ប្រេដ ភីត បាននិយាយប្រាប់ទស្សនាវដ្ដី «ភីបផល» ថាពិធីមង្គលការរបស់ លោកនិងនាង អង់ជឺលីណា ជូលី នឹងរៀបចំធ្វើ ក្នុងពេល​ឆាប់ៗនេះហើយ។ ជាដំណឹងមួយថ្មី ដែលតារាពិភពលោកបានធ្លោយអោយដឹង បន្ទាប់ពីពិធីភ្ជាប់ពាក្យបានប្រព្រឹត្តិទៅ កាលពីខែ​មេសាកន្លងទៅរួចមក។

តារាភាពយន្ដ ប្រេដ ភីត និងអង់ជឺលីណា ជូលី។ រូបភាព រ៉យទ័រ។

តាំងពីណាណីមក កំពូលតារាប្រចាំហូលីវូដ ទាំងពីរ មិនសូវជាបានបង្ហាញពីកម្មវិធីអ្វីមួយ ដែលធ្វើអោយគេទន្ទឹង​រងចាំខ្លាំង ដូច​ពេលនេះនោះទេ បើទោះជាអាពាហ៍ពិពាហ៍នេះ នៅមិនទាន់អោយដឹង ថានឹងធ្វើនៅថ្ងៃណាក៏ដោយ។ ប៉ុន្ដែអ្វីដែល ប្រេដ ភីត (Brad Pitt) ខ្លួនឯង បានបង្ហើបអោយដឹង ក្នុងទស្សនាវដ្ដី «ភីបផល (People)» គឺថ្ងៃរៀបការរបស់គេទាំងពីរ នឹងច្បាស់ជារៀបធ្វើ ក្នុងពេល​ឆាប់ៗខាងមុខនេះ។ «ខ្ញុំមានសម្ពាធកាន់តែច្រើនឡើងៗ ពីកូនរបស់របស់ខ្ញុំ ហើយខ្ញុំក៏ចង់អោយកូន គ្នារស់ដោយមានឪពុកម្ដាយ​រៀបការផងដែរ។ ម្យ៉ាងទៀត ខ្ញុំគិតថា វាដល់ពេលសមល្មមហើយ។» លោកបានបញ្ជាក់ យ៉ាងដូច្នេះ ប្រាប់ទៅទស្សនាវដ្ដី ក្នុងកិច្ច​សម្ភាសមួយ ដែលនិយាយពីការចេញបញ្ចាំង ភាពយន្ដរបស់លោក  មានចំណងជើងថា « សម្លាប់ពួកវាមិនដឹងខ្លួន (Killing Them Soflty)» នៅទីក្រុងញ៉ូយក។

ប្រេដ ភីត បានបន្ថែមថា «ជិតដល់ពេលហើយ។ ហើយខ្ញុំមានអារម្មណ៍ ល្អណាស់ ពីរឿងអស់ទាំងនេះ។» បើទោះជាគូរស្នេហា​ហូលីវូដ ទាំងពីរបានរស់នៅជាមួយគ្នា តាំងពី៧ឆ្នាំមកហើយក៏ដោយ តែពិធីបំពាក់ជញ្ជៀនចូលក្នុងម្រាមដៃ របស់ពួកគេម្នាក់ៗ មានន័យសំខាន់ណាស់ សម្រាប់ប្រេដ ភីត។ «យើងមានគ្រួសារមួយ។ យើងបានចិញ្ចឹមបីបាច់  កូនរបស់យើង។ តែខ្ញុំមានអារម្មណ៍​រំភើបណាស់ ដែលឃើញក្នុងកែវភ្នែករបស់ខ្ញុំ ពីសារសំខាន់ដ៏សម្បើម នៃអាពាហ៍ពិពាហ៍  តាំងពីពេលដែលយើងបានសាងជីវិត​រួមគ្នាមក។»

សេចក្ដីស្នេហារបស់ គូរស្នេហ៍ទាំងពីរបានផ្ទុះឆាបឆេះឡើង នៅពេលដែលប្រេដ ភីត និងអង់ជឺលីណា ជូលី បានដើរតួសម្ដែងរួមគ្នា ក្នុងភាពយន្ដរឿង «លោក​ និងលោកស្រី ស្មីត (Mr. & Mrs. Smith)» កាលពីឆ្នាំ២០០៥។ ក្រោយពីនោះមក គូរស្នេហ៍ទាំងពីរ បាន​ផ្គុំជារូបរាង ដែលស្មោះស្ម័គ្រ និងលន្លងលន្លោចខ្លាំងជាងគេ នៅហូលីវូដ។ សព្វថ្ងៃអង់ជឺលីណា ជូលី ជាអង្គទូតនៃអំពើរល្អ របស់​អង្គការសហប្រជាជាតិ ហើយអ្នកទាំងពីរមានកូនក្នុងបន្ទុក ចំនួន៦នាក់៖ បីនាក់ជាកូនបង្កើត និងបីនាក់ផ្សេងទៀត ជាកូនចិញ្ចឹម។ កូនចិញ្ចឹមម្នាក់ ឈ្មោះម៉ាដុក អាយុ១០ឆ្នាំ មានដើមកំណើតជាខ្មែរ​ ជាកូនដែល អង់ជឺលីណា បានសុំពីប្រទេសកម្ពុជាមកចិញ្ចឹម តាំង​ពីមុនពេលនាងជួបជាមួយ ប្រេដ ភីតមកម្លេះ។

គឺដោយសារមកពីសមាជិកគ្រសារ ទាំងនេះហើយ ទើបអ្នកទាំងពីរសម្រេចចិត្ត នឹងឡើងមកពាក់ជញ្ជៀនអោយគ្នា នៅក្នុងពិធីដ៏​អធិកអធមមួយនោះ។ ប្រេដ ភីតបានអះអាងថា «កូនៗចង់អោយមាន ពិធីនេះខ្លាំងយកតែមែនទែន ហើយតែងសួរខ្ញុំជារឿយៗ។ ដូច្នេះ ខ្ញុំត្រូវតែឆ្លើយតប សន្យាទៅវិញយ៉ាងអញ្ចឹង ដូចគ្នា៕»

--------------------------------------------------
ដោយ ឈូករ័ត្ន - ប៉ារីស​ ថ្ងៃទី២៩ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ