ការស៊ើបអង្កេតដ៏ពិសេសមួយ ដែលត្រូវបានដឹកនាំដោយអ្នកជំនាញជាតិបារាំង បានបង្ហាញលទ្ធផលថា ពួកគេរក​មិនឃើញពីសញ្ញា នៃការ«បំពុល»ជាតិប៉ូឡូនីញ៉ូម ទៅលើអតីតប្រធានរដ្ឋប៉ាឡេស្ទី យ៉ាស្សេ អារ៉ាហ្វាត (Yasser Arafat) នោះទេ។ នេះបើតាមការបញ្ជាក់របស់ ភរិយារបស់អតីតមេដឹកនាំប៉ាឡេស្ទីនដ៏ល្បីឈ្មោះ នៅល្ងាច​ថ្ងៃអង្គារ​ទី០៣​ខែធ្នូកន្លងមក។

រូបថតអតីតប្រធានរដ្ឋប៉ាឡេស្ទីន លោកយ៉ាស៊ែ អារ៉ាហ្វាត នៅទីក្រុងរ៉ាម៉ាឡា។ (រូបថត MONOROOM.info/ Chea Bunthoeun)

សំនុំរឿងបំពុល - អ្នកវិទ្យាសាស្ត្រជាច្រើនរូប​ ដែលមកពីច្រើនប្រទេស បានសាកល្បង និងកំណត់ឲ្យបាន នូវ​មូលហេតុនៃមរណភាព របស់អតីតប្រធានរដ្ឋប៉ាឡេស្ទីន និងចង់ដឹងថាតើជាតិបំពុល ប៉ូឡូនីញ៉ូម ត្រូវបានប្រើដើម្បី​ធ្វើឃាត ទៅលើរដ្ឋបុរសរូបនេះឬយ៉ាងណា។ លោក យ៉ាស្សេរ អារ៉ាហ្វាត បានស្លាប់នៅក្នុងមន្ទីរពេទ្យយោធាមួយ ក្នុងប្រទេសបារាំង នាឆ្នាំ២០០៤។ តែបណ្ដាជនប៉ាឡេស្ទីន បានសង្ស័យតាំងពីពេលនោះមកថា ប្រទេសអ៊ីស្ត្រាអែល បានបំពុលប្រធានរដ្ឋរបស់ពួកគេ។ ជាការចោទប្រកាន់ ដែលត្រូវបានប្រទេសអ៊ីស្ត្រាអែល ច្រានចោលទាំងស្រុង។

ស្លាកស្នាមនៃសារជាតិសកម្ម ប៉ូឡូនីញ៉ូម ត្រូវបានគេរកឃើញ នៅលើសម្លៀកបំពាក់នៃអតីតប្រធានរដ្ឋរូបនេះ នៅ​ឆ្នាំ២០១២ ដែលជាហេតុធ្វើឲ្យភរិយាលោក អារ៉ាហ្វាត បានដាក់ពាក់បណ្ដឹងនៅប្រទេសប្រទេសបារាំង ទាមទារ​ឲ្យ​មានការស៊ើបអង្កេតមួយ ដើម្បីចង់ដឹងថាតើ ស្វាមីរបស់លោកស្រី ត្រូវបានគេធ្វើឃាត់ដោយ«បំពុល»។

នៅក្នុងរង្វង់នៃការស៊ើបអង្កេតនេះ អ្នកជំនាញបារាំងត្រូវការគាស់យកគម្រោងឆ្អឺងរបស់ លោក អារ៉ាហ្វាត ដើម្បី​មក​ធ្វើ​ការ​ពិសោធន៍​ទាក់ទងនឹងការបំពុល ឬការប្រើថ្នាំខុស ឬការប្រើជាតិវិទ្យុសកម្មអ្វីមួយ។ ប៉ុន្តែលោកស្រី ស៊ូហា អារ៉ាហ្វាត (Suha Arafat - ភរិយាលោក អារ៉ាហ្វាត) បានប្រកាសប្រាប់អ្នកការសែតកាលពីថ្ងៃអង្គារថា របាយការណ៍​របស់​អ្នក​ជំនាញបារាំង មិនបានរាប់បញ្ចូល ពីការដាក់បំពុលស្វាមីរបស់លោកស្រី ដោយសារជាតិ ប៉ូឡូនីញ៉ូម​នោះ​ទេ។ ហើយអ្នកជំនាញទាំងនោះ ក៏មិនបានសន្និដ្ឋានភ្លាមៗដែរថា អតីតប្រធានរដ្ឋ ត្រូវបានស្លាប់តាមធម្មជាតិ (ដោយ​ជម្ងឺ) នោះនៅឡើយ។

សេចក្ដីសន្និដ្ឋាន ដែលចេញពីការស៊ើបអង្កេតរបស់អ្នកជំនាញបារាំង បានផ្ទុយទៅនឹងរបាយការណ៍មួយ​របស់មន្ទីរ​ពិសោធន៍ នៅប្រទេសស្វីស ដែលបានរកឃើញថា លោក យ៉ាស្សេ អារ៉ាហ្វាត ទំនងជាបានស្លាប់ដោយសារ​ការ​បំពុល។ ក្រុមអ្នកជំនាញជាតិរ៉ូស្សី មិនអាចនិយាយថាយ៉ាងដូចម្ដេចដែរ នៅលើសំនុំរឿងនេះ។ ប៉ុន្តែអ្នកស៊ើបអង្កេត​នៃប្រទេសទាំងពីរ បានគិតរហូតមកថា លោក អារ៉ាហ្វាត ត្រូវបានសម្លាប់ ដោយសារជាតិពុលអ្វីមួយ។

ភរិយាលោក អារ៉ាហ្វាត បានបញ្ជាក់ពីការភ្ញាក់ផ្អើលរបស់លោកស្រី ដោយសាររបាយការណ៍ដ៏ចម្លែកៗ របស់អ្នក​ជំនាញនៅទ្វីបអ៊ឺរ៉ុបទាំងនេះ។ រហូតមកដល់ពេលនេះ គេនៅមិនទាន់ដឹងពីរបាយការណ៍នោះ នឹងអាចមាន​ការទាក់​ទងបែបណា ជាមួយនឹងការស៊ើបអង្កេតករណីឃាតកម្ម ដែលនឹងត្រូវធ្វើបន្តទៀតនោះទេ។ នៅឆ្នាំ២០០៤ ពេល​ដែល​លោក អារ៉ាហ្វាតធ្លាក់ខ្លួនឈឺ មួយខែមុនមរណភាពរបស់លោកនោះ គ្រូពេទ្យបារាំងបានបញ្ជាក់ថា លោក អារ៉ាហ្វាត បានរងគ្រោះនឹងការដាច់សរសៃឈាមខួរក្បាល និងមានបញ្ហាក្នុងឈាម តែមិនបានបញ្ជាក់បន្ថែមឲ្យ​លំអិតនោះទេ៕

------------------------------------------------
ដោយ៖ សេក មនោរកុមារ - ប៉ារីស​ ថ្ងៃទី៤ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ