ស្បែកជើងសម្រាប់ថតរូបខ្លួនឯងនេះ ត្រូវបានក្រុមហ៊ុនរចនាម៉ូដមួយ ឈ្មោះ Miz Mooz នៅទីក្រុងញ៉ូយក បង្កើតឡើង ដែលហេៅឈ្មោះ ជាផ្លូវការថា Selfie Shoes។ គោលបំណងធំបំផុត គឺដើម្បីឲ្យនាងៗ អាច«លើកជើង» ដែលមានពាក់​ស្បែកជើងប្រភេទនេះ ហើយបំពាក់ដោយម៉ាស៊ីនថត ឬទូរស័ព្ទដៃនោះ ដើម្បីថតរូបខ្លួនឯងបាន ជំនួសឲ្យដងដោយ ដែល​កន្លងមកត្រូវបានប្រើ ក្នុងករណីនេះ។ ជាពិសេស Selfie Shoes នឹងជួយឲ្យដៃទាំងគូររបស់នាង អាចធ្វើសកម្មភាព​អ្វី​ផ្សេង​ទៀត​បាន ក្នុងពេលថតរូប បើប្រៀបធៀប ទៅនឹងការប្រើដងដោយ ដែលនាងៗ ត្រូវបាត់ដៃមួយ ដើម្បីយកមក​កាន់។

ដើម្បីផលិតស្បែកជើង ដែលមានតួនាទីដូច្នេះបាន អ្នករចនាម៉ូដ បានបង្កើតជាកន្លែងមួយ សម្រាប់ដាក់ម៉ាស៊ីនថត ឬ​ទូរស័ព្ទ​ដៃ នៅខាងមុខ។ ចំពោះតម្លៃរបស់ស្បែកជើងនេះ នៅមិនទាន់ឲ្យដឹងនៅឡើយ ព្រោះបើសូម្បីតែគេហទំព័រ Miz Mooz ខ្លួន​ឯង ក៏បានគាំងលែងដំណើរការដែរ បន្ទាប់ពីបានប្រកាសផលិតផលថ្មីនេះ ចេញមកជាផ្លូវការ កាល​ពី​២ថ្ងៃ​មុន។

សូមបញ្ជាក់ដែរថា ដងដោយថតរូបខ្លួនឯងនេះ ត្រូវបានហាមឃាត់ នៅក្នុងទីសាធារណៈមួយចំនួន នៅប្រទេស​អាមេរិក និងបណ្ដាប្រទេសមួយចំនួន នៅអ៊ឺរ៉ុប។ នៅបារាំង គម្រោងច្បាប់មួយ គ្រោងនឹងអនុម័តក្នុងពេលខាងមុខ ដើម្បី​ធ្វើការ​ហាម​ឃាត់​ជា​ទូទៅ ការប្រើប្រាស់ដងដោយនេះ នៅគ្រប់ទីសាធារណៈទាំងអស់៕