រដ្ឋធម្មនុញ្ញ ដែលជាច្បាប់កំពូល នៃព្រះរាជាណាចក្រកម្ពុជា នៅត្រង់ជំពូកទី១ មាត្រា៥បានចែងថា៖ «ភាសា និងអក្សរ ដែលប្រើជាផ្លូវការគឺ ភាសា និងអក្សរខ្មែរ»។ ដោយឡែករថយន្ដ​ក្រុង​មួយគ្រឿង ស្លាកលេខ ភ្នំពេញ ៣C-៦៨៥៧ ដែលជាស្លាកលេខនៅកម្ពុជា និងដែលបានចត នៅតាមបណ្តោយផ្លូវ ព្រះសីហនុ ជាផ្លូវ​សាធារណៈ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ នៅថ្ងៃទី១៩ ខែសីហា ឆ្នាំ២០១៥នេះ មាន​សរសេរ​បីប្រភេទ នៅពីលើផ្នែកខាងមុខ ។ អក្សរធំៗ នៅលើគេបង្អស់ ជាអក្សរយួន (ទំនងជាឈ្មោះក្រុមហ៊ុន PHUONG TRINH) ខណៈអក្សរខ្មែរ «កម្ពុជា វៀតណាម» ត្រូវបានដាក់នៅខាងក្រោម និងមានកំហុស​អក្ខរាវិរុទ្ធ​នោះទៀត (សរសេរថា វៀគណាម មិនមែន វៀតណាម)។ បន្ទាប់មក នៅជួរខាងក្រោមបង្អស់ ទើប​មាន​អក្សរអង់គ្លេស សរសេរដាក់ថា «Cambodia Vietnam»។

តាមប្រសាសន៍របស់លោក ទូច គីមស្រ៊ាង ប្រធានសមាគមទ្រទ្រង់អក្សសាស្ត្រជាតិ និងវប្បធម៌ខ្មែរ និងជាមន្ត្រី​នៃក្រុមជំនុំព្រះត្រៃបិដក បានថ្លែងប្រាប់ទស្សនាវដ្តីមនោរម្យ.អាំងហ្វូ ក្នុងកិច្ចសម្ភាសផ្ដាច់មុខមួយថា៖ «ជា​គោលការណ៍ទីមួយ របស់រដ្ឋាភិបាល គឺត្រូវដាក់អក្សខែ្មរ នៅខាងលើ នៅតាមបដាផ្សព្វផ្សាយ ឬយីហោ​ក្រុមហ៊ុន​នានា ជាសាធារណៈក្នុងប្រទេសកម្ពុជា។ គោលការណ៍ទីពីរ គឹដាក់ឲ្យអក្សរខ្មែរ ឲ្យមានលក្ខណៈ​ធំ​ជាង ជាដាច់ខាត ទោះស្មើរ ក៏មិនអនុញ្ញាតដែរ។»

ប្រធានសមាគមទ្រទ្រង់អក្សសាស្ត្រជាតិរូបនេះ បានបន្ថែមទៀតថា វាជារឿងមួយខុសស្រឡះ បើសិនជាមាន ការសរសេរអក្សរខ្មែរ នៅខាងក្រោមអក្សរបរទេស ហើយបិទផ្សាយជាសាធារណៈនោះ។ លោកមាន​ប្រសាសន៍​ថា៖ «អត់ត្រូវទេ ទោះជាអក្សរខ្មែរនៅខាងលើក៏ដោយ ក៏មិនឲ្យមានទំហំ តូចជាងអក្សរ​បរទេស​ដែរ»។ ចំពោះរូបលោក ជាសាស្រ្តាចារ្យអក្សរសាស្រ្តខ្មែរម្នាក់ លោកយល់ថា បើមានរូបភាពបែបនេះ ហើយ​សារធារណៈជន​ឃើញ គឺវាផ្ទុយពីរដ្ឋធម្មនុញ្ញ នៃព្រះរាជាណាចក្រកម្ពុជា ដែលបានចែង។

ទស្សនាវដ្ដីកំពុងស្វែងរកការបកស្រាយ ពីក្រុមហ៊ុនម្ចាស់រថយន្ដក្រុងនេះ ដើម្បីចង់ដឹងពីមូលហេតុ​នៃការ​ដាក់​អក្សរយួន ខាងលើ និងធំជាង អក្សរខ្មែរបែបនេះ។ នៅពេលទទួលបាន ការបកស្រាយ នោះទស្សនាវដ្ដី​នឹង​ចុះ​ផ្សាយ ក្នុងអត្ថបទខ្លួនលើកក្រោយ។

យ៉ាងណាក៏ដោយ លោក ទូច គឹមស្រ៊ាង បានបញ្ជាក់ទៀតថា លោកសង្កេតឃើញ ការប្រើប្រាស់ ទាំងភាសា និងអក្សរសាស្ត្រខ្មែរ នាពេលបច្ចុប្បន្ននេះ មិនត្រូវបានយកចិត្តទុកដាក់ និងផ្តល់តម្លៃនោះទេ។ ក្នុង​នាម​ពលរដ្ឋ​ទាំងអស់គ្នា ជាកូនខ្មែរ ជាអ្នកស្រឡាញ់វប្បធម៌ អក្សសាស្រ្តខ្មែរ ត្រូវតែរួមគ្នាថែរក្សាតម្លៃ នៃកាសរសេរ​ទាំង​នេះ ឲ្យបានយូរអង្វែង។ បើដាក់អក្សរខ្មែរ នៅខាងក្រោម ហើយដាក់អក្សរបរទេស នៅខាងលើដូចនេះ គឺ​ជា​ទង្វើ​មួយ​លើក​ដំកើងវប្បធម៌របទេស ហើយជាន់ពន្លិចវប្បធម៌ខ្មែរ នៅលើទឹកដីខ្លូនឯងដូច្នេះដែរ៕