តើលោកអ្នកយល់យ៉ាងណា ប្រសិនបើគ្រូរបស់លោកអ្នក នៅក្នុងថ្នាក់រៀន បានបង្កើតវិធីសាស្ត្រចម្លែកមួយ ដើម្បីមក​បង្រៀនកូនសិស្សនោះ។ វាច្បាស់ហើយ ថាបើសិនជា វិធីសាស្ត្រសប្បាយៗ ដូចនៅក្នុងវីដេអូនេះ លោកអ្នកប្រាកដ​ជា​អត់​ទ្រាំ មិនសើចសប្បាយ ឬអាចនឹងលោត ទៅអោបគ្រូបង្រៀននេះទៀតផង។

វីដេអូនេះ ត្រូវបានផលិតឡើង ដោយ លោក ម៉ាតជូ វេដ័រ (Matthew Weathers) ជាសាស្ត្រាចារ្យមួយរូប មកពីសាកល​វិទ្យាល័យ បាយអូឡា (Biola) ក្នុងភាគខាងត្បូង នៃរដ្ឋកាលីហ្វ័នី សហរដ្ឋអាមេរិក។ លោកមានជំនាញខាង គណិតវិទ្យា។ ប៉ុន្តែ នៅក្នុងវីដេអូនេះ លោកមិនបានធ្វើឲ្យ គេគិតពីលោក ត្រឹមតែជាសាស្ត្រាចារ្យគណិតវិទ្យាប៉ុណ្ណោះទេ តែលោកក៏ជា​សិល្បៈករម្នាក់ យ៉ាងជំនាញម្នាក់ដែរ។

តាមពិតទៅ វីដេអូខាងលើ ត្រូវបានផលិតឡើង នៅក្នុងឱកាសនៃថ្ងៃបុណ្យកុហក ទី០១ ខែមេសា ដែលការកំសាន្ដអ្វីៗ​គ្រប់យ៉ាង ត្រូវបានអនុញ្ញាត។ លោកសាស្ត្រាចារ្យ ម៉ាតជូ បានបង្កើតឈុតឆាកបែបនេះ ហើយយកទៅបង្ហោះ នៅក្នុង​គេហទំព័រ យូធូប ជាមួយនឹងឃ្លាសរសេរថា៖ «ខ្ញុំបានលេង រឿងខ្លីមួយ នៅក្នុងថ្នាក់បង្រៀនគណិតវិទ្យារបស់ខ្ញុំ សម្រាប់​ថ្ងៃកុហក ខែមេសា។ នៅក្នុងនេះ ខ្ញុំបង្ហាញពីវីដេអូមួយ ស្ដីពី"ជំនួយក្នុងការដោះស្រាយចំណោទ របស់សាលា" ដែល​ទទួល​បាន​មកវិញខ្លះ នូវចំណោទត្រីកោណ ដ៏អាក្រក់មួយ។ គួរឲ្យក្ដៅក្រហាយណាស់។»៕