«Cambodian Idol» ដែលជាកម្មវិធីមួយ របស់ទូរទស្សន៍ហង្សមាស កំពុងរងនូវការរិះគន់ ពីសំណាក់អ្នក​តាម​ដាន និងទស្សនិកជន ជាពិសេសប្រិយមិត្ត ដែលប្រើប្រាស់បណ្ដាញសង្គម។ ក្រុមអ្នករិះគន់ បានចោទប្រកាន់ លើការដាក់ពិន្ទុ របស់លោក ព្រាប សុវត្ថិ គណៈកម្មការមួយរូប ពីចំណោមគណកម្មការទាំងបួន ថាមិន​យុត្តិធម៌ និងមានលក្ខណៈ«អាត្មានិយម»។

ម្ចាស់គណនីមួយរូប ដាក់ឈ្មោះ «Sofie Afeldt» បានសរសេរថា៖ «ការដែរគណៈកម្មាធិការ​សម្រេចចិត្តមិន​ត្រឹមត្រូវ គឺវាអយុត្តិធម៌សំរាប់អ្នកដែលប្រកួត។ ខ្ញំុយល់ថា បេក្ខជន ធាវី គាត់ច្រៀងពិរេាះតាំងតែពីដំបូង សំលេង​គាត់ ដូចលេាកព្រាប សុវត្តិ ណាស់ រីឯសំលេងរបស់បេក្ខជន កាក្រៃ មិនពីរេាះ ច្រៀងមិនសូវច្បាស់ផង ក៏​ឲ្យ​ជាប់ដែរ។»

រីឯអ្នកប្រើប្រាស់បណ្ដាសង្គមម្នាក់ទៀត «Chan TreaBmc» បានសរសរថា៖ «ព្រាប សុវត្តិ អាត្មានិយម​ណាស់ មិនសមឲក្រុម សួនវណ្ណចន្នី ធ្លាក់ទាំងអស់សោះ ចន្នី ច្រៀងបានពីរោះ ជាងក្រុមផ្សេងទៀត ច្រើន​ណាស់ មិន​សមណា មិនឲ្យជាប់សូម្បីតែម្នាក់»។

ប៉ុន្តែបើទោះជាអ្នករិះគន់ បានបញ្ចេញយោបល់ខឹងសម្បារយ៉ាងណា ទៅនឹងការឲ្យពិន្ទុ នៃកម្មវិធីនេះក៏ដោយ ក៏នៅមានមនុស្សមួយចំនួនទៀត បានសម្ដែងការគាំទ្រដែរ។ អ្នកប្រើប្រាស់ហ្វេសប៊ុក «Yon Saron» បាន​សរសេរថា៖ «លោក ព្រាប សុវត្ថិ មានភាពប្រាកដប្រជា និងការយល់ដឹងខ្ពស់ផ្នែកចម្រៀង» ខណៈ​ម្នាក់​​ទៀត​ដាក់ឈ្មោះ «Bong Kung» បានសរសេរបន្ទរថា៖ «សូមសរសើរនូវសុទិដ្ឋិនិយមរបស់បង ព្រាប សុវត្ថិ»។

សូមបញ្ជាក់ដែរថា កម្មវិធី «Cambodian Idol» ដែលចាក់បញ្ចាំង នៅរៀងរាល់រាត្រីថ្ងៃអាទិត្យនេះ មាន​គណៈកម្មកាចំនួនបួនរូប ដែលសុទ្ធតែជាតារាល្បីៗនៅកម្ពុជា និងប្រចាំឲ្យផលិតកម្មហង្សមាស មានលោក ព្រាប សុវត្ថិ កញ្ញា ឱក សុគន្ធកញ្ញា លោក ណុប បញ្ញារិទ្ធ និង លោក ឆន សុវណ្ណរាជ។ តារាទាំងបួនរូបនេះ សុទ្ធសឹង ជាមេប្រយោគ ដែលមានសិទ្ធិឲ្យពិន្ទុសម្រេចលើ ការប្រលងរបស់បេក្ខជន ថាអាចបន្តទៅមុខ ឬយ៉ាង​ណា។

យ៉ាងណាក៏ដោយ សម្រាប់មតិនិយមកណ្ដាលមួយចំនួន បានសរសេរថា នេះជារឿងធម្មតានៃការ​ប្រកួត​ប្រជែង មានធ្លាក់ មានជាប់ និងខ្លះទៀតស្នើឲ្យមានការផ្លាស់ប្ដូរ របៀបដាក់ពិន្ទុនៅក្នុងកម្មវិធីនេះ ដែលពួក​គេ​មើលទៅ មានសភាពអយុត្តិធម៌។ អ្នកប្រើប្រាស់បណ្ដាញសង្គមម្នាក់ ដាក់ឈ្មោះ «Chhorda Kc» បាន​សរសេរ​ថា៖ «ខ្ញុំចង់អោយផ្លាស់ផ្តូរចេញ នូវរបៀបឲ្យពិន្ទុបែបនេះ វាមិនសុក្រិតទេ! ដើម្បីកុំអោយកំហុសទាំងនេះ កើត​ឡើងម្តងទៀត!»៕