តើដែនដីប៉ាឡេស្ទីន នឹងអាចក្លាយជាប្រទេសមួយ សមាជិកនៃអង្គការសហប្រជាជាតិ ដែរឬទេ? ចំលើយនេះនឹងអាចដឹង​ជាផ្លូវការ ចាប់ពីចុងសប្តាហ៍នេះទៅ។

ទង់ជាតិរបស់រដ្ឋប៉ាឡេស្ទីន នៅទីក្រុងរ៉ាម៉ាឡា។ រូបថត MONOROOM.info/ Chea Bunthoeun។

លោក រីយ៉ាដ ម៉ង់សួរ(Riyad Mansour), អ្នកអង្កេត របស់អង្គការសហប្រជាជាតិ(UN) ប្រចាំការណ៍ នៅប៉ាឡេស្ទីន បានប្រកាស​ទុក​ជាមុនថា នឹងមាន « ព្រឹត្តការណ៍ជា ប្រវត្តិសាស្រ្តមួយ សម្រាប់ជនជាតិប៉ាឡេស្ទីន» ។ គឺនៅថ្ងៃព្រហស្បត៍ ស្អែកនេះ ភាគច្រើននៃ​ប្រទេសជាសមាជិក របស់អង្គការសហប្រជាជាតិ នឹងអនុម័តរួមគ្នា រកដំណោះស្រាយឡើងវិញ ដើម្បីឈានទៅរក ការទទួលស្គាល់ ប៉ាឡេស្ទីនជារដ្ឋមួយឯករាជ និង ជាសមាជិករបស់ អង្គការសហប្រជាជាតិ ។ នេះបើតាម ការសែតបារាំង ឡឺនូវែល អុបស៊ែវ៉ាទ័រ។

លោក ម៉ង់សួរ បានអបអរសាទ័រ ដល់ប្រទេសបារាំង និងសមជិកនៃបណ្តាប្រទេសនៃសហគមន៍ អុឺរ៉ុបផ្សេងទៀត ដែលបានអះអាង កាលពីម្សិលមិញថា នឹងគាំទ្រឲ្យមានសន្ធិសញ្ញា ដើម្បីឯករាជភាពមួយ សម្រាប់រដ្ឋប៉ាលេស្ទីន។ លោកបន្លែមថា នេះជាមធ្យោបាយ​ចរចាមួយ ដែលជាក់លាក់ ដើម្បីឈានទៅរកសន្តិភាពមួយ រវាងប៉ាលេស្ទីន និង អ៊ីស្រាអែល។ អ្នកអង្កេតការណ៍រូបនេះ បានក្រើន​រំលឹកថា « បើប្រទេសណា ចង់ឃើញភាគីទាំងពីរ រស់នៅដោយសន្តិភាពនោះ គេនឹងបោះឆ្នោត អនុម័តដើម្បី រកដំណោះស្រាយ​នេះ​មិនខាន» ។

គម្រោងខាងលើនេះ នឹងត្រូវលើកមកពិភាក្សា និងបោះឆ្នោតយកសំលេងភាគច្រើន នៅថ្ងៃស្អែក ដោយមានប្រទេស ចំនួន១៩៣​ ជាសមាជិក នៃមហាសន្តិបាទ របស់អង្គការសហប្រជាជាតិចូលរួម នៅស្នាក់ការទីក្រុង New York ។ ចំពោះលោក ឡូរ៉ង់ ហ្វាបយូស (Laurent Fabius) រដ្ឋមន្រ្តីក្រសួងការបរទេសបារាំង បានលើកឡើងនៅក្នុងកិច្ចប្រជុំមួយ នៅរដ្ឋសភាបារាំងថា គោលជំហររបស់​បារាំង គឺគាំទ្រទាំងស្រុង ក្នុងការរកដំណោះស្រាយនេះ ដល់ប៉ាឡេស្ទីន។ លោកបន្ថែមថា ទាំងនេះក៏ជាចំណុចនៃការសន្យាមួយ របស់ប្រធានាធិបតីបារាំង ហ្រ្វង់ស័រ ហូឡង់ ផងដែរសម្រាប់អណត្តរបស់គាត់។

បច្ចុប្បន្នប្រទេសបារាំងបាន និងកំពុងតែអំពាវនាវ ដល់បណ្តាប្រទេស ជាសមាជិកសហភាពអ៊ឺរ៉ុបទាំង២៨ ដើម្បីបោះឆ្នោត​យល់ព្រម ដាក់រដ្ឋប៉ាលេស្ទីន ឲ្យចូលជាសមាជិកពេញសិទ្ទិ របស់អង្គការសហប្រជាជាតិ។ លោករដ្ឋមន្រ្តី ក្រសួងការបរទេសបារាំង បានបន្ថែម​ថា កិច្ចព្រមព្រៀងឈប់បាញ់ រវាងភាគីទាំងពីរនេះ វាមានលក្ខណៈផុយស្រួយណាស់ ដោយសារតែ ជិតមានការបោះឆ្នោត នៅក្នុង​ប្រទេសអ៊ីស្រាអែល និង ការផ្លាស់ប្តូរ គោលជំហរនយោបាយរដ្ឋបាលមួយចំនួន របស់សហរដ្ឋអាមេរិក ទៅលើអ៊ីស្រាអែល​ផងដែរ។
ដំណោះស្រាយ ដែលមានប្រសិទ្ធិភាពបំផុតនោះ គឺមានតែការចចារមួយ ដើម្បីដាក់រដ្ឋប៉ាលេស្ទីន ចូលជាសមាជិកពេញសិទ្ធិ និង​ឯករាជ្យទេ។ គេនឹងរងចាំមើល ការបោះឆ្នោតសម្រេច របស់ប្រទេសជាសមាជិកទាំងអស់ សម្រាប់អនាគត រដ្ឋប៉ាឡេស្ទីន នៅថ្ងៃ​ព្រហស្បត៍ស្អែកនេះ៕

------------------------------------------------------
ដោយ៖ ជា ប៊ុនធឿន ថ្ងៃទី២៨ វិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ