ប្រព័ន្ធពាណិជ្ជកម្ម នៃផលិតផលបច្ចេកវិទ្យាក្នុងលោក កំពុងបន្តទៅមុខ តែបានដាក់ចេញមកលក់មកក្នុងទីផ្សារ មានលក្ខណៈ​ប្រហាក់ប្រហែលគ្នា មិនសូវឃើញមានភាពខុសគ្នាប៉ុន្មានទេ។

សង្គ្រាមផ្កាយរវាង អាយអូអេសរបស់អ័បផល និងអង់ដ្រ័ររបស់ហ្គូហ្គើល។ រូបភាព 3D។

នៅពេលដែលក្រុមហ៊ុនអ័បផល បានដាក់ចេញមកលក់ នូវផលិតផលទូរស័ព្ទចុងក្រោយគេបង្អស់ (iPhone5) នោះ នៅសហរដ្ឋ​អាមេរិក អ្នកស្រឡាញ់ចូលចិត្តនឹងអ័បផល នៅតែស្មោះស្ម័គ្រនឹងផលិតផលនេះ ជាមួយនឹងអ្នកចំណូលចិត្តថ្មីខ្លះៗទៀត ហើយបាន​ធ្វើអោយការលក់ផលិតផលនេះ មានការកើនឡើង ក្នុងរយះពេល១ឬ២ត្រីមាសដំបូងនេះ។ តែនៅទ្វីបអ៊ឺរ៉ុបឯណោះវិញ ផលិតផល​របស់អ័បផល មិនសូវជាទទួលបាន នូវចំណូលចិត្តថ្មីប៉ុន្មាន ពីសំណាក់អតិថិជននោះទេ។

តាមតួលេខ នៃត្រីមាសចុងក្រោយ (រហូតដល់ថ្ងៃ៣០តុលាកន្លងមក) ផ្ដល់ដោយការិយាល័យសិក្សាទិន្នន័យ កេនតា វើលផានែល (Kantar WorldPanel) បានអោយដឹងកាលពីថ្ងៃអង្គារទី២៧វិច្ឆិកា ថា អាយហ្វូនលក់ដាក់នៅសហរដ្ឋអាមេរិក ប្រមាណជា ៤៨,១% ទល់នឹង ៤៦,៧% នៃទូរស័ព្ទដទៃៗទៀតបញ្ចូលគ្នា។ តែផ្ទុយទៅវិញ សម្រាប់ប្រទេសចំនួន៥សំខាន់ៗ នៅអ៊ឺរ៉ុបខាងលិច (អាឡឺម៉ង់ បារាំង អង់គ្លេស អ៊ីតាលី និងអេស្ប៉ាញ) ទូរស័ព្ទដែលប្រើប្រព័ន្ធមេរបស់ហ្គូហ្គើល (Google គឺអង់ដ្រ័រ) បានបង្ហាញពី​ តួលេខលក់​ដាច់របស់ខ្លួន ខ្ពស់ជាងអាយហ្វូន ច្រើនលើសលប់ (៦៣,៩% នៃប្រព័ន្ធអង់ដ្រ័រ ទល់នឹង២១,២%នៃអាយអូអេស)។ តួលេខលក់ដាច់ របស់ប្រព័ន្ធមេអង់ដ្រ័រនេះ បាននាំមុខអាយអូអេស ( iOS) របស់អ័បផល ដូចគ្នាដែរនៅក្នុងប្រទេសចិន និងប្រេស៊ីល។

អាមេរិក ទល់នឹងអ៊ឺរ៉ុប !

សម្រាប់ផលិតផល ដែលចាញ់គេហៅមិនលឺវិញ គឺទូរស័ព្ទ ប្លេកប៊ឺរី (Blackberry) (១,៦%នៅអាមេរិក ទល់នឹង ៥,3%នៅអ៊ឺរ៉ុប) ខណៈ​ក្រុមហ៊ុនរបស់ទូរស័ព្ទនេះ កំពុងរងចាំការចេញមកលក់ នូវផលិតផលថ្មីរបស់ខ្លួន (Blackberry10) នៅដើមឆ្នាំក្រោយ។ ចំណែកឯ វិនដូវ ហ្វូន (Windows Phone) វិញ ក៏មានវាសនាមិនខុសគ្នាប៉ុន្មានពី ប្លេកប៊ឺរី ដែរ ជាមួយនឹងតួលេខនៃការលក់ដាច់របស់ខ្លួន ២,៧%​នៅអាមេរិក ទល់នឹង ៤,៧%នៅអ៊ឺរ៉ុប។ តួលេខនេះ នឹងនៅតែអាក្រក់ដដែល  ដោយហេតុថា វិនដូវ ហ្វូន៨ (Windows Phone 8 ) មាន​ចេញមកអោយប្រើប្រាស់ ចុងក្រោយរបស់មីក្រុសូហ្វ៍ មានតែនៅលើម៉ាស៊ីនតែពីរប៉ុណ្ណោះ ក្នុងពិភពលោក គឺ Nokia Lumia 920 និង HTC 8X។

គម្លាតនៃការលក់ដាច់របស់ អាយអូអេស នៅអាមេរិក និងនៅអ៊ឺរ៉ុប មានមូលហេតុច្រើន។ ទីមួយ អ័បផលនៅមានអ្នកស្មោះស្ម័គ្រ​ជាច្រើន ក្នុងប្រទេស៖ ៦២% នៃអ្នកប្រើប្រាស់ទូរស័ព្ទដៃទាំងអស់ ប្រើទូរស័ព្ទយីហោ អាយហ្វូន។ ម្យាងទៀត ទីផ្សារទូរស័ព្ទ​របស់​អាមេរិក មានដំណើរការប្រមាណជា ៩០% ជាមួយនឹងការជៀវទៅប្រើប្រាស់ ដែលមានកិច្ចសន្យា បង់ប្រាក់រំលោះថោកៗ ចំនួន​២ឆ្នាំ។ រីឯនៅអ៊ឺរ៉ុប បើទោះជាដំណើរការនៃការជៀវ មានលក្ខណៈប្រហាក់ប្រហែលគ្នា តែអ្នកប្រើប្រាស់ទូរស័ព្ទដៃភាគច្រើន សុខចិត្ត​ទិញទូរស័ព្ទទាំងមូលដាច់ ដោយគ្មានកិច្ចសន្យាអ្វីទាំងអស់។ ដូច្នេះហើយ អ្នកប្រើប្រាស់ តែងតែងាកទៅរកទូរស័ព្ទណា ដែលមាន​«តម្លៃថោក» និងជាករណីរបស់បណ្ដាទូរស័ព្ទ ដែលប្រើប្រព័ន្ធមេ អង់ដ្រ័រ៕

--------------------------------------------------
ដោយ៖ សេក មនោរកុមារ - ប៉ារីស ថ្ងៃទី២៧ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ