នៅ​ចិន ទុក​ពុក​ចង្កា​ឲ្យ​ដុះ​វែង ត្រូវ​ជាប់​គុក​៦ឆ្នាំ

បុរសម្នាក់ ត្រូវបានផ្ដន្ទាទោស ឲ្យជាប់ពន្ធនាគារ៦ឆ្នាំ ពីបទបង្កអសន្តិសុខសង្គម ព្រោះពុកចង្កា ដោយតុលាការមួយ ក្នុងតំបន់ ជិនជៀង (Xinjiang ផ្នែកខាងលិច នៃប្រទេសចិន) ដែលសម្បូរ ទៅដោយជនជាតិមូស្លីមរស់នៅ។
Loading...
  • ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី៣០ មិនា ២០១៤
  • កែប្រែចុងក្រោយ: March 31, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ជនជាប់ចោទម្នាក់នេះ បានចាប់ផ្ដើមទុកពុកចង្ការបស់ខ្លួន តាំងពីឆ្នាំ២០១០ ខណៈភរិយារបស់គាត់ បានពាក់ស្បៃមុខ បិទផ្ទៃមុខជិតឈឹង។ នេះបើតាមសារព័ត៌មាន ក្នុងស្រុកមួយ បានចេញផ្សាយឲ្យដឹង ក្នុងថ្ងៃចន្ទទី៣០ ខែមីនានេះ។ តុលាការចិន នៅក្នុងតំបន់បានរកឃើញនៅទីបំផុត ថាប្ដីប្រពន្ធពីរនាក់នេះ មានកំហុស ពីបទបានចិញ្ចឹមចិត្តប្រឆាំង បទបញ្ជារបស់អាជ្ញាធរ និងបង្កឲ្យមានអសន្តិសុខ ដែលជាបទចោទប្រកាន់ដ៏កម្រ នៅក្នុងប្រព័ន្ធយុត្តិធម៌ចិន។

អាជ្ញាធរខេត្ត ជិនជៀង បានបើកយុទ្ធនាការដ៏ធំមួយ តាំងពីជាងមួយឆ្នាំមកហើយ ប្រឆាំងនឹងការ«ពុកចង្កា» និងការ​ពាក់​«ស្បៃ» បាំងមុខជិត ដែលត្រូវបានចាត់ទុកថា មានលក្ខណៈដូចអ្វី ដែលមនោគមន៍វិជ្ជា អ៊ីស្លាមជ្រុលនិយម តែងបង្គាប់​ឲ្យធ្វើ។ យុទ្ធនាការនោះ មានឈ្មោះថា «ដើម្បីសម្ផស្ស» ហើយបានជំរុញឲ្យស្ត្រីៗទាំងអស់ នៅតំបន់នោះ ដើរទៅណា​មក​ណា ដោយ​ក្បាលទទេរ ហើយទុកចោល នូវស្បៃទទូរ ដែលជាទំនៀមទម្លាប់ របស់ជនជាតិ អ៊ុយហ្គ័រ (Ouïghours) កាន់​សាសនា​ឥស្លាម។

ប្ដីប្រពន្ធ កាសហ្គារ (Kashgar) មួយគូរនេះ បានរងការព្រមានជាច្រើនដងហើយ មុននឹងត្រូវបានចាប់ខ្លួន ហើយ​ដាក់​ឲ្យ​ប្រឈមនឹងការស៊ើបអង្កេត។ នេះបើតាមអ្នកទទួលខុសត្រូវមួយ នៃអាជ្ញាធរតំបន់ ដែលដកស្រង់សំដី ដោយ​សារព័ត៌មាន​ដដែល។ អ្នកទទួលខុសត្រូវនោះ បានអះអាងទៀតថា៖ «ក្រុមទាំងមូល ដែលមិនស្ដាប់តាមបញ្ជា ហើយនៅ​តែ​ទុក​ពុក​ចង្កា ពាក់ស្បៃបិទមុខជិតនោះ តែងត្រូវបានប្រឈម នឹងការផ្ដន្ទាទោស តាំងពីច្រើនឆ្នាំមកហើយ»។

យ៉ាងណាក៏ដោយ ក៏ទង្វើរបស់អាជ្ញាធរចិន មិនទទួលបានការស្វាគមន៍ ពីក្រុមអ្នកការពារសិទ្ធិមនុស្សនោះទេ។ វិធាន​ការទាំងនេះ របស់រដ្ឋាភិបាលកុម្មុយនីសក្រុងប៉េកាំង មានលក្ខណៈ ជាការគាបសង្កត់ផ្នែកវប្បធម៌ ទំនៀមទំលាប់ និង​សាសនា ទៅលើបណ្ដាជន អ៊ុយហ្គ័រ ដែលជាបណ្ដាជនភាគច្រើន នៅក្នុងតំបន់ ហើយទង្វើនេះ នឹងបង្ក​ឲ្យមាន​ភាព​តាន​តឹង កាន់តែខ្លាំងឡើង។ ក្នុងរយៈពេលចុងក្រោយនេះ អំពើហិង្សាបានកើនឡើង កាន់តែខ្លាំង បង្កឲ្យមនុស្សស្លាប់​យ៉ាង​ហោច ២០០នាក់ បន្ទាប់ពីមានការប្រឈមគ្នា រវាងក្រុមអ្នកតវ់ា និងកងកម្លាំងនគរបាល៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...