ជនសង្ស័យដែលមិនទាន់ស្គាល់ អត្តសញ្ញាណនោះ ទំនងជាយុវជនម្នាក់ ដែលមានសក់ក្រញាញ់ ពណ៌ទង់ដែង និងមានពាក់វែនតាពណ៌ខ្មៅ។ បើតាមអ្នកនាំពាក្យនគរបាលជាតិថៃ លោក ប្រាវុធ តាវ័នស៊ីរី (Prawut Thavornsiri) បាននិយាយថា ជនសង្ស័យអាចជាជនបរទេស ឬអាចជាជនជាតិថៃ។ លោក ប្រាវុធ បានថ្លែង​ទៀត​ថា ដីការតាមចាប់ខ្លួនមួយ ត្រូវបានចេញផ្សាយ ដើម្បីតាមប្រមាញ់ជននេះ ទោះនៅទីណាក៏ដោយ។

ជាសមាជិកនៃបណ្ដាញមួយ...

នាយនគរបាលជាតិថៃ លោក ស៊ុំយុធ ភមផានមង (Somyot Poompanmoung) បាននិយាយ​ក្នុង​ថ្ងៃ​ពុធ​នេះ ទៅកាន់អ្នកសារព័ត៌មានថា ជនសង្ស័យដែលបានដាក់បំផ្ទុះគ្រាប់បែក សម្លាប់មនុស្ស២០នាក់ នៅ​លើ​ទីលាន​បូជនីយស្ថានសាសនា កាលពីថ្ងៃចន្ទនេះ ជាសមាជិកនៃបណ្ដាញមួយ។ លោក ស៊ុំយុធ បាន​និយាយ​ទៀត​ថា៖ «ជននេះ មិនអាចធ្វើរឿងនេះ តែម្នាក់ឯងនោះទេ។ យើងគិតថា មានមនុស្សជាច្រើននាក់ បាន​ជួយ និង​នៅ​ពី​ក្រោយជននេះ។»

រកឃើញអ្នករត់ម៉ូតូឌុប...

នគរបាលថៃ បានអំពាវនាវឲ្យផ្ដល់សាក្សី និងភស្ដុតាង ព្រមទាំងជូនរង្វាន់១លានបាត សម្រាប់នរណាដែល​ផ្ដល់ព័ត៌មាន ដើម្បីឈានទៅចាប់ជនសង្ស័យនេះ។ នៅក្នុងរូបភាពថតដោយកាម៉េរាសុវត្ថិភាព បានបញ្ជាក់​ថា ជនពាក់អាវពណ៌លឿងនេះ បានមកអង្គុយនៅមុខបូជនីយស្ថាន ហើយបានដោះកាបូបស្ពាយ​នៅនឹងខ្នង​របស់​ខ្លួន ចោលនៅលើកៅអីនោះ មុននឹងដើរចាកចេញទៅ ដោយមាននិយាយ ជាមួយទូរស័ព្ទដៃផង។

ក្រុមអ្នកស៊ើបអង្កេត បានរកឃើញ និងបានសាកសួរអ្នករត់ម៉ូតូឌុបមួយរូប ដែលជនសង្ស័យបានហៅជិះ ដើម្បី​ចាកចេញពីកន្លែងនោះ នៅយប់ថ្ងៃចន្ទ ប៉ុន្តែក្រុមអ្នកស៊ើបអង្កេត មិនបានផ្ដល់ភាពលំអិតអ្វីច្រើន អំពីការ​សាក​សួរ​នោះទេ។

សូមបញ្ជាក់ដែរថា នៅថ្ងៃពុធនេះ បូជនីយស្ថានសាសនានោះ ត្រូវបានបើកឲ្យមនុស្សម្នា ចូលទៅគោរពបូជា​ឡើងវិញហើយ៕