រហូតមកដល់រសៀលថ្ងៃទី១៣ ខែមិនា ឆ្នាំ២០១៥ សមាគមរួមគ្នាអភិវឌ្ឍន៍កម្ពុជា ដឹកនាំដោយលោក ឯ សុភាស់ និង​លោក ហៀង វិទ្យា រួមទាំងសមាជិក ប្រមាណជា៣០០នាក់ បានធ្វើការដង្ហែរក្បួន ប្រកាសខ្លាំងៗ សុំឲ្យ​ប្រធាន​សមាគម​សេដ្ឋកិច្ចក្រៅប្រព័ន្ធ លោក វ៉ន ពៅ ចេញមុខដោះស្រាយ ជាមួយក្រុមខ្លួន ពីបញ្ហាមួយចំនួន ដែលមានការឈ្លោះ​ទាស់​ទែងគ្នា រវាងកូនចៅ និងកូនចៅ។

លោក ជ្រៃ វិចិត្រ ជាអ្នកទទួលខុសត្រូវ ខាងនាយកដ្ឋានផែនការ របស់សមាគមរួមគ្នាអភិវឌ្ឃន៍កម្ពុជា បានវាយ​ប្រហារ​ពាក្យសម្តីធ្ងន់ៗ ទៅលើសមាគមសេដ្ឋកិច្ចក្រៅប្រព័ន្ធថា ជាសមាគមដែលគ្មានការគ្រប់គ្រងត្រឹមត្រូវ និងបង្ករភាព​ចលាចល​ដល់សង្គម ព្រោះមានសមាជិក ជាអតីតអ្នកញៀនថ្នាំ។ មិនតែប៉ុណ្ណោះ លោកបានសង្កត់ធ្ងន់ថា ប្រធាន​សមាគម​ខាងលើ ជាមមនុស្សកំសាក មិនហ៊ានចេញមុខដោះស្រាយបញ្ហាជាមួយគ្នា ដោយប្រាប់កូនចៅរបស់ខ្លួន គេច​ពីតំបន់គោលដៅអស់។

ពាក្យសម្តីធ្ងន់ៗទាំងនេះ ត្រូវបានសមាជិក របស់សមាគមរួមគ្នាអភិវឌ្ឃន៍កម្ពុជា គាំទ្រ និងស្រែកហោរកញ្ច្រៀវ យ៉ាង​អឺង​កង។ ប៉ុន្តែបើទោះជា ការស្រែកហ៊ោកញ្ជៀវនោះ បានបង្កការរំខាន និង ដែលបង្ករការកកកុញ នៅមុខចំណុច​សាលា​ខណ្ឌ​ទួលគោកនោះក៏ដោយ ក៏គេមិនឃើញ មានសមត្ថកិច្ចចរាចរណ៍ណាមួយ ធ្វើការបញ្ឈប់ និងរារាំងនោះឡើយ។ ហើយ​ក្បួនរបស់ក្រុមសមាគមនេះ បានបន្តរហូតដល់ទីតាំងមុខ រ៉ារទេះភ្លើងនៅក្នុងខណ្ឌដូនពេញ។

ដោយឡែកលោក វ៉ន ពៅ ប្រធានសមាគមសេដ្ឋកិច្ចក្រៅប្រព័ន្ធ បានឲ្យទស្សនាវដ្តីមនោរម្យ.អាំងហ្វូដឹង នៅថ្ងៃទី១៤ ខែ​មិនាថា លោកពិតជាបានហាមឃាត់ សមាជិកមិនឲ្យនៅទីនោះមែន ព្រោះបើនៅកន្លែងនោះ ច្បាស់ជាមានរឿងជាមួយ​គ្នាមិនខាន។ លោកចង់ឲ្យក្រុមអ្នករត់កង់បីទាំងអស់ មានសុវត្តិភាព។ តែលោកបានបដិសេធថា ចំពោះរឿងដែល​ប្រធាន សមាគមរួមគ្នាដើម្បីអភិវឌ្ឍន៍កម្ពុជា បាននិយាយទាំងអស់ មិនមែនជាការពិតទេ ព្រោះពេលមានរឿងវាយ​តប់​គ្នាកើតឡើង គឺក្រុមសមាជិករបស់លោក ឯ សុភាស់ ជាអ្នកផ្តើមមុន។

លោក វ៉ន ពៅ បានបញ្ជាក់ថា បើមានការជួបគ្នា នៅកន្លែងសាធារណៈនោះមែន តើទទួលបានផលប្រយោជន៍អ្វី សម្រាប់​ភាគីទាំងសងខាង? បន្ទាប់ពីការបដិសេធន៍នេះ ប្រធានសមាគមសេដ្ឋកិច្ចក្រៅប្រព័ន្ធ បានឲ្យដឹងទៀតថា លោក​នឹង​ទៅចូលរួម ក្នុងការចរចារមួយ នៅសាលាខណ្ឌដូនពេញ វេលាម៉ោង៣រលៀល ថ្ងៃទី១៦ ខែមីនា រវាង​សមាគម​ទាំងពីរ ដើម្បីឲ្យមានលទ្ធផលច្បាស់លាស់ រវាងគ្នា និងគ្នា។

ក្នុងការចរចានោះ នឹងមានការចូលរួម ពីតំណាងសមាគមទាំងពីរ ព្រមទាំងមានវត្តមានលោក គួច ចំរើន អភិបាល​ខណ្ឌ​ដូនពេញ រួមនឹងអ្នកសង្កេតការណ៍ អង្គការសង្គមស៊ីវិល ផ្សេងទៀតដែរ៕