លុបចោល» នៅ​ព្រឹក​ថ្ងៃ​អង្គារ ទី​១២ មីនានេះ។ ការសម្រេចចិត្តនេះ ដោយសារការដកពាក្យបណ្ដឹង របស់​មេធាវីការពារក្ដី​​លោក សម រង្ស៊ី កាល​ពីព្រឹកថ្ងៃទី ១១ ខែមីនា មុនមួយថ្ងៃ នៃសវនាការសាលាឧទ្ទរណ៍។

ពាក្យបណ្តឹង​នេះ បាន​ប្តឹង​ជំទាស់​នឹង​សាលក្រម របស់​តុលាការ​​ក្រុង​​ភ្នំពេញ ដែលបាន​ផ្តន្ទាទោស​កំបាំងមុខ​លោក សម រង្ស៊ី ដាក់ពន្ធនាគារ ២​ឆ្នាំ នៅក្នុងសំនុំរឿងមួយ ដែលលោក សម រង្ស៊ី បាន​ចោទប្រកាន់​លោក ហោ ណាំហុង ថា​ជា​មេគុក​បឹង​ត្របែក ក្នុង​សម័យ​ខ្មែរ​ក្រហម។ តែឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា បានចាត់ទុកថា ជាចេតនា ក្នុងការ​បង្ខូចកេរ្តិ៍ឈ្មោះរបស់លោក និងបានប្ដឹង មេគណបក្សប្រឆាំងទៅតុលាការសាលាដំបូងរាជធានីភ្នំពេញ។

តាមច្បាប់របស់ប្រទេសកម្ពុជា ការបោះបង់ចោលផ្លូវតវ៉ា ទៅកាន់តុលាការសាលាឧទ្ទរណ៍ និងតុលាការកំពូល មានន័យ​ស្មើរនឹងការទទួលស្គាល់ សាលក្រុមដែលចេញដោយសាលាដំបូង។ តែមេដឹកនាំគណបក្សប្រឆាំង លោកសម រង្សី តែង​បានចាត់ទុកថា គ្រប់រឿងទាំងអស់ ដែលតុលាការកម្ពុជា ដាក់បន្ទុកទៅលើរូបលោក សុទ្ធសឹងមាន«ចរិកនយោបាយ» និង​ជា«គម្នាប»មួយ ដែលរដ្ឋាភិបាលសព្វថ្ងៃ បានប្រើតាមរយះតុលាការ ដាក់ទៅលើលោក ដើម្បីហាមមិនអោយលោក​មក​ចូលរួម ក្នុងការបោះឆ្នោតខែកក្កដាខាងមុខ ។

លោកមេធាវី ជួង ជូងី ការពារក្តីមេដឹកនាំគណបក្សប្រឆាំង បាននិយាយប្រាប់មនោរម្យព័ងអាំងហ្វូថា លោកសម រង្សី មិន​មានន័យថា លោកទទួលយក​សាលក្រម របស់សាលាដំបូងទេ។ តែការដកពាក្យ«បណ្តឹងឧទ្ធណ៍»​នេះ ព្រោះ​លោកបាន​ឈ្នះក្តី នៅក្នុងតុលាការប្រទេសបារាំងរួចទៅហើយ ដូច្នេះលោកមិនចង់ឲ្យរឿងនោះវែងឆ្ងាយ និងឆាប់ចប់។

សូមរម្លឹកថា លោកសមរង្ស៊ី ត្រូវបានតុលាការសម្រេចផ្តន្ទាទោស កំបាំងមុខលើសំណុំរឿងចំនួនបី ដែលរូបលោកត្រូវ​ប្រឈម នឹងការជាប់ពន្ធនាគាជាងដប់ឆ្នាំ។ សំណុំរឿងទាំងបី មានការដកបង្គោលព្រំដែនកម្ពុជា-វៀតណាម, សំណុំរឿង​ក្លែងឯកសារផែនទី និងសំណុំរឿងបរិហារកេរ្តិ៍លោក ហោ ណាំហុង រដ្ឋមន្ត្រីការបរទេសកម្ពុជា។ ទាក់ទងសំនុំរឿងក្លែង​ឯកសារផែនទី តុលាការកំពូល ក៏សម្រេចរួចហើយដែរ។ នៅចុងឆ្នាំ២០១២ លោកសម រង្សី បានដាក់ពាក្យបណ្តឹង សើរើ​រឿងនេះ ឡើងវិញ។ តែបច្ចុប្បន្ន មេដឹកនាំគណបក្សប្រឆាំង ក៏បាន«ដកបណ្តឹងសើររើ» ទាំងនោះ ដែលជាហេតុធ្វើអោយ សាលក្រមរបស់តុលាការខេត្តស្វាយរៀង បានចូលជាស្ថាពរដូចគ្នា។

មន្ត្រីសិទ្ធិមនុស្សអង្គការលីកាដូ លោក អំ សំអាត បានបញ្ជាក់ថា ដើមបណ្តឹងមានសិទ្ធិប្តឹង និងក៏មានសិទ្ធិដក​នូវបណ្តឹង​នោះគ្រប់ពេល។ ឯការដកពាក្យបណ្តឹងរបស់លោក សម រង្សី នេះមានន័យ ស្មើរនឹងគាត់«បញ្ចប់បណ្តឹងឧទ្ធណ៍»។ លោក​បន្តថា តាមផ្លូវច្បាប់ ការដកបណ្តឹងឧទ្ធណ៍ ជាការទទួលស្គាល់ នូវ«ការសម្រេច»របស់សាលាដំបូង ដូច្នេះចាប់ពីថ្ងៃដក​ពាក្យបណ្តឹងនេះមួយខែ សាលក្រមសាលាដំបូង នឹងចូលជាធរមាន។

អង្គការសង្គមស៊ីវិលជាតិ អន្តរជាតិជាច្រើន យល់ថា នេះជារឿងនយោបាយ ដូច្នេះគេប្រាកដជាអាចពិភាក្សាគ្នា តាមបែប​នយោបាយបាន។ «វត្តមាន» នៃមេបក្សប្រឆាំងរូបនេះ ក្នុងការបោះឆ្នោតថ្ងៃខាងមុខ នឹងអាចបង្ហាញ នូវភាពរស់រវើក នៃ​«លិទ្ធិប្រជាធិបតេយ្យនៅកម្ពុជា» និងការបោះឆ្នោតឆ្នាំ២០១៣ ប្រកបដោយសេរី យុត្តិធម៌ ព្រមទាំងមានការប្រកួតប្រជែង​គ្នា ដោយតម្លាភាពនោះផង៕

-------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១២មីនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ