សាកសពរបស់លោក យ៉ាស៊ែ អារ៉ាហ្វាត អតីតថ្នាក់ដឹកនាំប៉ាលេស្ទីន ត្រូវបានគេសំរេច គាស់នៅថ្ងៃអង្គារទីនេះ ដើម្បីធ្វើ​កោសលវិច័យឡើងវិញ បន្ទាប់ពីមានការសង្ស័យថា លោកបានស្លាប់ដោយសារតែ សារជាតិពុលម្យ៉ាងដែល គេហៅថា ប៉ូឡូនីយ៉ូម។ ការអង្គេតនេះបានធ្វើឡើង បន្ទាប់ពីមានពាក្យបណ្តឹងរបស់ ប្រពន្ធលោក ទៅតុលាការប្រទេសបារាំង។

រូបថតអតីតប្រធានរដ្ឋប៉ាឡេស្ទីន លោកយ៉ាស៊ែ អារ៉ាហ្វាត នៅទីក្រុងរ៉ាម៉ាឡា។
រូបថត MONOROOM.info/ Chea Bunthoeun

ក្រុមអ្នកជំនាញមកពីប្រទេសបារាំង ប្រទេសស្វីស និងប្រទេសរូស្សុីបានចាប់ផ្តើម ប្រតិបត្តិការណ៏ គាស់សពរបស់អតីតថ្នាក់ដឹកនាំ អង្គការរំដោះប៉ាលេស្ទីន ដើម្បីធ្វើការអង្តេត លំអិតឡើងវិញ កាលពីព្រឹកថ្ងៃអង្គារទី ២៦ វិច្ឆិកា ២០១២នេះនៅទីក្រុង រ៉ាម៉ាឡា (Ramallah) ស្ថិតក្នុងតំបន់វែសប៊ែង។ នេះជាការបោះឆ្នោតសម្រេច របស់សភាអង្គការសហប្រជាជាតិ។ ប្រតិបត្តការណ៍ វិភាគលើ​សាកសព នឹងប្រព្រឹត្តទៅ នៅក្នុងបណ្តាប្រទេស ទាំងបីខាងលើ ហើយលទ្ធផលនឹងអាចចេញ ជាផ្លូវនៅដើមឆ្នាំ២០១៣។

ការគាស់សាកសពរបស់លោក បានប្រព្រឹត្តទៅដោយបិទរបងជិត ដែលមិនបានអនុញ្ញាត្តិ ឲ្យមានការចូល ជាសាធារណៈឡើយ ។ សូម្បីតែអ្នកយកព័ត៍មាន ក៏មិនត្រូវបានអនុញ្ញាត្តឲ្យចូល ថតយករូបភាពសកម្មភាព នេះផងដែរ។ បើតាមអ្នកនាំពាក្យ ក្នុងបេសកកម្ម​ស៊ើបអង្កេត របស់អជ្ញាធរប៉ាលេស្ទីន បានឲ្យដឹងថា បន្ទាប់ពីការគាល់នេះ ផ្នូររបស់លោកនឹងត្រូវបិទឡើងវិញ ហើយក៏មានធ្វើពិធី​តាមរបៀបវីរៈយោធា និងប្រពៃណីយ៏ផងដែរ។

ជាង៨ឆ្នាំបន្ទាប់ពីការស្លាប់របស់ អារ៉ាហ្វាត ទូរទស្សន៍ អាហ្សាហ្សេរ៉ា(Aljazeera) របស់ប្រទេសកាតា បានចាក់ផ្សាយបទយកការណ៍ បែបអង្កេតរបស់ខ្លួន ដោយបង្ហាញពីភាពសង្ស័យ ក្នុងការស្លាប់េនះ។ អាហ្សាហ្សេរ៉ាបានដក់ស្រង់សំដី នាយកមជ្ឈមណ្ឌល នីតិវេជ្ជវិជ្ជា នៃសាកលវិទ្យាល័យឡូសាន (Laussane) ប្រទេស្វីស។ លោកបានបង្ហាញថា នៅក្នុងសម្ភារៈប្រើប្រាស់ របស់អារ៉ាហ្វាត ដូចជា ច្រាស់ដុះធ្មេញ ខោត្រនាប់... ជាដើម មានបរិមាណជាតិវិទ្យុសកម្ម ខុសពីប្រក្រតី គឺសារធាតុពុល ប៉ូឡូនីយ៉ូម(Polonium) ។

បន្ទាប់ពីមានការសង្ស័យនេះ អ្នកស្រី ស៊ូហា អារ៉ាហ្វាត (Souha Arafat) អតីតភរិយារបស់ យ៉ាស៊ែ អារ៉ាហ្វាត បានដាក់ពាក្យបណ្តឹង ទៅតុលាប្រទេសបារាំង ដើម្បីធ្វើការអង្កេតឡើងវិញ ពីមូលហេតុជាក់ស្តែង នៃការស្លាប់េនះ។ អារ៉ាហ្វាត(Yasser Arafat) បានស្លាប់ កាលពីថ្ងៃទី១១ វិច្ឆិកា ២០០៤ នៅមន្ទីពេទ្យយោធាពែសុី (Percy) ប្រទេសបារាំង ក្នុងអាយុ៧៥ឆ្នាំ។ ហើយមិនមានការបំភ្លឺ បែបការ​វិភាគវេជ្ជសាស្រ្ត ណាមួយក្នុងករណីស្លាប់នេះទេ។

ការមន្ទឹលនេះ ធ្វើឲ្យមានការវិភាគ ខុសៗគ្នា។ តាមប្រភពមួយចំនួនបានសង្ស័យថា ការស្លាប់នេះ ប្រហែលជាមានទាក់ទង នឹងការ​ដណ្តើមអំណាចផ្ទៃក្នុង របស់អជ្ញាធរប៉ាលេស្ទីន។ ផ្ទុយទៅវិញប្រភពមួយទៀត បានសង្ស័យថា មានការពាក់ព័ន្ធ នឹងរដ្ឋអំណាច អេប្រ៊ើ (ប្រទេសអុីស្រាអែល)។ ចំពោះលទ្ធផលអង្កេតជាផ្លូវការ លើការស្លាប់របស់ថ្នាក់ដឹកនាំ ជាប្រវត្តិសាស្រ្តរបស់ប៉ាលេស្ទីន នឹងអាចដឹងក្នុងរយះពេល ក្រោយបីខែទៀត៕

------------------------------------------------------
ដោយ៖ ជា ប៊ុនធឿន ថ្ងៃទី២៧ វិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ