ជាកម្មវិធីមួួយ ដែលរៀបចំឡើង នៅក្នុងឱកាស បុណ្យប្រពៃណី របស់អ្នកកាន់សាសនា គ្រឹស្ទ៍ ថ្ងៃទី០១ ខែមេសា (ឬ​ហៅ​ថា ថ្ងៃកុហក ទី០១ ខែមេសា) ប៉ុន្តែវាបានក្លាយ ជាហេតុការណ៍មួយ ដែលធ្វើឲ្យអ្នកចូលរួម ច្រើននាក់ ជួបនឹង​រឿង​ភ័យតក់ស្លុត ជាងអ្វីទាំងអស់ នៅក្នុងជីវិតរបស់ពួកគេ។ ទូរទស្សន៍ Santos Silvio ក្នុងប្រទេសប្រេស៊ីល បានរៀបចំ​កម្មវិធី​នេះឡើង ដែលមានឈ្មោះថា «ការវាយប្រហារ របស់ហ្វូងមនុស្សខ្មោច នៅក្នុងរថភ្លើងក្រោមដី»។

កាម៉េរ៉ាថតវីដេអូ ពីគ្រប់ជ្រុង ត្រូវបានគេដាក់ឲ្យលាក់ខ្លួន ដើម្បីថតយកទិដ្ឋភាព ហើយមនុស្សដែលចូល មកក្នុង​អន្ទាក់ នៃកម្មវិធីដំបូងគេ ធ្លាក់ទៅលើស្ត្រីម្នាក់ អាយុ៣០ឆ្នាំ។ បន្ទាប់ពីបានចូល ក្នុងរថភ្លើង ហើយជិះមកដល់​ស្ថានីយ៍ ដែល​កម្មវិធី បានត្រៀមបម្រុងនោះ ស្ត្រីរូបនោះ បានចាប់ផ្ដើមទទួលអារម្មណ៍ ហាក់ដូចជាចម្លែក ដូចជា ពីដំបូងឡើយ មាន​ភ្លើងភ្លិបភ្លែត សម្លេងស្រែករបស់នរណាម្នាក់ ហើយនាងចាប់ផ្ដើមភ័យបុកពោះ នៅពេលនាងទៅបើកទ្វារថភ្លើង តែទ្វា​មិនរបើកសោះ។

ក្រោយមកទៀត សម្លេងស្រែក របស់អ្នកបើកបររថភ្លើង បានបន្លឺឡើង ធ្វើឲ្យព្រលឹងកាន់តែហោះ ចេញពីក្នុងខ្លួន​ទ្វេ​ឡើង មុននឹងហ្វូងមនុស្សខ្មោច បានរត់ចូលមកតោង កញ្ចក់បង្អួចរបស់រថភ្លើង បង្កឲ្យឈុតឆាក មានលក្ខណៈដូចទាំង​ស្រុង ទៅនឹងភាពយន្ដព្រឺសម្បុរនានា របស់អាមេរិក។ មិនត្រឹមតែប៉ុណ្ណឹងទេ ឈុតឆាកនៅបន្តទៀត ជាមួយនឹង​មនុស្ស​ខ្មោចម្នាក់ បានចូលមកពញ៉ាក់ស្ត្រីវ័យ៣០ ខាងក្នុងទូរថភ្លើងផ្ទាល់តែម្ដង រហូតនាងលោតឡើង រួចយកដៃខ្ទប់មុខ។

ការវាយប្រហារ របស់ហ្វូងមនុស្សខ្មោច បានបញ្ចប់ទៅ នៅពេលដែលទ្វារថភ្លើង បានរបើកឡើង ហើយហ្វូង​មនុស្ស​ខ្មោច​ទាំងអស់ បានរត់ស្រចូលមករកស្ត្រី... ចង់មិនចង់ ព្រលឹងបានរត់ចេញ ពីក្នុងខ្លួនអស់ហើយ!!! ហើយបើទោះជា អ្នក​ធ្លាក់ក្នុងអន្លង់កម្មវិធីនេះ បានដឹងនៅពេលក្រោយមក ថាវាគ្រាន់តែជាការរៀបចំឡើង ដោយស្ថានីយ៍ទូរទស្សន៍​មួយ​ក៏ដោយ តែមិនប្រាកដថា លើកក្រោយៗ ពួកនាងៗហ៊ានធ្វើដំណើរ នៅពេលថ្មើរនេះ នៅក្នុងរថភ្លើងក្រោយដី តែឯង​នោះ​ទៀតឡើយ៕